ديپلوماتيالىق فورۋمدا ەل پرەزيدەنتى جاھاندىق احۋالعا قاتىستى پىكىر ءبىلدىرىپ, الىمدىك ساياساتتىڭ تۇراقتىلىعىندا كوسباسشىلىق قاسيەتتەردىڭ اسا ماڭىزدى ەكەندىگىن اتاپ ءوتتى.
«جاھاندىق كوشباسشىلار, الەمنىڭ ءار قيىرىنداعى جەكەلەگەن مەملەكەتتەردىڭ جەتەكشىلەرى, ەڭ الدىمەن, حالىقارالىق قاۋىپسىزدىك پەن بەيبىتشىلىك ماسەلەلەرىنە جاۋاپكەرشىلىكپەن قاراۋى قاجەت دەپ سانايمىن. قازىرگى ساتتە ستراتەگيالىق ۇستامدىلىق وتە ماڭىزدى. مەنىڭ ويىمشا, بۇگىنگى كۇردەلى ءارى قاراما-قايشىلىققا تولى الەمدەگى شيەلەنىستەردىڭ ءتۇيىنىن تارقاتۋ اسا قيىن ەمەس. جاي عانا جاۋاپكەرشىلىك تانىتىپ, سابىرلى بولۋ قاجەت», دەدى قازاقستان پرەزيدەنتى.
مەملەكەت باسشىسى تاياۋ شىعىستاعى احۋالعا قاتىستى احۋالعا دا توقتالدى. پرەزيدەنت كەلىسسوزدەر بارىسىندا باستى ماسەلەلەرگە دەن قويۋ كەرەكتىگىن اتاپ ءوتتى.
مەملەكەت باسشىسى انتاليا ديپلوماتيالىق فورۋمىنىڭ پانەلدىك سەسسياسىنا قاتىستى
«الەمدە ورىن العان جاعدايلارعا بايىپپەن قاراۋعا كەڭەس بەرەر ەدىم. ماسەلەن, ءبارى يراندى تالقىلاپ جاتىر. ارينە, بۇل ەلدەگى احۋال وتە كۇردەلى. وعان قاتىستى قانداي دا ءبىر پىكىر ايتۋ قيىن. قازاقستان شىعاناقتاعى ەلدەرگە تىلەكتەستىگىن ءبىلدىردى. ءبىز تاراپتاردى ستراتەگيالىق ۇستامدىلىققا جانە اسكەري ءىس-قيمىلدى توقتاتۋعا شاقىردىق. بۇل قاقتىعىستىڭ اۋىر سالدارىن ءبارى سەزىندى. ەڭ اۋەلى ەكونوميكا قۇلدىرادى. بۇگىندە ورمۇز بۇعازىندا كەمەلەردىڭ ەركىن جۇزۋىنە قويىلعان توسقاۋىل تۋرالى ايتىلىپ جاتىر. بىراق ءدالىزدىڭ قاقتىعىسقا دەيىن ەركىن ساۋدا جاساۋعا اشىق بولعانىن ەسكەرۋ قاجەت. سوندىقتان ماسەلەنىڭ مانىنە ۇڭىلگەنىمىز ءجون», دەدى قاسىم-جومارت توقاەۆ.
سونداي-اق جيىندا مەملەكەت باسشىسى بىرىككەن ۇلتتار ۇيىمىن رەفورمالاۋ, حالىقارالىق ينستيتۋتتاردى جەتىلدىرۋدىڭ ماڭىزدىعىنا توقتالدى.
نۇربولات امانبەك
