استانا. 26 ناۋرىز. بۇگىن فۋتبولدان قازاقستان قۇراماسى ازەربايجانمەن جولداستىق كەزدەسۋ وتكىزىپ, 1:0 ەسەبىمەن جەڭىسكە جەتتى. ماتچ تۇركيانىڭ انتاليا قالاسىندا ءوتتى. بۇل تۋرالى egemen.kz ءتىلشىسى حابارلادى.
ويىندى ءبىزدىڭ جىگىتتەر شيراق باستادى. بىردەن دوپقا يەلىك ەتكەن قازاقستاندىقتار بار بولعانى 8-مينۋتتا ەسەپ اشىپ ۇلگەردى. اتاپ ايتقاندا, سەرىكجان مۇجىقوۆ پەن باۋىرجان يسلامحاننىڭ ۇيىمداستىرعان شابۋىلىنا ماقسات بايجانوۆ ناتيجەلى نۇكتە قويىپ, گولدىڭ اۆتورى اتاندى.
گولدان قاناتتانعان جەرلەستەرىمىز بۇدان كەيىن دە بىرنەشە شابۋىل ۇيىمداستىردى. الايدا, ولار شەشۋشى ساتتەردە ءمۇلت كەتىپ, ەسەپتى ەسەلەۋ مۇمكىندىگىن پايدالانا المادى.
ءوز كەزەگىندە ازەربايجان قۇراماسىنىڭ ويىنشىلارى تارازى باسىن تەڭەستىرۋدى كوزدەگەنىمەن, ۇزىلىسكە دەيىن ول ويلارىن جۇزەگە اسىرا المادى.
ەكىنشى تايمدى قوس كوماندا دا وتە بەلسەندى باستادى. ءتىپتى, 56-مينۋتتا سەرگەي حيجنيچەنكودا ەسەپتى ەسەلەيتىن تاماشا مۇمكىندىك بولعانىمەن, ونىڭ قاقپاعا باعىتتاعان دوبى نىسانادان قيىس كەتتى. ارتىنشا ماقسات بايجانوۆ دۋبل اتانۋ مۇمكىندىگىن ءمۇلت جىبەردى. ونىڭ جولىنا ازەربايجان قاقپاشىسى كيامران اگاەۆ توسقاۋىل بولدى.
ويىن سوڭىنا دەيىن قارسىلاستار الما-كەزەك شابۋىلداعانىمەن, ەسەپ وزگەرگەن جوق. جاتتىقتىرۋشىلاردىڭ ويىنعا وزگەرىس ەنگىزبەك بولىپ, جاساعان قادامدارى دا ەش ناتيجە الىپ كەلمەدى. وسىلايشا قازاقستان قۇراماسى جەڭىسكە جەتىپ, فۋتبولشىلارىمىز وتاندىق جانكۇيەرلەردى ءبىر قۋانتتى.
ايتا كەتەيىك, وتكەن جىلدىڭ جەلتوقسان ايىندا يۋري كراسنوجان قىزمەتىنەن كەتكەلى بەرى فۋتبولدان ۇلتتىق قۇرامامىزدىڭ باس جاتتىقتىرۋشىسى ءالى تاعايىندالعان جوق. سول سەبەپتى, بۇگىنگى ويىنعا باس كوماندامىزدى تالعات بايسۋفينوۆ پەن نۇركەن مازباەۆ باستاپ شىقتى. سونداي-اق, جاتتىقتىرۋشىلار قۇرامىندا اندرەي فەراپونتوۆ پەن يۋري نوۆيكوۆ بار. بۇل مامانداردىڭ جەتەكشىلىگىمەن قازاقستان 29 ناۋرىز كۇنى تاعى ءبىر جولداستىق كەزدەسۋ وتكىزەدى. اتالعان سىندا فۋتبولشىلارىمىز گرۋزيا قۇراماسىمەن شەبەرلىك بايقاسادى. ودان بولەك, بۇگىنگى ويىن ۇلتتىق قۇرامامىزدىڭ 2016 جىلعى ءبىرىنشى رەسمي كەزدەسۋى ەكەنىن اتاپ وتكەن ءجون
قازاقستان – ازەربايجان 1:0
26 ناۋرىز. انتاليا, تۇركيا. «گلوريا سپورت ارەنا» ستاديونى.
تورەشىلەر: الي پالابييك, دجەيحۋن سەسيگيۋزەل, كەرەم ەرسوي ء(بارى دە – تۇركيا).
قازاقستان: ستاس پوكاتيلوۆ, ەلدوس احمەتوۆ, يۋري لوگۆينەنكو, سەرگەي مالىي, دميتري شومكو, ماقسات بايجانوۆ (يسلامبەك قۋات 60), باۋىرجان يسلامحان (ازات نۇرعاليەۆ 64), ۇلان قونىسباەۆ (تيمۋر دوسماعامبەتوۆ 67), سەرىكجان مۇجىقوۆ (گافۋرجان سۇيىمباەۆ 75), سامات سماقوۆ (اسحات تاعىبەرگەن 88), سەرگەي حيجنيچەنكو (الەكسەي ششەتكين 71).
ازەربايجان: كيامران اگاەۆ, باداۆي گۋسەينوۆ, اريف داشداميروۆ, ماكسيم مەدۆەدەۆ (ماگومەد ميرزابەكوۆ 46), راشاد سادىگوۆ (تارلان گۋليەۆ 46), اراز ابدۋللاەۆ (ەلۆين مامەدوۆ 69), گارا گاراەۆ ( رۋسلان ابىشوۆ 73), افران يسمايلوۆ (ناميك الەسكەروۆ 61), دميتري نازاروۆ, اگابالا رامازانوۆ (دجاۆيد تاگيەۆ 46), رۋسلان گۋربانوۆ.
گول: ماقسات بايجانوۆ 8.
ەسكەرتۋ: يسلامبەك قۋات 86.
ەلامان قوڭىر.
دەرەك: egemen.kz.
سۋرەت: vesti.kz.
