ءۇيىن مۇراجايعا اينالدىرعان

پەتروپاۆل قالاسىنىڭ تۇر­عىنى ۆيكتور نيكونوۆتىڭ ءۇيى كىرسە شىققىسىز, ەرىكسىز تاڭداي قاقتىرادى. بەينەبىر ەرتەگىلەر ەلىندە جۇرگەندەي عاجايىپ اسەرگە بولەنەسىڭ. ول وتە سيرەك كەزدەسەتىن, بۇگىندە تابىلمايتىن قۇندى زاتتاردى بالا كەزىنەن  تىرنەكتەپ جيناۋمەن اينالىسقان. سودان بەرى ارادا جارتى عاسىر زۋلاپ وتسە دە, سۇيىكتى ىسىنەن قول ۇزگەن ەمەس. بۇگىندە ونىڭ كوللەكتسياسىندا XVII-XIX عاسىرلاردىڭ تاريحي جادىگەرلەرى مولىنان كەزدەسەدى. ەكى بولمەلى باسپا­نانىڭ ءىشى كونە ساعات, توسەك, ساماۋرىن, تاعى باسقا تۇرمىستىق زاتتارعا ءيىن تىرەسىپ تۇر. اسپالى شام, ءۇي جيھازدارىنا دەيىن ەسكىلىكتىڭ كوزىندەي جىلى ۇشى­رايدى. ماسەلەن, تۇتاس قابىرعانى الىپ تۇرعان ەمەن شكاف اتاقتى ورىس جازۋشىسى ا.چەحوۆپەن قۇرداس كورىنەدى. ءبىرىنشى پەتر پاتشانىڭ تۇسىندا شىعارىلعان كۇمىس با­قىردى پەتروپاۆل قالاسىنىڭ ماڭايىنان تاۋىپ العان. قۇندى اقشانىڭ ءبىرى – ءسىبىردىڭ 10 تيىنىنا قازبا جۇمىستارى كەزىندە كەزىككەن. ونى 150 مىڭ تەڭگەگە ساۋدالاۋشىلار تابىلعانىمەن, ساتۋعا قيماعان. ۆيكتور فەدوروۆيچتىڭ قولى التىن: كەز كەلگەن زاتتى قايتا قالپىنا كەلتىرە الاتىن ىسمەرلىگى بار. كەرەۋەت, اينا, شكاف, اسپاشام, ورىندىقتاردىڭ توزىعى جەتكەندەرىن ءوزى جاماپ-جاسقاپ الادى. ءومىر بويى تىرنەكتەپ جيناعان ەڭبەگىنىڭ شاشاۋ شىقپاۋىن, جيناقى تۇرعانىن قالايدى. ۆيكتور ارحەولوگيالىق قازبا جۇمىسى ەكسپەديتسيالا­رىنا, ءتۇرلى ساياحاتتارعا دا ءجيى شىعىپ, مۇراجاي قورىن تولىقتىرىپ وتىرۋدى ادەت ەتكەن. پەتروپاۆل قالاسىنا قاتىس­تى ەسكى سۋرەتتەر – ءوز الدىنا ءبىر توبە. ءومىر ەسقالي, «ەگەمەن قازاقستان». سولتۇستىك قازاقستان وبلىسى.