ۇيىمداستىرۋشىلاردىڭ ايتۋىنشا, فەستيۆالدىڭ نەگىزگى وقيعاسى جاساندى ينتەللەكتپەن ازىرلەنگەن قىسقامەتراجدى فيلمدەردىڭ حالىقارالىق بايقاۋى بولماق. وعان الەم ەلدەرىنىڭ كرەاتورلارى تاجىريبەسىنە دە, كاسىبي ستۋدياسىنىڭ بار-جوعىنا دا قاراماستان قاتىسا الادى.
«Astana AI Film Festival كرەاتيۆتى يندۋسترياداعى جىل سايىنعى ماڭىزدى وقيعاعا ءارى جاڭا فورماتتار مەن جاڭا ەسىمدەرگە ارنالعان تۇراقتى حالىقارالىق الاڭعا اينالادى دەپ كۇتىلۋدە. بۇل رەتتە قاتىسۋ بارلىق نيەت بىلدىرۋشىلەر ءۇشىن اشىق: وتىنىمدەر كوماندالاردان دا, جەكە كرەاتورلاردان دا قابىلدانادى», دەدى فەستيۆال ۇيىمداستىرۋشىلارىنىڭ ءبىرى, Ozen كومپانياسىنىڭ نەگىزىن قالاۋشى ايزاتۋللا حۋسسەين.
تەاتر, كينو جانە ديالوگ: استانادا رەسەيدىڭ مادەنيەت كۇندەرى وتەدى
ءوتىنىم قابىلداۋ 2026 جىلدىڭ مامىر ايىندا باستالادى. تۋىندىنى فەستيۆالدىڭ رەسمي سايتى ارقىلى جولداۋعا بولادى.
«بايقاۋ شارتتارىنا سايكەس, قاتىسۋشىلار ۇزاقتىعى 10 مينۋتقا دەيىنگى قىسقامەتراجدى AI-فيلم ازىرلەپ, ونى جوبانىڭ سيپاتتاماسىمەن بىرگە فەستيۆالدىڭ لەندينگ-پلاتفورماسىنا جۇكتەۋى ءتيىس. وتىنىمدەر مامىر ايىنان تامىز ايىنىڭ سوڭىنا دەيىن قابىلدانادى», دەپ اتاپ ءوتتى فەستيۆال ۇيىمداستىرۋشىسى, Brave Talents كومپانياسىنىڭ جەتەكشىسى الماس جالي.
ەسكە سالا كەتەيىك, Astana AI Film Festival 2026 جىلدىڭ كۇزىندە وتەدى. فەستيۆال كينويندۋستريا مەن AI-تەحنولوگيالاردىڭ توعىسىنداعى جوبالارعا ارنالعان الاڭعا اينالىپ, اۆتورلاردىڭ, digital-كرەاتورلاردىڭ, تەحنولوگيالىق كومپانيا وكىلدەرىنىڭ, ساراپشىلار مەن ينۆەستورلاردىڭ باسىن قوسادى.
ءوز سەگمەنتىندەگى ەڭ ءىرى فەستيۆالدەردىڭ بىرىنە اينالۋدى كوزدەيتىن جوبانىڭ جالپى جۇلدە قورى 1 ميلليون اقش دوللارىن قۇرايدى. جوبا دەمەۋشىلىك جانە سەرىكتەستىك قاراجات ەسەبىنەن جۇزەگە اسىرىلماق.
جي كومەگىمەن جاسالعان مۋلتفيلم كينوتەاتردان كورسەتىلدى
فەستيۆال اياسىندا كورسەتىلىمدەر, AI-كونتەنتكە ارنالعان كونفەرەنتسيا, سونداي-اق اۆتورلار مەن پروديۋسەرلەرگە ارنالعان پيتچ-سەسسيالار وتكىزۋ جوسپارلانعان.
