قوستانايدا بەلگىلى كاسىپكەر قايتىس بولدى

قوستاناي. 28 ءساۋىر. قوستانايدا بەلگىلى كاسىپكەر, «دەپ» ءسۇت زاۋىتىنىڭ ديرەكتورى ەۆگەني پەتروۆيچ درۋجينين 53 جاسىندا قايتىس بولدى. بۇل تۋرالى egemen.kz ءتىلشىسى حابارلادى. ەۆگەني درۋجينين قوستاناي وڭىرىندە تاماق ونەركاسىبىنىڭ, جالپى اۋىل شارۋاشىلىعى ءونىمىن وڭدەۋ ونىركاسىبىنىڭ دامۋىنا قوماقتى ۇلەس قوسقان كاسىپكەر بولاتىن. ول «دەپ» ءسۇت زاۋىتىنىڭ نەگىزىن قالاعاننان باستاپ, ونى ءومىرىنىڭ سوڭىنا دەيىن باسقاردى. اتالعان ءسۇت زاۋىتىنىڭ ساپالى ءونىمىن تەك قوستاناي ءوڭىرى عانا ەمەس, قازاقستاننىڭ كوپتەگەن وبلىستارى پايدالانادى, ونىڭ وكىلدىكتەرى بىرنەشە وبلىستاردا بار. زاۋىت ءونىمىن رەسەيگە دە ەكسپورتتايدى. كوپتەگەن كورمەلەرگە قاتىسىپ, جۇلدەلى ورالىپ ءجۇردى. ەۆگەني پەتروۆيچ «داستارحاندا قوسپاسى جوق تەك تابيعي ءونىم, ازىق بولۋى ءتيىس» دەگەن ۇستانىمدا بولاتىن. شەبەر ۇيىمداستىرۋشى سوڭعى جىلدارى قوستاناي قالاسىنىڭ ىرگەسىندەگى زاتوبول كەنتىنەن كوپكە ساقتالاتىن نان وندىرەتىن زاماناۋي زاۋىت قۇرىلىسىن دا باستاپ ەدى. امال نە, ءىستى اياقتاۋعا ونىڭ ءومىرى جەتپەدى. كاسىپكەر «مەن اسا تۇسىنبەسەم دە, ەلىمىزدىڭ قازاق ءتىلدى باسىلىمدارىنا قۇرمەتپەن قارايمىن» دەيتىن. «ەگەمەن قازاقستان» گازەتىنە دە وسى ءسوزدى ارناپ ەدى. مارقۇم ءوزىنىڭ تۋعان جەرى رۋدنىي قالاسىندا جەرلەنەدى. ءنازيرا جارىمبەتوۆا. دەرەك, فوتو: egemen.kz.