جامبىل وبلىسىندا 3400 گەكتار جەرگە سەكسەۋىل تۇقىمدارى سەبىلدى

تاراز. 24 ناۋرىز. بۇگىندە جامبىل وبلىسىنداعى ورمان قورىنىڭ جالپى اۋماعى 4,4 ملن. گەكتار. ونىڭ ورماندى جەرلەرى 2,2 ملن. گەكتار. بۇل تۋرالى egemen.kz ءتىلشىسى حابارلادى. جالپى ورمان قورى جەرلەرى وبلىس اۋماعىنىڭ 31 پايىزىن الىپ جاتىر. وتكەن جىلى وسى سالاعا جەرگىلىكتى بيۋدجەتتەن بولىنگەن 703 ملن.تەڭگە تولىق يگەرىلدى. ونىڭ ىشىندە مەكەمەلەردى ۇستاۋعا 561 ملن. تەڭگە, ولارعا تەحنيكالار مەن جابدىقتار الۋعا 45 ملن.تەڭگە, ورتكە قارسى شارالار جۇرگىزۋگە 32 ملن.تەڭگە جۇمسالدى. ورمان تۇقىمباقتارىن قالپىنا كەلتىرۋگە جانە ورمان اعاشتارىنىڭ كوشەتتەرىن وسىرۋگە 14,5 ملن. تەڭگە ءبولىندى. «2015 جىلدىڭ ەرتە كوكتەمىندە ورمان قورى اۋماعىنا سەكسەۋىل جانە تاعى باسقا ورمان كوشەتتەرى ارقىلى 1600 گەكتارعا جاڭادان ورمان اعاشتارى وتىرعىزىلدى. كۇزدە 3400 گەكتارعا سەكسەۋىل القاپتارىن تۇقىمدارى ارقىلى سەبۋ جۇمىستارى جۇرگىزىلدى. كۇزگى ساناقتىڭ ناتيجەسى بويىنشا 4560 گەكتار جەر ورمان كومكەرگەن القاپقا اۋىستىرىلدى. 2016 جىلى ورمانداردى قالپىنا كەلتىرۋ جانە جاڭادان ورمان ءوسىرۋ شارالارىن ىسكە اسىرۋعا 43,3 ملن تەڭگە ءبولىندى. بولىنگەن قارجىنىڭ ەسەبىنەن ەرتە كوكتەمدە ورمان قورى اۋماعىنا سەكسەۋىل جانە تاعى باسقا ورمان كوشەتتەرى ارقىلى – 900 گەكتار جەرگە جاڭادان ورمان اعاشتارى وتىرعىزۋ, كۇزدە 4100 گا كولەمدە سەكسەۋىل القاپتارىن تۇقىمدارى ارقىلى سەبۋ جۇمىستارىن جۇرگىزۋ جوسپارلانىپ وتىر», دەيدى وڭىرلىك كوممۋنيكاتسيالار قىزمەتىندە وتكەن بريفينگتە جامبىل وبلىسى اكىمدىگىنىڭ تابيعي رەسۋرستار جانە تابيعاتتى رەتتەۋ باسقارماسى باسشىسىنىڭ ورىنباسارى جاسۇلان حاناليەۆ. وڭىردەگى ورمانداردى قورعاۋ, ولاردىڭ قورىن مولايتۋ جانە جاڭادان ورمان ءوسىرۋ شارالارىمەن 14 ورمان شارۋاشىلىعى مەكەمەلەرى مەن «ورمانداردى قورعاۋ جەدەل قىزمەتى» اينالىسادى. ورالحان ءداۋىت. دەرەك, سۋرەت: egemen.kz