فوتو: اقوردا
«مانەرلەپ سىرعاناۋ سپورتىنداعى بىلىكتى مامان رەتىندە ەرەن جەتىستىكتەرىڭىزدى جالعايتىن لايىقتى ءىزباسار دايىندادىڭىز. سول ءۇشىن سىزگە زور العىس ايتامىن. وسىناۋ تاماشا تابىسقا سالالىق مينيسترلىك, فەدەراتسيا, سونداي-اق اتاقتى بوكسشىمىز, جاقىندا ەسىمى دۇنيەجۇزىلىك بوكس داڭقى زالىنا جازىلعان گەننادي گولوۆكين باسقاراتىن ۇلتتىق وليمپيادا كوميتەتى ەلەۋلى ۇلەس قوستى», دەدى قاسىم-جومارت توقاەۆ.
مەملەكەت باسشىسى وتانداستارىمىزدىڭ سپورتتىق باسەكەنىڭ قيىندىقتارىن, اسىرەسە, ەركىن باعدارلامادان كەيىنگى ميحايلدىڭ كۇردەلى جاعدايىن تەبىرەنىسپەن باقىلاپ وتىرعانىن اتاپ ءوتتى.
«بىراق ول تاۋەكەلگە بارىپ, جەر-جاھاننىڭ باستى بايراقتى باسەكەسىندەگى جەڭىستى ج ۇلىپ الدى. بۇل دا كەزدەيسوق ەمەس. وزىنە بەرىلگەن جالعىز مۇمكىندىكتى ەكىنىڭ ءبىرى ءساتتى پايدالانا المايدى. ادەتتە جارىسقا تۇسكەندە «باق شابا ما, باپ شابا ما» دەپ جاتادى. بىراق «ەڭبەك – ءبارىن دە جەڭبەك» دەگەن ۇلاعاتتى دا ۇمىتپايىق. ميحايلدىڭ جەڭىسى مىڭداعان جاستارىمىزدى سپورتپەن شۇعىلدانۋعا جىگەرلەندىردى. ەڭبەك ەتسەڭ, ەرىك-جىگەرىڭ مۇقالماي, باتىل ارەكەت قىلساڭ, كەز كەلگەن, ءتىپتى قول جەتپەستەي كورىنەتىن ارماننىڭ ءوزى ورىندالاتىنىنا سەنىمىن كۇشەيتتى», دەدى پرەزيدەنت.
قاسىم-جومارت توقاەۆ بۇگىندە ەلىمىزدەگى مىڭداعان ۇل-قىز ميحايل شايدوروۆقا قىزىعا قاراپ, ەلىكتەپ, داڭقتى سپورتشى بولعىسى كەلەتىنىن تىلگە تيەك ەتتى. پرەزيدەنتتىڭ پايىمىنشا, ەلىمىزدىڭ ۇلاندارى الەمدىك سپورتتىڭ بيىگىندە جارقىراي كورىنەتىن كۇن الدا.
«بارشا وليمپيادا چەمپيوندارىنىڭ اتى الەم سپورتىنىڭ جىلناماسىنا جازىلادى, ولاردىڭ جەتىستىكتەرى لوزانناداعى حالىقارالىق وليمپيادا كوميتەتىنىڭ مۋزەيىندە تىركەلەدى. ەندى ءتۇرلى ەلدىڭ تۋريستەرى ميحايل شايدوروۆتىڭ 2026 جىلعى وليمپياداداعى تاماشا جەڭىسى تۋرالى بىلەتىن بولادى», دەدى مەملەكەت باسشىسى.
ەسكە سالا كەتەيىك, بۇگىن پرەزيدەنت ميحايل شايدوروۆتى ءىى دارەجەلى «بارىس» وردەنىمەن ماراپاتتادى.
