تالداۋ عىلىمي جوبالاردى تاڭداۋ جانە ىسكە اسىرۋ بارىسىندا جۇيەلىك ولقىلىقتاردى انىقتادى. 13,5 مىڭ ساراپشىنىڭ شامامەن 75%-ى ءىس جۇزىندە جۇمىسقا قاتىسپاعانى بەلگىلى بولدى. ەكسپەرتيزانى فورمالدى جۇرگىزۋ جانە ناتيجەلەردى بەلگىلى ءبىر ۇمىتكەرلەرگە قاراي تۇزەتۋ جاعدايلارى تىركەلدى. 30 زەرتتەۋ بويىنشا وبەكتيۆتىلىك پرينتسيپتەرىنىڭ بۇزىلۋى انىقتالىپ, ولاردىڭ جالپى قۇنى 11,5 ملرد تەڭگەنى قۇرادى.
تالداۋ ناتيجەسىندە 100-دەن استام ۇسىنىس ەنگىزىلدى. 2025 جىلدىڭ شىلدە-جەلتوقسان ارالىعىندا اگەنتتىك ءپروفيلدى مينيسترلىكتەرمەن بىرلەسىپ ولاردىڭ ىسكە اسىرىلۋىنا جان-جاقتى شارالار قابىلدادى.
ساراپشى قىزمەتىنىڭ قۇنىن ەسەپتەۋ بويىنشا جاڭا ادىستەمە بەكىتىلدى. ەڭبەكاقىداعى ايتارلىقتاي تەڭسىزدىك جويىلدى, بۇعان دەيىن شەتەلدىك ماماندارعا شامامەن 400 مىڭ تەڭگە تولەنسە, وتاندىق ساراپشىلار ورتا ەسەپپەن 8 500 تەڭگە العان. ەڭبەكاقى تولەۋگە بىرىڭعاي ءتاسىل ەنگىزىلدى, ول تەڭ جاعدايلاردى قامتاماسىز ەتەدى جانە ۇلتتىق ساراپتامالىق الەۋەتتى نىعايتادى.
عىلىمي ادەپ تالاپتارىن بۇزعان نەمەسە جوسپارلانعان ناتيجەلەرگە قول جەتكىزۋدى قامتاماسىز ەتپەگەن ادال ەمەس ساراپشىلار مەن جوبالار باسشىلارىنىڭ رەەسترى قۇرىلدى. رەەسترگە ەنگىزۋ قاتىسۋشىلاردىڭ ناقتى جەتىستىكتەرى راستالعانعا دەيىن كونكۋرستارعا قاتىسۋ مۇمكىندىگىن ۋاقىتشا شەكتەۋدى بىلدىرەدى, بۇل پەرسونالدى جاۋاپكەرشىلىكتى ارتتىرىپ, بيۋدجەتتى رەسمي يگەرۋدى بولدىرمايدى.
عىلىمي جوبالاردىڭ ىسكە اسىرىلۋى مەن قاراجاتتىڭ جۇمسالۋى تۋرالى اقپارات رەسمي رەسۋرستاردا اشىق قولجەتىمدىلىكتە ورنالاستىرىلادى.
تالداۋ قورىتىندىسى بويىنشا وقۋشىلاردى جالعان ەسەپكە الۋ تاۋەكەلدەرى 2 966 مەكتەپتە انىقتالدى. قازىرگى تاڭدا 2 962 مەكتەپكە (99,9%) تسيفرلىق باقىلاۋ جۇيەلەرى ەنگىزىلگەن, بۇل ناقتى وقۋشىلار جوق مەكتەپتەرگە قارجىلاندىرۋ مۇمكىندىگىن جويادى.
ۇلتتىق مەملەكەتتىك عىلىمي-تەحنيكالىق ساراپتاما ورتالىعىندا جاريالانىمدار مەن گرانتتىق جوبالاردىڭ ناتيجەلەرىن اۆتوماتتاندىرىلعان ەسەپكە الۋ ءۇشىن تسيفرلىق شەشىمدەر ەنگىزىلدى. قاتىسۋشىلاردىڭ دەرەكتەرى شيفرلانىپ, مۇددەلەر قاقتىعىسىنىڭ الدىن الۋ قامتاماسىز ەتىلدى.
ساراپشىلاردى كەزدەيسوق تاڭداۋ ءادىسى مەن جاساندى ينتەللەكت ەلەمەنتتەرىن قولداناتىن اۆتوماتتى ىرىكتەۋ مەحانيزمى ەنگىزىلدى.
اتالعان شارالار 2026 جىلعا جوسپارلانعان 270 ملرد تەڭگەدەن استام بيۋدجەت قاراجاتىنىڭ ماقساتتى جۇمسالۋىن قامتاماسىز ەتىپ, باسقارۋدىڭ اشىق جۇيەسىن قالىپتاستىرادى.
اگەنتتىك ءبىلىم جانە عىلىم سالاسىندا زاڭدىلىق پەن ادالدىقتى قامتاماسىز ەتۋ بويىنشا جۇيەلى جۇمىستارىن جالعاستىرا بەرەدى.
