سەنىمگە سونى سەرپىن
كەشە «اقمولا مەديا ورتالىعىندا» اقمولا وبلىسىنىڭ اكىمى سەرگەي كۋلاگين «100 ناقتى قادام» ۇلت جوسپارىنىڭ» اقمولا وبلىسىندا ورىندالۋ بارىسى تۋرالى» تاقىرىبىندا ءباسپاسوز ءماسليحاتىن وتكىزدى. بۇل شاراعا رەسپۋبليكالىق, وبلىستىق, اۋداندىق اقپارات قۇرالدارىنىڭ اككرەديتاتسيالانعان 40 ءجۋرناليسى مەن وبلىستىق باسقارمالاردىڭ, ۆەدومستۆولاردىڭ باسشىلارى قاتىستى.
– مەملەكەت باسشىسى نۇرسۇلتان ءابىش ۇلى نازارباەۆ 2015 جىلدىڭ ناۋرىز ايىندا بەلگىلەگەن بەس ينستيتۋتتىق رەفورمانى باسشىلىققا العان اقمولا وبلىسى ۇستىمىزدەگى جىلدىڭ 1 قاڭتارىنان «100 ناقتى قادام» ۇلت جوسپارىن جۇزەگە اسىرۋدى باستادى, – دەدى سەرگەي ۆيتالەۆيچ. – قازاقستان رەسپۋبليكاسى پرەزيدەنتى جانىنداعى ورتالىق كوممۋنيكاتسيالار قىزمەتىندە جاڭعىرتۋ جونىندەگى ۇلتتىق كوميسسيانىڭ مۇشەلەرى 30 ناۋرىز كۇنى ءباسپاسوز ءماسليحاتىن وتكىزىپ, جالپىۇلتتىق جوسپاردىڭ بارلىق باعىتتارى بويىنشا كەڭىنەن تۇسىنىك بەردى. ەندى سىزدەرگە وڭىرلىك دەڭگەيدەگى اتقارىلعان جۇمىستار تۋرالى بايانداپ بەرۋگە رۇحسات ەتىڭىزدەر.
ءوڭىر باسشىسى ۇلت جوسپارىن جۇزەگە اسىرۋ مىندەتتەرى كەڭىنەن ءارى تياناقتى تۇردە تالقىلانعانىن ايتا كەلىپ, ونىڭ نەگىزگى باعىتتارى بويىنشا جان-جاقتى جانە تولىق اقپارات بەردى. ءبىز ءبىر ساعاتتان استام ۋاقىتتى العان ماجىلىستەگى ماسەلەلەردىڭ بارلىعىن تىزبەلەمەي, جۋرناليستەر قويعان سۇراقتارعا قايتارىلعان جاۋاپتاردى ىرىكتەپ ءسوز ەتۋدى ءجون كوردىك.
ايماق باسشىسىنىڭ ايتۋىنشا, اگرارلىق سەكتور – وڭىرلىك iشكi ءونiمنiڭ جالپى كولەمiنiڭ تورتتەن بiرiن وندiرەتiن وبلىس ەكونوميكاسىنىڭ نەگiزگi سالاسىنىڭ بiرi. سونىمەن قاتار, وڭiردە مال شارۋاشىلىعى دا جاقسى دامىپ وتىر. وبلىستا جالپى قۋاتى 27,6 مىڭ iرi قارا مالعا ارنالعان 31 بورداقىلاۋ الاڭى جۇمىس iستەيدi. بۇلاردىڭ قازiرگi كەزدەگi قۋاتى 65 پايىزدى قۇرايدى. بيىلعى جىلى ەرەيمەنتاۋ اۋدانىنداعى «جاڭا بەرەكە» جشس 3 مىڭ باس iرi قاراعا ارنالعان بورداقىلاۋ الاڭى اشىلماق. سونداي-اق, زەرەندi اۋدانىنداعى «ششۋچە ءسۇت زاۋىتى» جشس قۋاتىن 3 مىڭ باسقا دەيiن ۇلعايتۋ كوزدەلگەن. وتكەن جىلدىڭ قورىتىندىسى بويىنشا وبلىستا ەت ءوندiرiسi 12,1 پايىزعا ارتتى.
«ىرىس» باعدارلاماسىنىڭ اياسىندا جالپى سانى 1200 باس ساۋىن سيىرى بار 14 تاۋارلى-ءسۇت فەرماسى جۇمىس ىستەپ تۇر. وسىنداي قولعا الىنعان شارالاردىڭ ءناتيجەسiندە ءسۇت ءوندiرiسi 28 پايىزعا وسكەن. قاجەتتi جەمشوپ قورى دا جاسالعان.
كوكتەمگi دالا جۇمىستارىنا دايىندىق تا تىڭعىلىقتى ءجۇرگىزىلۋدە. وتكەن جىلعى اۋا رايىنىڭ قولايسىزدىعىنا قاراماستان, وبلىستا ەگiننiڭ ورتاشا شىعىمدىلىعى گەكتارىنا 11,6 تسەنتنەردەن اينالىپ, 4,7 ميلليون توننا استىق جيناپ الىنعان. وسىعان وراي, وبلىستان تىس جەرگە 1,8 ميلليون توننا استىق ەكسپورتقا شىعارىلدى. بيىلعى جىلى اقمولالىق ديقاندار 4,7 ميلليون گەكتار جەرگە ءدان سiڭiرۋدi كوزدەپ وتىر. وعان قاجەتتi 520 مىڭ توننا تۇقىم قورى جاسالىپتى. سونداي-اق, 3,3 ميلليون گەكتار القاپقا نەمەسە ەگiستiكتiڭ جالپى كولەمiنiڭ 75,3 پايىزىنا ىلعال ۇنەمدەۋ تەحنولوگياسى ەنگiزiلەدi. ماشينا-تراكتور پاركiن جوعارى ءونiمدi تەحنيكامەن جاڭارتۋ قارقىندى جۇرگiزiلۋدە, دەدi س.كۋلاگين.
اقمولا وبلىسىندا مەملەكەتتiك-جەكەمەنشiك سەرiكتەستiك اياسىندا 24 ميلليارد تەڭگە كولەمىندەگى 52 جوبانى جۇزەگە اسىرۋ جوسپارلانىپ وتىر ەكەن.
– بiرiنشi كەزەڭدە جەتi جوبانى iسكە اسىرۋدى كوزدەپ وتىرمىز. بۇل تۇرعىدا جەتi بالاباقشانىڭ قۇرىلىسى ەسكەرiلگەن, ياعني بۇل نىساندار بويىنشا قۇجاتتاردىڭ تولىق توپتاماسى دايىندالىپ, ينجەنەرلiك-كوممۋنيكاتسيالار تارتىلدى. ال, قالعان جوبالار ينجەنەرلiك جەلiلەردiڭ دايارلىعىنا قاراي جۇزەگە اسىرىلادى. سونداي-اق, ەۋروپا قايتا قۇرۋ جانە دامۋ بانكiمەن ىنتىماقتاستىق اياسىندا 18 ميلليارد تەڭگەگە تۇرعىن ءۇي-كوممۋنالدىق شارۋاشىلىق سالاسىنداعى ءۇش جوبانى iسكە اسىرۋ جوسپارلانىپ وتىر, – دەدi وبلىس اكىمى.
جۋرناليستەر كوكشەتاۋ قالاسىندا جىلۋ ەلەكتر ورتالىعىن سالۋ ماسەلەسى قاشان شەشىلەتىنى جونىندە سۇراق قويدى. بۇل تۋرالى وبلىس اكىمى يزرايلدiك جانە قىتايلىق كومپانيالار بۇل ماڭىزدى نىساندى سالۋعا نيەت تانىتىپ وتىرعانىن حابارلادى.
– قازىر كوكشەتاۋدا قۇنى 126 ميلليارد تەڭگە بولاتىن جەو-نىڭ قۇرىلىسى بويىنشا ارىپتەس كومپانيالاردىڭ ۇسىنىستارىن قاراستىرۋدامىز. بۇگiندە اتالعان جوبانى جۇزەگە اسىرۋدا يزرايلدiك «ALLENERGYHoldingLTD» كومپانياسى iلگەرi كەلە جاتىر. بۇل كومپانيا كوكشەتاۋدا ەنەرگيا ءوندiرۋ نىسانىن, سونداي-اق, سارىادىر كومiر كەن ورنى ماڭىندا 400 مۆت قۋاتى بار قوسىمشا ەلەكتر ستانساسىن سالۋدى ۇسىندى, – دەدi اكiم.
سونىمەن قاتار, ول قالادا گاز تاراتقىش قوندىرعىلاردى قالپىنا كەلتiرۋ جۇمىستارىنا توقتالدى. سەرگەي ۆيتالەۆيچتىڭ سوزiنە قاراعاندا, كوكشەتاۋدا جالپى ۇزىندىعى 58 شاقىرىمعا سوزىلعان 227 گاز تاراتۋ جەلiسi بار. بۇگiندە 75 قوندىرعى جۇمىس iستەپ تۇرعان كورiنەدi. بيىلعى جوسپاردا 10 جەلiنi قالپىنا كەلتiرۋ قاراستىرىلعان. اتالعان باعدارلاما مiندەتتi تۇردە ورىندالادى, دەدi ول.
ەۋروپا بانكىمەن ىنتىماقتاستىق
اقمولا وبلىسىنىڭ اكىمى سەرگەي كۋلاگين ەۋروپا قايتا قۇرۋ جانە دامۋ بانكىنىڭ وكىلدەرىمەن كەزدەستى.
– ءبىز ەۋروپا بانكىمەن كوممۋنالدىق ينفراقۇرىلىمدى دامىتۋ جانە ەكولوگيانى جاقسارتۋ ماقساتىندا سۋ جانە جىلۋ جۇيەلەرىن ينۆەستيتسيالاۋ ءجونىندەگى جوبالاردى اتقارۋعا مۇددەلەسپىز. مەنىڭ تاپسىرمام بويىنشا كوكشەتاۋ قالاسىنىڭ اكىمدىگى وسى سالالار بويىنشا بانكپەن جۇمىستى بەلسەندى تۇردە باستاپ كەتتى. سونىمەن بىرگە, ءبىز ستەپنوگور, اتباسار, ەرەيمەنتاۋ, دەرجاۆين, ماكين قالالارى مەن ارشالى كەنتىندەگى سۋ جانە جىلۋمەن قامتۋ نىساندارىنىڭ قۇرىلىسى مەن قايتا قۇرىلۋىن سىزدەردىڭ بانك ارقىلى قارجىلاندىرىلۋىنا ۇسىنىس بىلدىرەمىز. ءبىزدىڭ تاراپىمىزدان نەسيەلىك رەسىمدەۋ قۇجاتتارىن دايىنداۋعا قاتىستى جۇمىستار جۇرگىزىلەدى, – دەدى ءوڭىر باسشىسى.
ەۋروپا قايتا قۇرۋ جانە دامۋ بانكى رەسەي جانە ورتالىق ازيا ينفراقۇرىلىمدارى دەپارتامەنتىنىڭ جەتەكشى بانكيرى باحتيار فايزيەۆ ءوز كەزەگىندە قازىرگى كۇنى ۇسىنىلعان بارلىق جوبالاردىڭ قارالىپ جاتقاندىعىن اتاپ ءوتتى. سونىڭ ىشىندە, كوكشەتاۋ قالاسىن سۋمەن قامتۋ جونىندەگى جوبا قاناتقاقتى بولۋى مۇمكىن.
ەۋروپا قايتا قۇرۋ جانە دامۋ بانكى وكىلدەرىمەن كەزدەسۋ بارىسىندا تۇرعىن ءۇي-كوممۋنالدىق شارۋاشىلىق سالاسىن تولىق كولەمدە قارجىلاندىرۋ جونىندەگى وزگە دە جوبالاردىڭ تانىستىرىلىمى وتكىزىلدى.
جاس مامانداردىڭ ايماقتىق بايقاۋى
وبلىستىق فيلارمونيادا «World Skills Kazakhstan» ايماقتىق بايقاۋىنىڭ جەڭىمپازدارىن ماراپاتتاۋ شاراسى بولىپ ءوتتى. وعان وبلىس اۋماعىنداعى كاسىپتىك-تەحنيكالىق ماماندىقتارعا وقىتاتىن وقۋ ورىندارىنىڭ 100-گە تارتا وقۋشىلارى قاتىستى.
ەلباسىنىڭ وتكەن جىلعى قازاقستان حالقىنا جولداۋىندا كاسىپتىك ءبىلىم بەرۋ جۇيەسىن دامىتۋ ماسەلەسىنە جەتە كوڭىل ءبولۋ قاجەتتىگى اتالىپ وتكەن ەدى. بۇگىندە الەمنىڭ 72 ەلىن قامتىپ وتىرعان جۇمىسشى ماماندارى اراسىنداعى «World Skills» بايقاۋىنا قازاقستان 2014 جىلدان قاتىسادى. جۇمىسشى ماماندىعىنىڭ مارتەبەسىن ارتتىرۋعا باعىتتالعان بۇل شارا ءبىزدىڭ ەلىمىزدە دە قىزۋ قولداۋ تاۋىپ وتىر. ءاربىر ەكى جىلدا وتكىزىلىپ تۇراتىن حالىقارالىق جارىسقا ىرىكتەۋ بولىپ سانالاتىن ايماقتىق بايقاۋدا 14 ماماندىق بويىنشا ۇمىتكەرلەر باق سىناستى. ولاردىڭ اراسىندا مەتالل دانەكەرلەۋ تەحنولوگياسى, شاشتاراز ءىسى, كىرپىش قالاۋ, اسپازدىق, مەكتەپكە دەيىنگى بالا تاربيەسى, توكارلىق ءىس, تاعى باسقا بۇگىندە ەڭبەك نارىعىندا ۇلكەن سۇرانىسقا يە ماماندىقتار بار.
وبلىستىق ءبىلىم باسقارماسىنىڭ باسشىسى بالىم ءىزباساروۆا بايقاۋ جەڭىمپازدارىن قۇتتىقتاپ, ارنايى ديپلومدارمەن ماراپاتتادى. ايماقتىق جارىستا جەڭىسكە جەتكەندەر تاياۋ ارادا استانادا وتەتىن رەسپۋبليكالىق بىرىنشىلىككە قاتىساتىن بولادى. ال, وندا جەڭىس تۇعىرىنا كوتەرىلگەندەر بيىل جازدا سان-پاۋلۋدا وتەتىن الەمدىك كونكۋرسقا جولداما الادى.
ەسكە سالا كەتەيىك, وسىدان ەكى جىل بۇرىن وتكەن الەمدىك سايىستا ستەپنوگورلىق كوللەدج وقۋشىسى ادىلەت تاكەجانوۆ «توكارلىق ءىس» اتالىمى بويىنشا ءجۇلدەگەر اتانعان بولاتىن. بۇگىنگى ايماقتىق جارىس قورىتىندىسى بويىنشا رەسپۋبليكالىق جانە الەمدىك كونكۋرستىڭ جۇلدەگەرلەرى تولىعا تۇسەدى دەگەن ءۇمىت ۇيالاتادى.
قورعالجىن – ەكولوگيالىق جانە ەتنوتۋريزمدىك مەكەن
ەلباسى نۇرسۇلتان نازارباەۆ قازاقستان حالقىنا جولداۋلارىندا ەكونوميكامىزدى, مەملەكەتىمىز بەن قوعامدى نىعايتۋدى كوزدەيتىن بەلسەندى باعىتتاردى كۇن تارتىبىنە شىعارىپ كەلەدى. سولاردىڭ قاتارىندا ءتۋريزمدى دامىتۋعا قاتىستى كلاستەرلىك جۇيەنى قالىپتاستىرۋ ايرىقشا تاپسىرما سانالادى. بۇل تۇرعىدا بىرقاتار شارۋالار اتقارىلۋدا. «قازاقستان رەسپۋبليكاسىندا تۋريستىك سالانى دامىتۋدىڭ 2020 جىلدارعا ارنالعان تۇعىرناماسىندا» ەلىمىزدە ءىرى بەس تۋريستىك كلاستەر قۇرۋ جوسپارلانعان. استانا كلاستەرى ەلوردامىز بەن اقمولا وبلىسىن بىرىكتىرەدى. مۇندا قورعالجىن اۋدانى مەن يۋنەسكو تىزىمىندەگى قورعالجىن مەملەكەتتىك تابيعات قورىعى ەرەكشە ورىن الادى.
قورعالجىن قورىعىندا ورنالاسقان ينتەراكتيۆتى ساپار-ورتالىق قازاقستاندىقتار مەن شەتەلدەردەن جىلىنا 2000 ءتۋريستى قابىلدايدى. بۇعان قوسا, 2011 جىلدىڭ قاڭتار ايىندا جەرگىلىكتى بيۋدجەتتەن قارجىلاندىرىلاتىن تۋريستىك-اقپاراتتىق ورتالىق قۇرىلدى. اقپاراتتىق ورتالىقتىڭ سايتىنان 3 تىلدەگى كەز كەلگەن اقپاراتتى الۋعا بولادى. وسىنىڭ ناتيجەسىندە, استانا, قاراعاندى جانە شەتەلدىك تۋريستىك فيرمالارمەن ارىپتەستىك بايلانىستار ورناتىلعان.
ورتالىق ازيادا بالاماسى جوق قورىق اينا كولدەر مەن سايىن دالالىق 543171 گەكتارلىق ەكى ەكوجۇيەنى قامتيدى. قايتالانباس تابيعاتى, جانۋارلار الەمىنىڭ بايلىعىمەن ەرەكشەلەنەتىن تەڭىز-قورعالجىن كولدەرى 1976 جىلى حالىقارالىق رامسار تىزىمىنە, ال 2007 جىلى ءىۆا ورنيتولوگيالىق جۇيەسى ايماعىنا ەنگىزىلگەن. سونداي-اق, نىسان 2008 جىلى يۋنەسكو-نىڭ حالىقارالىق تابيعي مۇرا تىزىمىنە الىنىپ, 2012 جىلدىڭ شىلدەسىنەن قازاقستاننىڭ ءبىرىنشى بيوسفەرالىق رەزەرۆاتى سانالادى. قورىق وسىمدىكتىڭ 60 تۇقىمىنىڭ 374 ءتۇرىن, سۋ مەكەندىلەردى قوسىپ ەسەپتەگەندە, جانۋارلاردىڭ 1400 ءتۇرىن بىرىكتىرەدى. قۇستاردىڭ 347 ءتۇرى كەزدەسسە, ولاردىڭ 60-ى «قىزىل كىتاپقا» ەنگىزىلگەن. قورعالجىن الەمگە بەلگىلى قىزىل قوقيقازداردىڭ مەكەنى ەكەندىگىن بولەكتەپ ايتۋعا بولادى.
– قورعالجىن حالقىمىزدىڭ قوناقجايلىق داستۇرلەرىن كەڭىنەن قامتىعان ايماق, – دەدى بىزبەن اڭگىمەسىندە اۋداندىق كاسىپكەرلىك, ونەركاسىپ جانە تۋريزم ءبولىمىنىڭ باسشىسى گۇلشات قاراعوجينا. – اۋدانىمىزدا جەكەمەنشىك 6 شاعىن قوناقۇي بار. بۇلار ءبىر مەزەتتە 50 ادامعا دەيىن قابىلداي الادى. وسى ورايدا, كلاستەرلىك جوبانىڭ جولاشارى سانالاتىن «پانا» جەكە كاسىپكەرلىگىنە ريزاشىلىعىمىزدى بىلدىرەمىز. قازىر ءبيبىنۇر ءالىمجانوۆا باسقاراتىن قوناقۇي كەشەنى دارەجەسىندەگى نىسان بۇۇ باعدارلاماسىمەن قۇرىلعان ەدى. «اۋىل شارۋاشىلىعىن قارجىلاي قولداۋ قورى» اكتسيونەرلىك قوعامىنان الىنعان 6 ميلليون تەڭگەگە ءوز قارجىسىن قوسقان كاسىپكەر ۇلتتىق ناقىشتا تولىق جابدىقتالعان كوپقاناتتى كيىز ءۇي, ءۇش شاعىن قوناقۇي, اسحانا تۇرعىزدى. تۋريستەر مەن ساياحاتشىلارعا ۇلتتىق تاعامدارىمىز, قىمىز, ايران, ءسۇت ۇسىنىلىپ, وتاعاسى مارات ءالىمجانوۆ ۇيىمداستىرعان «دۋداراي» فولكلورلىق ءانسامبلى قىزمەت كورسەتەدى.
اۋداندا ءىسساپاردا بولعانىمىزدا ءبىز دە وسىندا قونعانبىز. ۇلتتىق كيىمدەگى ءالىمجانوۆتار ىزەتپەن تورگە وزدىرىپ, تاپسىرىستاعى تاعامىڭىز دايىن بولعانشا ەل اڭىزدارىن جاڭعىرتىپ, دومبىرانى كۇمبىرلەتىپ وتىرادى ەكەن. شەتەلدىك قوناقتار كوڭىل جادىراتار شاشۋمەن قارسى الىنادى, ۇلتتىق سالت-داستۇرلەردىڭ كورسەتىلۋى ۇمىتىلماس اسەرگە بولەيدى. قوناقتار دەمەكشى, پىكىر كىتابىنان ەۋروپا, امەريكا, جاپونيا, اۆستراليا, ءتىپتى, جاڭا زەلانديادان كەلگەن تۋريستەردىڭ ءارتۇرلى تىلدە جازعان العىستارىن وقىپ, قايران قالدىق. شەتەلدىكتەر ءالىمجانوۆتاردى ءتۋريزمدى دامىتۋدىڭ رەسۋرستىق سايتىنان تاۋىپ الاتىن كورىنەدى. سونداي-اق, اۋدانعا ۇزاق مەرزىمدى جۇمىس بابىمان كەلگەندەر ءۇش مەزگىل تاماعىمەن ايىنا 35 مىڭ تەڭگە تولەيدى ەكەن.
وڭىرگە تانىمال ازامات ەربول بالتابەكوۆ ءبىرتابان كولىنىڭ ماڭايىنان «بال-مىرزا» ات سپورتى ساۋىقتىرۋ ورتالىعىن پايدالانۋعا بەرىپتى. مۇندا اعاشتان قيىلىپ سالىنعان ەليتالىق ءۇش ءۇيدىڭ جاساۋى كوزدىڭ جاۋىن الادى. جىل بويى جۇمىس ىستەيتىن ورتالىقتا بىرنەشە باعىتتا تۋريستىك-ساۋىقتىرۋ قىزمەتى كورسەتىلەدى.
ساپار بارىسىندا ۇلتتىق كيىم مەن كورپەشە, قالتا, قامزول, تاعى باسقا بۇيىمداردى تىگۋشى رايحان قاسىمنىڭ, اسەم اشەكەي-القالاردى, مونشاقتى سومكەلەردى, سانالۋان گۇلدەردى جاسايتىن گاۋھار قاسىموۆانىڭ شاعىن شەبەرحاناسىنداعى ىجداعاتتى جۇمىسقا ريزا بولدىق.
قورعالجىن اۋداندىق اكىمدىگى مەملەكەتتىك قورىقپەن بىرلەسىپ وتكىزەتىن «قوقيقاز» فەستيۆالى ماڭىزدى وقيعا سانالادى. ءداستۇرلى تۇردە ءارى اۋقىمى كەڭەيىپ وتىرعان شارا تابيعات بايلىعىن ساقتاپ, مولايتۋدا قوعامدىق ىقپالدىڭ كۇشەيۋىنە دە سەپتىگىن تيگىزۋدە. بىلتىرعى فەستيۆال قازاقستان كونستيتۋتسياسىنىڭ 20 جىلدىعى مەن قازاق حاندىعىنىڭ 550 جىلدىعىنا ورايلاستىرىلىپ ۇيىمداستىرىلىپتى. ياعني, «اقمولا وبلىسىنىڭ تۋريستىك كلاستەردى دامىتۋدىڭ 2014-2016 جىلدارعا ارنالعان شەبەرلىك-جوسپارىنداعى» جوبانىڭ ءتاربيەلىك ءتالىمى ارتىپ وتىر دەگەن ءسوز. بۇعان قوسا, فەستيۆال نۇسقاۋشى-گيدتەردىڭ سىناق-دارىسىنە دە اينالعان.
جالپى, اۋدان تۋريستىك باعىتتاعى اۋقىمدى شارالاردى ۇيىمداستىرۋ ورتالىعىنا اينالا باستاعانى دىتتەگەن تۇپكى ماقساتتىڭ ورىندالاتىنىنا سەنىم قالىپتاستىرادى. مۇندا بىلتىر «قورعالجىن برەندى» كادەسىيلار اكتسياسى, قىزىلوردا وبلىستىق كاسىپكەرلىك جانە تۋريزم باسقارماسىنىڭ تاجىريبە الماسۋ سەمينارى, دۇنيەجۇزىلىك تۋريزم كۇنىنە وراي رافتينگ (سۋ ءتۋريزمى) سايىسى وتكىزىلۋى, حالىقارالىق «SES اعا سەنور» ۇيىمىنان گەرمانيالىق تاجىريبەلى ساراپشى گيۋنتەر درەسستىڭ شەبەرلىك ساباعىن وتكىزۋى, بيىل دا وسىنداي شارالاردىڭ جالعاسىپ جاتقانى جاقسى ويلارعا باستايدى. سونداي-اق, ەل تۋريزمىنە ەرەكشە ەكپىن بەرەتىن ەكسپو-2017 كورمەسى قورعالجىندىقتاردىڭ يگى قادامىن ورىستەتە تۇسەتىنى انىق.
قورعالجىن اۋدانى.
بەتتى دايىنداعان «ەگەمەن قازاقستاننىڭ» اقمولا وبلىسىنداعى ءتىلشىسى باقبەرگەن امالبەك.
