استانا. 24 ناۋرىز. وسى كۇندەرى قازاقستان قارۋلى كۇشتەرىنىڭ وفيتسەرلەرى افريكانىڭ باتىس ساحاراسى مەن كوت-د’يۆۋار ەلدەرىندە بۇۇ-نىڭ بىتىمگەرشىلىك ميسسياسىنا قاتىسىپ جاتىر. بۇل تۋرالى egemen.kz ءتىلشىسى حابارلادى.
قازاقستان اسكەريلەرى جەرۇستى جانە اۋەدەن پاترۋلدەۋ, تۇنگى باقىلاۋ بەكەتىن ۇيىمداستىرۋ جۇمىستارىمەن اينالىسۋدا.
بۇل ميسسياعا 30-دان اسا ەلدىڭ وكىلدەرى قاتىسۋدا. اسكەري قىزمەتشىلەردىڭ ايتۋىنا قاراعاندا, ميسسيالارداعى قيىندىقتار تەك قانا كليماتپەن بايلانىستى. ءشول دالاداعى قاپىرىق, باعدارلار, جوعارى تەمپەراتۋرالىق رەجىمدەر – مۇنىڭ بارلىعى كەي كەزدە پاترۋلدەۋگە قيىندىق تۋعىزادى.
نەگىزگى تاپسىرمامەن, ياعني, بەلگىلەنگەن جاۋاپكەرشىلىك ايماقتارىن پاترۋلدەۋمەن قاتار, ولار مالىمەت جيناۋ جانە تالداۋمەن اينالىسادى, اسكەري ۋاعدالاستىقتى ساقتاۋ مونيتورينگىسىن جۇرگىزەدى.
قر قك باس شتابى جاۋىنگەرلىك دايارلىق دەپارتامەنتىنىڭ مالىمەتىنە قاراعاندا, بۇگىندە باتىس ساحاراسى (MINURSO) مەن كوت-د’يۆۋارداعى (UNOCI) بۇۇ-نىڭ بىتىمگەرشىلىك ميسسياسىنا جەتى قازاقستاندىق وفيتسەر قاتىسىپ جاتىر.
داستان كەنجالين.
دەرەك, سۋرەت: قورعانىس مينيسترلىگىنىڭ ءباسپاسوز قىزمەتى.
