ەكولوگيانىڭ ناشارلىعىنان جىلىنا 7 ملن. ادام قايتىس بولادى

استانا. 12 مامىر. الەمدە ۇلكەن قالالارداعى ەكولوگيانىڭ ناشارلاۋىنان جىلىنا شامامەن 7 ميلليون ادام قايتىس بولادى. بۇل تۋرالى 24.kz-كە سىلتەمە جاساعان egemen.kz ءتىلشىسى حابارلادى. بۇل مالىمدەمەنى دۇنيەجۇزىلىك دەنساۋلىق ساقتاۋ ۇيىمى جاسادى. ۇيىمنىڭ اقپارىنشا, 2014 جىلى ارنايى جۇرگىزىلگەن زەرتتەۋ جۇمىستارى كەزىندە الەمدەگى 1600 قالانىڭ ەكولوگياسى ناشارلاعانىن انىقتاعان. ال بۇل كورسەتكىش بۇگىندە ەكى ەسەگە ارتىپ وتىر. قازىرگى كەزدە الەمنىڭ 3 مىڭعا جۋىق قالاسىنىڭ تۇرعىندارى لاس اۋامەن دەم الۋدا. ولاردىڭ اراسىندا قىتاي مەن ءۇندىستان قالالارى كوش باستاپ تۇر. «ەكولوگيانىڭ ناشارلاۋى ادام دەنساۋلىعىنا وراسان زور زيانىن تيگىزەدى. مۇنى حالىق دۇرىس ءتۇسىنۋى ءتيىس. ال وسىنداي قالالاردىڭ باسشىلارى بۇل ماسەلەنىڭ شەشىمىن تەزىرەك تاۋىپ, نازاردان تىس قالدىرماۋى ءتيىس. وسى ءىس تەز ارادا جۇزەگە اسىرىلسا, دەنساۋلىققا تونەتىن قاۋىپتىڭ بەتى قايتادى», – دەيدى دۇنيەجۇزىلىك دەنساۋلىق ساقتاۋ ۇيىمنىڭ قوعام دەنساۋلىعىن ساقتاۋ ءىسى بويىنشا ديرەكتورى ماريا نەيرا. ايتا كەتەيىك, الەمدەگى ەكولوگياسى ناشار قالالاردىڭ ءبىرى بولىپ, قىتاي استاناسى بەيجىڭ سانالادى. بەيرەسمي مالىمەتتەر بويىنشا, اسپاناستى ەلىنىڭ باس قالاسىنداعى بۇل جاعداي, ءتىپتى عارىشتان دا كورىنەدى. وسىعان بايلانىستى, قالا بيلىگى بىرقاتار ىستەردىڭ باستاۋ الۋىنا سەبەپشى بولعان. ايان ءابدۋالي. دەرەك: 24.kz. فوتو: تاسس.