پاكىستاننىڭ لاحور قالاسىندا اسا ءىرى تەررورلىق اكت جاسالدى. قالاداعى ساياباقتا جاسالعان جارىلىس سالدارىنان, سوڭعى مالىمەت بويىنشا, 71 ادام كوز جۇمسا, ونىڭ 25-ءى بالا كورىنەدى. بۇل تۋرالى قىتايدىڭ «سينحۋا» اگەنتتىگى حابارلادى. 300-دەن استام ادام جاراقات العان.
اۋىر جارالانعاندار دا كوپ سەكىلدى. سوندىقتان, قۇرباندىقتار سانى ارتا ءتۇسۋى ىقتيمال دەلىنىپ وتىر. ال جارىلىستى جانكەشتى ساياباققا كىرەبەرىس جەردە جاساپتى. ويتكەنى, بيلەت ساتاتىن كاسسا ماڭىندا كەزەك كۇتكەن ادام كوپ بولعان. لاڭكەستىڭ قازا تاباتىندار كوپ بولسىن دەگەن ماقساتپەن ادەيى سونداي ادامدار كوپ شوعىرلانعان جەردى تاڭداعانى اڭعارىلادى. الدىن الا مالىمەتكە قاراعاندا, تەررورشى 8-دەن 10 كيلوگرامعا دەيىنگى جارىلعىشتى جارعان. جارىلىسقا جاۋاپكەرشىلىكتى «تاليبانمەن» بايلانىسى بار «دجاماات-ۋل-احرارا» لاڭكەستىك توبى ءوز موينىنا الىپتى.
پالميرا قالاسى ازات ەتىلدى
لوندون قالاسىنىڭ مەرى بوريس دجونسون سيريا اسكەريلەرى مەن پرەزيدەنت باشار اسادتى پالميرا قالاسىن ازات ەتكەنى ءۇشىن ماقتاپ, ماداقتادى. سونداي-اق, ول بۇل ۇدەرىستەگى رەسەي مەن پرەزيدەنت ۆلاديمير ءپۋتيننىڭ ءرولىن دە اتاپ ءوتتى. بۇل تۋرالى بريتانيا استاناسىنىڭ باسشىسى «The Telegraph» گازەتىندەگى ءوزىنىڭ باعاناسىندا جازعان.
ب.دجونسوننىڭ جازۋىنشا, اسادتىڭ دا ادام سۇيەر قىلىعى جوق. دەي تۇرعانمەن, «يسلام مەملەكەتى» (قازاقستاندا تىيىم سالىنعان) دەلىنەتىن قانىشەر توپتىڭ قاتالدىعى مەن قانقۇيلىلىعى سەكىلدى جاۋىزدىقتى الەم ءالى كوزبەن كورگەن جوق. وسى سەبەپتى, سيريانىڭ ۇكىمەتتىك اسكەرلەرىنىڭ جەڭىسىنە امالسىز قۋاناسىڭ. لوندون مەرىنىڭ پىكىرىنشە, «يسلام مەملەكەتى» سەكىلدى لاڭكەستىك توپتار جەر بەتىنەن ءتۇپ-تامىرىمەن جويىلۋى ءتيىس.
ءۇندىستاندا جاڭا زىمىران سىنالادى
ۇستىمىزدەگى جىلدىڭ قىركۇيەك ايىندا رەسەي مەن ءۇندىستان بىرلەسىپ جاساعان BrahMos زىمىرانىنىڭ اۆياتسيالىق نۇسقاسى سىناقتان وتكىزىلەدى. بۇل تۋرالى BrahMos Aerospace كونسورتسيۋمىنىڭ اتقارۋشى ديرەكتورى سۋدحير كۋمار ميشرا مالىمدەدى, دەپ حابارلادى رەسەيدىڭ «نوۆوستي» اقپارات اگەنتتىگى.
وتكەن جىلدىڭ ناۋرىز ايىندا سۋ-30 اسكەري ۇشاعىنىڭ كونسترۋكتسياسىنا بىرقاتار وزگەرىس ەنگىزىلىپ, زىمىران تاسىعىشتىڭ قۋاتتىلىعىن ارتتىرۋ كوزدەلگەن بولاتىن. ءسويتىپ, ءۇندىستاننىڭ اتالعان كورپوراتسياسىنىڭ پايدالانۋىنداعى 42 سۋ-30 ۇشاعىن قايتا جاڭعىرتۋ تۋرالى شەشىم قابىلدانىپ وتىر. بۇل ءۇشىن ءۇندىستان تاراپىنان 1,1 ميلليارد دوللار بولىنەدى. BrahMos قاناتتى زىمىرانى ءۇندىستاندا رەسەي تاراپىنىڭ قاتىسۋىمەن جاسالادى.
قىسقا قايىرىپ ايتقاندا:
- الجيردە اسكەري تىكۇشاقتىڭ اپاتى سالدارىنان 12 ادام قازا تاۋىپ, 2-ەۋى جارالانعان. الدىن الا مالىمەت بويىنشا, اپاتقا تەحنيكالىق اقاۋ سەبەپ بولعان. الجير قارۋلى كۇشتەرى شتابىنىڭ باستىعى اپات بويىنشا تەكسەرۋ جۇرگىزۋدى تاپسىردى.
- اعىلشىننىڭ «The Independent» گازەتى سيريانىڭ پالميرا قالاسىنىڭ ازات ەتىلۋىن ۇندەمەي قارسى العان اقش پرەزيدەنتى ب.وباما مەن ۇلىبريتانيا پرەمەرى د.كەمەروندى سىن تەزىنە الدى. باسىلىمنىڭ ۇستانىمىنشا, ەۋروپانى دىرىلدەتكەن لاڭكەستەردىڭ جەڭىلىسىنە ۇنسىزدىك تانىتۋ – مۇلدەم جاراسپايتىن قىلىق.
- رەسەيدىڭ «اەروفلوت» اۋە كومپانياسى قازاقستان كولىك جانە كوممۋنيكاتسيا مينيسترلىگىنىڭ ازاماتتىق اۆياتسيا كوميتەتى ءتيىستى رۇقسات بەرگەننەن كەيىن قازاقستانعا ۇشۋلارىن قايتا قالپىنا كەلتىرەتىن بولدى. تۇراقتى ۇشۋلار رۇقسات بەرۋ مەرزىمى اياقتالعان 26 ناۋرىز كۇنى تۇستەن كەيىن توقتاتىلعان ەدى.
- رەسەيدىڭ چەليابى وبلىسىندا 6 جاسار بالانىڭ اناسى ۇلىم جۇماققا بارادى دەگەن كورسوقىرلىقپەن ونى ولتىرۋگە بارعان. ايەلدىڭ سوزىنە قاراعاندا, تۇندە ول بالاڭ جۇماقتا بولۋى ءتيىس دەگەن داۋىستار ەستىپتى-ءمىس. تەكسەرە كەلگەندە, ايەلدىڭ ماريحۋانا قولدانعانى بەلگىلى بولعان. وعان قارسى قىلمىستىق ءىس قوزعالىپتى.
سەگىز نەمەرە-جيەنى بار ۇمىتكەر
اقش پرەزيدەنتتىگىنە كانديدات دونالد ترامپ كەزەكتى مارتە اتا اتانعان. بۇل تۋرالى «اسسوشيەيتەد پرەسس» اگەنتتىگى حابارلادى. دجارەد كۋشنەرمەن نەكەدە تۇرعان ميللياردەردىڭ قىزى يۆانكا ترامپ ومىرگە ءۇشىنشى ءسابيىن اكەلگەن. جالپى العاندا, بۇل پرەزيدەنتتىكتەن ۇمىتكەردىڭ 8-ءشى نەمەرەسى ەكەن.
يۆانكا ترامپ – كاسىپكەر, فوتومودەل جانە جازۋشى كورىنەدى. دونالد ترامپتىڭ بەس بالاسىنىڭ ءبىرى. ال يۆانكا ترامپ ومىرگە بالا اكەلگەندەرى ءۇشىن جۇبايى دجارەد كۋشنەر ەكەۋى وتە باقىتتى ەكەندىكتەرىن ايتىپ وتىر. ال كۋشنەردىڭ نەمەن اينالىساتىنى تۋرالى بۇل اقپاراتتا ەشتەڭە ايتىلمايدى. 69 جاستاعى دونالد ترامپ ەكى رەت ۇيلەنگەن. العاشقى نەكەسىنەن ءۇش بالا سۇيسە, 45 جاستاعى ەكىنشى ايەلىنەن ەكى بالاسى بار.
تۋريست تارتۋدىڭ جاڭا امالى
ۆەتنام بيلىگى رەسەيدەن تۋريستەر تارتۋعا شەشىم قابىلدادى. ول ءۇشىن رەسەيلىكتەرگە سوعىس بولعان جەرلەرگە ەكسكۋرسيا جاساتپاق. ۆەتنام تۋريزم كوميتەتى باسشىسىنىڭ ورىنباسارى نگۋەن كۋوك حانگتىڭ سوزىنە قاراعاندا, ۆەتنامداعى 60-70-جىلدارداعى سوعىستا كسرو ۇلكەن كومەك كورسەتكەن.
سوندىقتان, دەيدى نگۋەن كۋوك حانگ, سوعىس بولعان جەرلەردى كوزدەرىمەن كورۋگە قىزىعۋشىلىق تانىتاتىن رەسەيلىكتەر از بولماۋى ءتيىس. بۇدان بولەك, ۆەتنام رەسەيلىك تۋريستەرگە شىعىس مەديتسيناسى بويىنشا قىزمەت ۇسىنا الادى. تۋريستەر ءۇشىن 2015 جىلدىڭ جەلتوقسانىنان باستاپ فۋكۋوك ارالىندا اڭ-قۇستىڭ 540 ءتۇرى بار وڭتۇستىك-شىعىس ازياداعى العاشقى جانە جالعىز سافاري-پارك جۇمىس ىستەي باستاعان. شەتەلدىكتەرگە وسىنىڭ ءوزى ۇلكەن قىزىعۋشىلىق تۋدىراتىن جايت بولسا كەرەك.
كۋشاناشۆيليگە ۋكراينادا ورىن جوق
ۋكراينانىڭ قاۋىپسىزدىك قىزمەتى رەسەيلىك جۋرناليست وتار كۋشاناشۆيليدىڭ ۋكرايناعا كىرۋىنە تىيىم سالدى. تىيىم مەرزىمى – 3 جىل. بۇعان دەيىن ۋكراينا جوعارعى راداسىنىڭ دەپۋتاتى مۇستافا نايەم كۋشاناشۆيليگە قاتىستى وسىنداي شارا قولدانۋ قاجەت دەگەن تۇرعىدا ماسەلە كوتەرگەن ەكەن.
م.نايەم – ۋكراينا پرەزيدەنتى پەتر پوروشەنكونىڭ بلوگىنان دەپۋتات. ونىڭ مۇنداي ماسەلە كوتەرۋىنىڭ سەبەبى, شەتەل ازاماتى بوتەن مەملەكەت – ۋكراينا پرەمەر-ءمينيسترىنىڭ اشىق تۇردە ار-نامىسىنا تيگەن. ءوزىنىڭ سوزىنە ايعاق رەتىندە م.نايەم رەسەيلىك ءجۋرناليستىڭ تەلەارنا ەفيرىنەن ايتقان مىنا ءسوزىن كەلتىرەدى: «مەن بارماقشى بولىپ وتىرعان ەل پرەمەر-ءمينيسترىنىڭ تەك ءبىر كوز سالىسى عانا ەلدەگى پسيحوپاتيا دەڭگەيىنىڭ وتە جوعارى ەكەنىن بىلدىرەتىن سەكىلدى».
ينتەرنەت ماتەريالدارى نەگىزىندە ازىرلەندى.
