فوتو: اقوردا
پرەزيدەنت قاسىم-جومارت توقاەۆ سالتاناتتى ءىس-شارادا سويلەگەن سوزىندە قازاقستان ءۇشىن بۇل وليمپيادانىڭ ورنى ەرەكشە ەكەنىن ايتتى.
«وتانداسىمىز ميحايل شايدوروۆ تاماشا ونەر كورسەتتى. مانەرلەپ سىرعاناۋدان التىن مەدالعا يە بولىپ, كوك تۋىمىزدى وليمپ شىڭىنا كوتەردى. سوندىقتان ميحايلعا العىسىمدى ءبىلدىرىپ, قۇتتى بولسىن دەگىم كەلەدى. اقوردادا جينالىپ وتىرعان ادامدارعا, ەڭ الدىمەن, ميحايلدىڭ اكەسى مەن جەڭىمپازدىڭ باپكەرىنە ريزاشىلىعىمدى ايتامىن. بارشاڭىزدى تاعى دا شىن جۇرەكتەن قۇتتىقتايمىن! سىزدەر قاجىرلى جانە تاباندى ەڭبەكتىڭ ارقاسىندا ميحايلدى مىقتى سپورتشى, ناعىز دارىن يەسى رەتىندە بۇكىل الەمگە پاش ەتتىڭىزدەر. حالقىمىز ميحايلدى ماقتان تۇتادى, ال جاس بۋىن ودان ۇلگى الادى. وليمپيادا جەڭىمپازى بولۋ – بيىك ماقسات جولىندا كەز كەلگەن قيىندىقتى جەڭۋ, ياعني, ۇزاق ءارى كۇردەلى جولعا دايىن بولۋ دەگەن ءسوز. تەمىردەي تارتىپپەن كۇن سايىن تىنىمسىز جۇمىس ىستەگەن ادام عانا زور تابىسقا جەتەرى انىق», دەدى مەملەكەت باسشىسى.
قاسىم-جومارت توقاەۆ ميحايل شايدوروۆتىڭ جەڭىسى ەلىمىز ءۇشىن تەڭدەسى جوق جەتىستىك سانالاتىنىنا نازار اۋداردى.
«بىرىنشىدەن, بۇل – كوپتەن كۇتكەن, ياعني, 32 جىلدان كەيىن قول جەتكىزگەن تاريحي جۇلدە. ەكىنشىدەن, بۇل – مانەرلەپ سىرعاناۋدان ەل قورجىنىنا تۇسكەن العاشقى وليمپيادا التىنى. ۇشىنشىدەن, كۇللى الەم ەلىمىزدە ايگىلى سپورتشى دەنيس تەننىڭ جولىن جالعاستىراتىن دارىندى جاستاردىڭ بار ەكەنىنە كۋا بولدى. ميحايل شايدوروۆتىڭ وليمپيادادا كورسەتكەن كەرەمەت ونەرى, ءسوزسىز, تاريحي جەتىستىك, ناعىز تريۋمف. كورتينا د’امپەتستسو مۇز ايدىنىندا وتانداسىمىزدىڭ جۇلدىزى جارقىرادى. بۇل – وليمپيادا چەمپيونىنىڭ ءوزىن-ءوزى شىڭداپ, ءوز كۇشىنە سەنگەنىنىڭ, مانەرلەپ سىرعاناۋ سياقتى اسا قيىن سپورت تۇرىنە دەگەن ەرەكشە ماحابباتىنىڭ جەمىسى», دەدى پرەزيدەنت.
«ستانيسلاۆ الەكساندروۆيچ – مانەرلەپ سىرعاناۋدان قازاقستاننىڭ بىرنەشە دۇركىن چەمپيونى. اكەسى, تۇڭعىش باپكەرى رەتىندە ميحايلدىڭ مۇز ايدىنىنداعى العاشقى قادامىن جاساۋعا كومەكتەسىپ, ءومىردىڭ ەڭ قيىن ساتتەرىندە ءاردايىم ۇلىنىڭ جانىندا بولعان ادام. مەملەكەت باسشىسى رەتىندە قازاقستان رەسپۋبليكاسىنىڭ كوك تۋىن الەمنىڭ باستى سپورت ارەناسىندا بيىك جەلبىرەتكەن وسىنداي ۇلدى, وتانشىل ازاماتتى تاربيەلەگەنىڭىز ءۇشىن سىزگە شىن جۇرەكتەن العىس ايتامىن. ءباسپاسوز بەتىندەگى سۇحباتىڭىزدى وقىپ شىقتىم. ميحايلدان مەيىرىمىڭىزدى اياماي, تالانتتى پەرزەنتىڭىزدىڭ سپورتتاعى ەرەكشە ميسسياسىنا تيتتەي دە كۇمان كەلتىرمەي, اكەلىك پارىزىڭىزدى ادال ءارى لايىقتى اتقاردىڭىز. بيىك شىڭعا اپارار بۇرالاڭ جولدان بىرگە وتتىڭىزدەر. ەندى سول تابان اقى, ماڭداي تەردىڭ جەمىسىن كورىپ, قۇرمەت پەن قوشەمەتكە بولەنىپ جاتسىزدار. بۇگىندە حالقىمىز سىزدەردى ارداق تۇتادى. وتانشىلدىقتىڭ ناعىز ۇلگىسىن كورسەتكەندەرىڭىز ءۇشىن ەلىمىز سىزدەرگە ريزاشىلىعىن بىلدىرەدى. جۇرتشىلىقتىڭ العاۋسىز العىسى مەن قۇرمەتىنە مەن دە قوسىلامىن», دەدى قاسىم-جومارت توقاەۆ.
پرەزيدەنت چەمپيوننىڭ باپكەرى, ايگىلى سپورتشى, 1994 جىلعى وليمپيادا جەڭىمپازى, الەم چەمپيونى الەكسەي ۋرمانوۆقا ىستىق ىقىلاسىن ءبىلدىردى.
«مانەرلەپ سىرعاناۋ سپورتىنداعى بىلىكتى مامان رەتىندە ەرەن جەتىستىكتەرىڭىزدى جالعايتىن لايىقتى ءىزباسار دايىندادىڭىز. سول ءۇشىن سىزگە زور العىس ايتامىن. وسىناۋ تاماشا تابىسقا سالالىق مينيسترلىك, فەدەراتسيا, سونداي-اق اتاقتى بوكسشىمىز, جاقىندا ەسىمى دۇنيەجۇزىلىك بوكس داڭقى زالىنا جازىلعان گەننادي گولوۆكين باسقاراتىن ۇلتتىق وليمپيادا كوميتەتى ەلەۋلى ۇلەس قوستى. وتانداستارىمىز سپورتتىق باسەكەنىڭ قيىندىقتارىن, اسىرەسە, ەركىن باعدارلامادان كەيىنگى ميحايلدىڭ كۇردەلى جاعدايىن تەبىرەنىسپەن باقىلاپ وتىردى. بىراق ول تاۋەكەلگە بارىپ, جەر-جاھاننىڭ باستى بايراقتى باسەكەسىندەگى جەڭىستى ج ۇلىپ الدى. بۇل دا كەزدەيسوق ەمەس. وزىنە بەرىلگەن جالعىز مۇمكىندىكتى ەكىنىڭ ءبىرى ءساتتى پايدالانا المايدى. ادەتتە جارىسقا تۇسكەندە «باق شابا ما, باپ شابا ما» دەپ جاتادى. بىراق «ەڭبەك – ءبارىن دە جەڭبەك» دەگەن ۇلاعاتتى دا ۇمىتپايىق. ميحايلدىڭ جەڭىسى مىڭداعان جاستارىمىزدى سپورتپەن شۇعىلدانۋعا جىگەرلەندىردى. ەڭبەك ەتسەڭ, ەرىك-جىگەرىڭ مۇقالماي, باتىل ارەكەت قىلساڭ, كەز كەلگەن, ءتىپتى قول جەتپەستەي كورىنەتىن ارماننىڭ ءوزى ورىندالاتىنىنا سەنىمىن كۇشەيتتى. بۇگىندە ەلىمىزدەگى مىڭداعان ۇل-قىز ميحايل شايدوروۆقا قىزىعا قاراپ, ەلىكتەيدى, داڭقتى سپورتشى بولعىسى كەلەدى. دەمەك ەلىمىزدىڭ ۇلاندارى الەمدىك سپورتتىڭ بيىگىندە جارقىراي كورىنەتىن كۇن الدا. بارشا وليمپيادا چەمپيوندارىنىڭ اتى الەم سپورتىنىڭ جىلناماسىنا جازىلادى, ولاردىڭ جەتىستىكتەرى لوزانناداعى حالىقارالىق وليمپيادا كوميتەتىنىڭ مۋزەيىندە تىركەلەدى. ەندى ءتۇرلى ەلدىڭ تۋريستەرى ميحايل شايدوروۆتىڭ 2026 جىلعى وليمپياداداعى تاماشا جەڭىسى تۋرالى بىلەتىن بولادى», دەدى مەملەكەت باسشىسى.
قاسىم-جومارت توقاەۆ مەملەكەت تاراپىنان بۇقارالىق جانە كاسىبي سپورتتىڭ دامۋىنا قولايلى جاعداي جاسالاتىنىن ايتتى. بۇل – مەملەكەتتىك ساياساتتىڭ باسىم باعىتى.
«وليمپياداداعى ناتيجە ارقاشان ەل دامۋىنىڭ ماڭىزدى كورسەتكىشتەرىنىڭ ءبىرى سانالعان, الداعى ۋاقىتتا دا سولاي بولا بەرمەك. قازاقستان وسى جارىستارعا قاتىسقان سپورتشىلاردىڭ سانى جاعىنان 25-ورىنعا تابان تىرەدى. ءبىز الدىنا ماقسات قويعان ءار ەڭبەكقور جان ءوزىنىڭ قابىلەت-قارىمىن كورسەتە الاتىن, سونىڭ ىشىندە سپورتتا كوزدەگەن بيىگىنە جەتۋى ءۇشىن مول مۇمكىندىككە جول اشاتىن ادىلەتتى قازاقستاندى قۇرىپ جاتىرمىز. ادال باسەكە, مەريتوكراتيا, ءتارتىپ پەن جاۋاپكەرشىلىك, بۇل – ۇلكەن سپورتتىڭ دا, كەز كەلگەن قۋاتتى مەملەكەتتىڭ دە دىڭگەگى. ۇلتتىڭ جاسامپازدىق قۋاتىن ارتتىرۋ رەسپۋبليكالىق رەفەرەندۋمعا شىعارىلعان جاڭا حالىقتىق كونستيتۋتسيا جوباسىنىڭ نەگىزگى مازمۇندىق وزەگى بولىپ وتىر. اتا زاڭداعى ادىلدىك, تارتىپكە باعىنۋ, تابيعاتتى ايالاۋ, وتانشىلدىق قاعيداتتارى مەملەكەت ىرگەسىن بەكەمدەپ, وركەندەۋدىڭ قوزعاۋشى كۇشىنە اينالادى», دەدى مەملەكەت باسشىسى.
پرەزيدەنتتىڭ پىكىرىنشە, مەملەكەتتەردىڭ دامۋى دا ۇلكەن سپورتقا ۇقساس: كىم الدىنا بيىك ماقسات قويادى, تاباندى ەڭبەك ەتەدى, بىرلەسىپ جۇمىس ىستەيدى, سول جەتىستىككە جەتەدى.
«بۇگىن ءبىز جەڭىسكە جەتۋگە بار كۇش-جىگەرىن جۇمساپ, جەكە رەكوردتارىن جاڭارتقان ميحايل مەن ۇلتتىق قۇراما مۇشەلەرىن قۇتتىقتايمىز. كەيبىر سپورتشىلارىمىز وسىنداي اۋقىمداعى جارىسقا العاش رەت قاتىسسا دا, ولار لايىقتى ونەر كورسەتتى. كوپتەگەن سپورتشىمىز وزدەرى سىنعا تۇسكەن سايىستا ۇزدىك وندىققا ەندى. بۇل بولاشاقتاعى تابىستارعا جول اشادى. ازاماتتارىمىزدىڭ حالىقارالىق دەڭگەيدەگى جەتىستىكتەرى, مەيلى, ول سپورتتا نەمەسە وقۋشىلار مەن ستۋدەنتتەر وليمپياداسىندا, ونەردە, ءتىپتى باسقا سالالاردا بولسىن, ەلىمىزدىڭ وركەندەپ كەلە جاتقانىن كورسەتەدى. تاياۋدا ميلان مەن كورتينادا قىسقى پاراليمپيادا ويىندارى باستالادى. سپورتشىلارىمىزعا ساتتىلىك تىلەيمىن», دەدى قاسىم-جومارت توقاەۆ.
وليمپيادا ويىندارىنىڭ جابىلۋ سالتاناتىندا قازاقستان تۋىن ميحايل شايدوروۆ الىپ شىقتى
مەملەكەت باسشىسى ءسوزىن قورىتىندىلاي كەلە, ەكى جىلدان كەيىن اتلەتتەرىمىز لوس-اندجەلەستە وتەتىن جازعى وليمپيادا ويىندارىنا قاتىساتىنىن ەسكە سالدى.
«تۋريزم جانە سپورت مينيسترلىگى, ۇلتتىق وليمپيادا كوميتەتى, فەدەراتسيالار بىرلەسە جۇمىس اتقارىپ, قۇراما مۇشەلەرىن جان-جاقتى قولداۋعا ءتيىس. 2029 جىلى الماتى قالاسىندا وتەتىن قىسقى ازيا ويىندارىنا ەرەكشە نازار اۋدارۋ قاجەت. ويىندار ەڭ جوعارى دەڭگەيدە ۇيىمداستىرىلۋى كەرەك. بۇل – قازاقستانداعى سپورتتىڭ دامۋىنا تىڭ سەرپىن بەرىپ, ەكونوميكا مەن تۋريزم سالالارىنا وڭ ىقپال ەتەتىن وتە ماڭىزدى ءىس-شارا», دەدى قاسىم-جومارت توقاەۆ.
پرەزيدەنت XXV قىسقى وليمپيادا ويىندارىنداعى جەتىستىكتەرى ءۇشىن ميحايل شايدوروۆتى ءىى دارەجەلى «بارىس» وردەنىمەن, باپكەرى, جاتتىقتىرۋشى-كەڭەسشى الەكسەي ۋرمانوۆتى ءىى دارەجەلى «دوستىق» وردەنىمەن ماراپاتتادى. «قۇرمەت» وردەنى قازاقستان رەسپۋبليكاسىنىڭ مانەرلەپ سىرعاناۋدان ۇلتتىق قۇراما كومانداسىنىڭ باس جاتتىقتىرۋشىسى اسەم قاسانوۆاعا, مانەرلەپ سىرعاناۋدان جاتتىقتىرۋشى ستانيسلاۆ شايدوروۆقا, قازاقستاندىق كونكيمەن مانەرلەپ سىرعاناۋ وداعىنىڭ پرەزيدەنتى باۋىرجان ەرالىعا تابىستالدى.
وليمپيادا چەمپيونى ميحايل شايدوروۆ كورسەتكەن قولداۋى ءۇشىن قاسىم-جومارت توقاەۆقا جانە بارشا وتانداسىمىزعا ريزاشىلىعىن ءبىلدىردى.
«قۇرمەتتى قاسىم-جومارت كەمەل ۇلى! بۇل كەزدەسۋگە وليمپيادا چەمپيونى رەتىندە قاتىسۋ – مەن ءۇشىن زور مارتەبە. التىن مەدال – مەنىڭ عانا ەمەس, اتا-انامنىڭ, باپكەرلەرىمنىڭ جانە مەن ءۇشىن الاڭداپ, قولداۋ كورسەتكەن بارشا قازاقستاندىقتىڭ جەڭىسى. بۇل ايانباي تەر توگىپ جۇمىس ىستەسەڭ, جاقىن جانداردىڭ ماحابباتى مەن سەنىمى بولسا, ارمانداردىڭ ورىندالاتىنىن كورسەتەدى. پرەزيدەنت مىرزا, ءسىزدىڭ قولداۋىڭىزدىڭ ارقاسىندا سپورتشىلار ۇلكەن جەتىستىكتەرگە, جاڭا تاريحي رەكوردتارعا قول جەتكىزىپ ءجۇر. مەن وليمپيادا التىنىمەن شەكتەلمەيمىن. الدىمدا ۇزاق جول بار. ەلىمنىڭ سەنىمىن اقتاپ, جاس ۇرپاققا ۇلگى بولىپ, حالقىمىزدىڭ مەرەيىن ۇستەم ەتكىم كەلەدى. راحمەت سىزگە! سۇيىكتى وتانىما, قازاقستانىما قىزمەت ەتەمىن», دەدى ميحايل شايدوروۆ.
