مەملەكەت باسشىسى پاكىستان پرەزيدەنتىنە كوڭىل ايتۋ جەدەلحاتىن جولدادى

استانا. 28 ناۋرىز. قازاقستان پرەزيدەنتى نۇرسۇلتان نازارباەۆ لاحور قالاسىندا بولعان تەررورلىق اكتىگە بايلانىستى پاكىستان پرەزيدەنتى مامنۋن حۋسەينگە كوڭىل ايتۋ جەدەلحاتىن جولدادى. بۇل تۋرالى akorda.kz-كە سىلتەمە جاساعان egemen.kz ءتىلشىسى حابارلادى. جەدەلحاتتا كوپتەگەن جازىقسىز ادامداردىڭ قازا بولعانى جانە زارداپ شەككەنى تۋرالى قايعىلى حاباردى قازاقستان پرەزيدەنتىنىڭ زور كۇيزەلىسپەن قابىلداعانى اتاپ وتىلگەن. نۇرسۇلتان نازارباەۆ قازا بولعانداردىڭ باسىم كوپشىلىگى ايەلدەر مەن بالالار ەكەنىن, بۇل جاعدايدىڭ ەشكىمدى بەي-جاي قالدىرماعانىن ايتتى. «قازاقستان بۇكىل الەمدەگى قاۋىپسىزدىك پەن بەيبىتشىلىككە زور قاتەر ءتوندىرىپ وتىرعان حالىقارالىق ەكسترەميزم مەن تەرروريزم ارەكەتتەرىن ءۇزىلدى-كەسىلدى ايىپتايدى. لاحورداعى جانتۇرشىگەرلىك وقيعا قاتىگەز راديكالدى توپتار مەن ولاردىڭ يدەولوگياسىنا وركەنيەتتى قوعامدا ورىن جوق ەكەنىنە تاعى دا كوز جەتكىزدى», – دەلىنگەن جەدەلحاتتا. سوڭىندا نۇرسۇلتان نازارباەۆ قازا بولعانداردىڭ وتباسىلارى مەن تۋعان-تۋىستارىنا, سونداي-اق, بارشا پاكىستان حالقىنا جەكە ءوزىنىڭ جانە قازاقستان حالقىنىڭ اتىنان كوڭىل ايتىپ, زارداپ شەككەندەردىڭ تەزىرەك ساۋىعىپ كەتۋىنە تىلەكتەستىگىن ءبىلدىردى. تالعات رايىمبەك. دەرەك, سۋرەت: akorda.kz.