مامىر ايىندا دزيۋدو اكادەمياسى پايدالانۋعا بەرىلەدى

استانا. 8 ءساۋىر. مامىر ايىندا الماتى قالاسىندا سالىنىپ جاتقان دزيۋدو اكادەمياسى پايدالانۋعا بەرۋ جوسپارلانىپ وتىر. بۇل تۋرالى دزيۋدو فەدەراتسياسىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. جاڭا دزيۋدو اكادەمياسى بارلىق حالىقارالىق تالاپتارعا ساي بولادى. سپورت كەشەنىندە 4 تاتاميگە ارنالعان زال, ترەناجەر زالى, 100 ادامعا ارنالعان جاتاقحانا مەن اسحانا ورنالاسادى. ونىڭ ىشىندە قازاقستان ۇلتتىق قۇراماسىنىڭ عانا سپورتشىلارى ەمەس, وسى سپورتقا ەندى قىزىعۋشىلىق تانىتقان جەتكىنشەكتەر دە جاتتىعادى. سونىمەن قاتار, اكادەميادا وقۋ-جاتتىعۋلار, شەتەلدىك مامانداردىڭ قاتىسۋىمەن سەمينارلار مەن شەبەرلىك ساباقتارىن ۇيىمداستىرۋ كوزدەلگەن. دزيۋدو اكادەمياسى الماتى قالاسىندا سالىنىپ جاتىر. اكادەميانىڭ سالتاناتتى تۇردە اشىلۋ ءراسىمى 13 - 15 مامىر ارالىعىندا وتەدى. وسى كەزدە «Grand Prix» جارىسىن وتكىزۋ جوسپارلانعان. شاراعا مادەنيەت جانە سپورت ءمينيسترى ارىستانبەك مۇحامەدي ۇلى, الماتى قالاسىنىڭ اكىمى باۋىرجان بايبەك, حالىقارالىق دزيۋدو فەدەراتسياسىنىڭ پرەزيدەنتى ماريۋس ۆيزەر مەن قازاقستان دزيۋدو فەدەراتسياسىنىڭ پرەزيدەنتى كەڭەس راقىشەۆ قاتىسادى دەپ كۇتىلۋدە. «سالتاناتتى اشىلۋ ءراسىمىنىڭ وتەتىن كۇنى مەن ۋاقىتىن قوسىمشا حابارلايمىز», دەلىنگەن دزيۋدو فەدەراتسياسىنىڭ ءباسپاسوز قىزمەتىنىڭ حابارلاماسىندا. داستان كەنجالين. دەرەك: دزيۋدو فەدەراتسياسىنىڭ ءباسپاسوز قىزمەتى. فوتو: egemen.kz