بەلارۋستە زەينەتكەرلىك جاس 3 جىلعا ۇزارتىلدى

استانا. 29 ناۋرىز. بەلارۋس رەسپۋبليكاسىندا زەينەتكەرلىك جاس 3 جىلعا ۇزارتىلدى. بۇل تۋرالى ريا «نوۆوستي» اقپارات اگەنتتىگىنە سىلتەمە جاساعان egemen.kz ءتىلشىسى حابارلادى. قازىرگى كەزدە زەينەتكەرلىك جاس ەر ادامدار ءۇشىن 60 جاستان, ال ايەل ادامدار ءۇشىن 55 جاستان باستالادى. وسى اپتادا مەملەكەت پرەزيدەنتى الەكساندر لۋكاشەنكو زەينەتاقى جاسىن ارتتىرۋ ماسەلەسى بويىنشا جيىن وتكىزدى. جيىن سوڭىندا بۇل ءىستىڭ شەشىمى كەلەسى اپتادا قابىلداناتىنىن مالىمدەدى. ال ەڭبەك جانە حالىقتى الەۋمەتتىك قورعاۋ ءمينيسترى مارياننا ششەتكينانىڭ ايتۋىنشا, 2017 جىلدىڭ 1 قاڭتارىنان باستاپ, بىرتىندەپ جارتى جىلدان ۇزارتقان ءتيىمدى. «زەينەتكەرلىك جاس ايەل ادامدار ءۇشىن 58 جاستان, ال ەر ادامدار ءۇشىن 63 جاستان باستالاتىنى تۋرالى شەشىم قابىلداندى. الداعى كۇندەرى وسى ماسەلەگە قاتىستى نورماتيۆتىك اكتىگە قول قويىلادى», – دەدى بەلارۋستىڭ ۆيتسە-پرەمەرى ناتاليا كوچانوۆا. ايان ءابدۋالي. دەرەك, فوتو: ريا «نوۆوستي».