قارۋسىزدانۋدىڭ قازاقستاندىق ۇستانىمىن قۇپتايمىز

نەيتون لوۋلەر, فيزيكا-ماتەماتيكا باعىتىنداعى نازارباەۆ زياتكەرلىك مەكتەبى ديرەكتورىنىڭ ورىنباسارى: مەن ءوزىم امەريكا قۇراما شتاتتارىندا تۋىپ-ءوستىم. جوعارى وقۋ ورنىن تامامداعان سوڭ وسىندا كەلدىم. قازىر وبلىس ورتالىعىنداعى فيزيكا-ماتەماتيكا باعىتىنداعى نازارباەۆ زياتكەرلىك مەكتەبىندە جۇمىس ىستەيمىن. مەن قازاقستاندىقتاردىڭ ىنتىماعى مەن بىرلىگىنە ءدان ريزامىن. مۇنىڭ بارلىعى پرەزيدەنت ن.نازارباەۆتىڭ سارابدال ساياساتىنىڭ ارقاسى ەكەنىنە كوز جەتكىزىپ كەلەمىن. قازاقستاننىڭ يادرولىق قارۋدان باس تارتىپ, ەگەمەندىكتىڭ ەلەڭ-الاڭىندا سەمەي يادرولىق سىناق الاڭىن جابۋى دۇنيەجۇزى ەلدەرىنە ونەگە بولعانى ايداي اقيقات. قازاقستان باسشىسى تاۋەلسىزدىك العان جىلدارى حالقىنىڭ قاۋىپسىزدىگىن ءبىرىنشى كەزەككە قويدى, الدىمەن يادرولىق قارۋدان باس تارتتى, سودان سوڭ مەملەكەتتىڭ شەكاراسىن زاڭداستىردى. قازاقستاننىڭ بۇل ساياساتى بۇگىندە الپاۋىت مەملەكەتتەر ءۇشىن ۇلكەن ۇلگى بولدى دەۋ ورىندى. ن.نازارباەۆتىڭ «الەم. ءححى عاسىر» اتتى مانيفەسى دە دۇنيەجۇزىندەگى بارشا حالىقتىڭ باكىتىنا باعىتتالعان باستاما ەكەنىن ايتۋعا ءتيىسپىز. نۇرسۇلتان ءابىش ۇلىنىڭ الەم جۇرتشىلىعى الدىندا ايتقان اقيقاتتى ويلارى كىم-كىمدى دە بەيجاي قالدىرماسى انىق. مۇنداي وركەنيەتتى باستاماعا بارشا مەملەكەت باسشىلارى قولداۋ كورسەتۋى كەرەك. كەلەشەگىن ويلاعان قاي حالىق تا وسى مانيفەستەن ساباق الۋى ءتيىس. قازاقستان – مەن كورگەن جەردەگى جەرۇيىق مەكەن, تاتۋلىق تۇعىرى بەرىك ەل. مەن وسىنداي ەلگە تاپ كەلگەنىمە ىلعي دا ريزاشىلىعىمدى ءبىلدىرىپ جۇرەمىن. قوناقجاي قازاق ەلىنەن ادامزاتتىڭ اسقاق ارمانى – بەيبىتشىلىكتىڭ باياندى باستامالارى تامىر تارتۋى دا سوندىقتان دەپ ويلايمىن. ۇدايى بارشا ادامزاتتى بەيبىت قاتار ءومىر سۇرۋگە شاقىرىپ, سول جولدا باستاماشى بولىپ كەلە جاتقان ەلدە تۇرىپ, ەڭبەك ەتىپ جاتقانىما ريزامىن. بۇل ەلدىڭ ەرتەڭى جارقىن, بولاشاعى باقىتتى بولارىنا سەنىمىم مول. مەن سوندىقتان دا قازاق ءتىلىن وقىپ-ۇيرەنىپ, سالت-داستۇرلەرىن يگەرۋگە قۇلشىنىس تانىتىپ كەلەمىن. قازاقستان رەسپۋب­ليكاسىنىڭ پرەزيدەنتى نۇرسۇلتان نازارباەۆتىڭ مانيفەسى ارقىلى تاعى دا قازاق ەلىنىڭ بەيبىت باستاماسى الەمدىك دەڭگەيدە ايتىلعان ادامزاتتىڭ اسىل اڭسارى رەتىندە اسقاق ەستىلۋدە. جاپپاي قىرىپ-جوياتىن قارۋمەن ماسەلە شەشۋگە تالپىنۋ ۇلتتىق وزىمشىلدىك, مەملەكەتتىك مەنمەنشىلدىك دەر ەدىم. قازىر الەم تىنىشسىز بولا باستادى. جەر-جەردە لاڭكەستىك وقيعالار ورىن الۋدا, الەمدىك سوعىس ءورتىنىڭ تۇتانىپ كەتۋ قاۋپى بايقالادى. بۇل اركىمدى, سونىڭ ىشىندە, بۇكىل ءبىر ەلدىڭ تىزگىنىن ۇستاعان, حالىقتىڭ جاۋاپكەرشىلىگىن موينىنا العان مەملەكەت باسشىلارىنىڭ قاپەرىندە بولۋى كەرەكتىگىن قازاقستان پرەزيدەنتى ن.نازارباەۆ تاعى ءبىر ەسكە سالدى. نۇرسۇلتان ءابىش ۇلىنىڭ يادرولىق قارۋدان باس تارتۋ, ونى بەيبىت ماقساتقا پايدالانۋ تۋرالى ويلارى اسا ومىرشەڭ. بۇل – بارلىق حالىقتاردىڭ كوڭىلىنەن شىعاتىن, كوكىرەگىنە قوناتىن باستاما. كۇللى الەم جۇرتشىلىعى بۇرىن-سوڭدى قۇلاق ەستىپ, كوز كورمەگەن سۇم­دىق وقيعالاردىڭ كۋاسى بولۋدا. ەۋروپاعا تولاسسىز اعىلعان بوسقىندار لەگى, سيرياداعى جۇزدەگەن مىڭ ادام قۇرباندىعىنا سوقتىرعان سۇراپىل سوعىس, تۇركيادا, بەلگيادا, پاكىستان مەن باسقا دا مەملەكەتتەردە بولىپ جاتقان لاڭكەستىك ارەكەتتەر, ازەربايجان مەن ارمەنيا اراسىندا قايتا ورشىگەن قاقتىعىس اركىمدى ويلاندىرۋى ءتيىس دەپ ويلايمىن. مەن ءوزىم ەكى ەلدىڭ ورتاسىندا التىن كوپىر بولىپ, قازاق بالالارىنا اعىلشىن ءتىلىن ۇيرەتىپ جۇرگەنىمدى ماقتان ەتەمىن. قازىر وبلىستا وتەتىن قوعامدىق-ساياسي, مادەني شارالاراعا بەلسەنە قاتىسامىن. سول ارقىلى بەيبىتشىلىك پەن تاتۋلىقتىڭ باعاسىن جاس ۇرپاقتىڭ ساناسىنا سىڭىرۋگە تىرىسامىن. شاكىرتتەرىم دە مەنى جاقسى تۇسىنەدى. قازاقستاندا باقىتتى ءومىر ءسۇرۋدىڭ بارلىق مۇمكىندىكتەرى قاراستىرىلعان. ەڭ باستىسى – بەيبىتشىلىك پەن تاتۋلىققا نەگىزدەلگەن ەلدەگى ساياساتتىڭ بارشا قازاقستاندىقتاردى بولاشاقتارىنا زور سەنىممەن قاراۋعا سەندىرەتىنى قۋانتادى. دوستىق پەن بىرلىك بار جەردە باقۋاتتى تۇرمىس, باقىتتى ءومىر بولاتىنىنا سەنىم مول. پرەزيدەنت ن.نازارباەۆتىڭ «الەم. ءححى عاسىر» اتتى مانيفەسىن قارۋسىزدانۋدىڭ قازاقستاندىق ۇستانى­مىنىڭ ايشىقتى كورىنىسى دەپ باعالاۋ ءجون دەر ەدىم. جالپى, يادرولىق قارۋدىڭ قانشالىقتى قايعى-قاسىرەت اكەلەتىنىن الەم جۇرتشىلىعى ءتۇسىنىپ بولدى. مۇنداي قارۋلى قاقتىعىستاردىڭ الدىن الۋ – ادامزاتتىڭ ورتاق پروبلەماسى. سوندىقتان پرەزيدەنت ن.نازارباەۆتىڭ مانيفەسىنە الەم قۇلاق ءتۇرۋى كەرەك, وسى باعىتتا كۇش بىرىكتىرۋى قاجەت دەپ ويلايمىن.  اقتوبە وبلىسى