ساڭلاقتار سامعاۋى

كونگرەسس-حوللدا قازاقستاننىڭ ەڭبەك سىڭىرگەن ءارتىسى رامازان ستامعازيەۆ پەن بەلگىلى ەسترادا ءانشىسى ۇلتۋ قاباەۆانىڭ «ايتتىم سالەم, ساعىنىپ» اتتى كونتسەرتى ءوتتى. نەسىن ايتاسىز, سالقار استانا اسپانىن سيقىرلى ساز كەرنەگەن كەش بولدى بۇل. ونەردىڭ ەگىز ورىمىندەي جۇلدىزدى جۇپتىڭ جۇرتشىلىققا ۇسىنعان باعدارلاماسى وزىندىك ەرەكشەلىكتەرىمەن ورنەكتەلدى. القالاعان الەۋمەتتىڭ قوشەمەت-قولپاشىمەن ارقالانعان قوس ساڭلاق ساحنادا كەزەك سامعاپ, كورەرمەن كوڭىلىن كوككە ورلەتتى. قاسيەتتى ءحانتاڭىرىنىڭ باۋ­رايىندا كىندىك قانى تامعان تۋما تالانتتىڭ ءاۋ باستا جەتىسۋ جەلدىرمەلەرىمەن اۋىزدانعانى, ارينە, زاڭدىلىق. بالا جاسىنان ءسۇيىنباي, جامبىل, كەنەن, كودەك جىرلارىمەن سۋسىنداعانى تاعى تالاسسىز. كەيىن ەسەيە كەلە التايدان اتىراۋعا دەيىنگى ارالىقتاعى ۇلتى­مىز ۇلىقتاعان ۇلىلاردى وزىنە ۇلگى-ونەگە تۇتىپ, تانىن, تالعام ءورىسىن كەڭەيتتى. قازىر قازاق­ستاننىڭ قاي جەرىنە بارسا دا سول ولكەنىڭ ارعى-بەرگىدەگى دۇلدۇلدەرى مەن بۇلبۇلدارىنىڭ بۇرىنعى-سوڭعى اندەرىن «اتتىلى ءتۇسىپ, جاياۋ جاتىپ» تىڭداعانداي دەڭگەيگە جەتكىزىپ, ۇلكەن قۇرمەتكە بولەنىپ جۇرگەنى, ءسىرا, سوندىقتان شىعار. اتاقتى ديريجەر ايتقالي جايىموۆ جەتەكشىلىك ەتەتىن ەلوردا فيلارمونياسىنىڭ ۇلت اسپاپتار وركەسترىنىڭ سۇيەمەلدەۋىمەن ءان اۋەلەتكەن رامازاننىڭ «قۇلاقتان كىرىپ, بويدى الار» قوڭىر داۋىسى بىردە قالىقتاپ, بىردە شارىقتاپ تىڭدارماننىڭ تولقىمالى-شالقىمالى سەزىم پەرنەلەرىن تەرەڭنەن تەربەپ جىبەردى. كەزىندە جانىبەك كارمەنوۆ, قايرات بايبوسىنوۆ سەكىلدى تۇ­عى­رى بيىك تۇلعالاردان ءتالىم-تاربيە العان ول, اسىرەسە, اتادان ميراس اسىل مۇرالارىمىز – حا­لىق اندەرىن ورىنداعاندا, التى الاشتىڭ ارداعىنا اينالعان اقان, ءبىرجان, جاياۋ مۇسا, مۇ­حيت, عازيز, اسەت جانە باسقا اق­­پا-توك­پە اقىندارىمىز بەن سال-سەرىلەرىمىزدىڭ ساف التىنداي شىعارمالارىن شىرقاعاندا ەر­كىڭنەن تىس ەلىرە دەگبىرىڭ كەتىپ, دەلەبەڭ قوزىپ «ءاپ, بارەكەلدى!» دەمەسكە ءاددىڭىز قالماسىنا ءبىز كەپىل. ال ەندى «اعاش اياقتى» اڭى­راتقاندا پاڭ ءپاريجدى «پاي-پايلاتقان» ايگىلى امىرە ءۇردىسىنىڭ ءالى ۇزىلمەگەنىنە ءۇنسىز شۇكىرشىلىك ەتەسىز. بالۋان شولاقتىڭ «عاليا­سىن» باياۋلاتا باستاپ, بارا-بارا باستىرمالاتا جونەلگەندە زالداعى جىگىت-جەلەڭنىڭ بويىن جەلىك بۋىپ, بايىپتى اعالاردىڭ باياعى «ەل قىدىرعان ەسەر شاعى» ەرىكسىز ەستەرىنە تۇسكەنى انىق. ارقانىڭ اقتاڭگەرىن سۇيسىندىرگەن سۇلۋ ومىردە بولعان ادام. اقمولادا تالايدى تامساندىرعان قىمىزشى قىز. ءبىراز باسىلىمداردا سۋرەتى جاريالانعانى بار. سۇيەگى استانا قالاسىنداعى «جاس­تار» شاعىن اۋدانىندا ورنالاسقان مۇسىلماندار زيراتىندا جەرلەنگەن. «ءانشى جوق قاراوتكەلدە مەنەن اسقان» دەپ اسقاقتاعان عازي­زىڭىز دە وسى ءوڭىردىڭ تۋماسى. را­ما­زان رەپەرتۋارىنداعى ونىڭ بۇل ءانىن جاستايلارىنان جاتتاپ وسكەن بايىرعى اقمولالىقتار باسقالاردان گورى جىلىراق قابىل­داعانى تولاسسىز. دارا دارىن يەسى كوپشىلىك اسىعا كۇتكەن «داريعا – ءداۋ­رەن­گە» كەزەك تيگەندە قياعا قا­نات قاققان قىرانداي قۇلاشىن كەڭگە سەرمەدى. «ون ەكى ۆزۆود داۋ­ىسىن» ەركىن ءجى­بەرىپ, ەلدى ءسىلت­ىدەي تىندىردى. اركىم ءوز ويىمەن اۋرە. ءبارى ءبىر ءسات ءومىر­دىڭ وتكىن­شى ەكەندىگىندەي, ءدۇر­­مەككە  تو­لى  دۇنيەنىڭ جالعاند­ى­­عىن ۇق­قانداي... مەملەكەتتىك سىيلىقتىڭ لاۋرەاتى نەسىپبەك ايتوۆتىڭ سوزىنە جازىلعان تۇرسىنجان شاپايدىڭ وسىناۋ ورنى بولەك ءانىن الدەبىر سەبەپتەرمەن تىڭداماي كەتسەك, قۇلاق قۇرىشىمىزدىڭ قانباي قالارى ءسوزسىز ەدى. كونتسەرتتىك كەشتە ر.ستام­عا­زيەۆ, سونداي-اق, بۇرىن اتى-جوندەرى كوپ ەستىلە قويماعان ءبىر­نەشە كومپوزيتورلاردىڭ تىڭ تۋىن­دىلارىن ورىندادى. سولار­دىڭ ىشىندە ەربول سپاناليەۆ پەن ايت­مۇرات تورەعالي سىندى ورە­­لى ورەندەرىمىزدى بولە-جارا ايتقانىمىز ءجون. ولاردىڭ ورىنداۋىندا مۇ­قاعالي ماقاتاەۆتىڭ جانە نۇر­­لان ءورازاليننىڭ ءماندى ماتىندە­رىمەن كەستەلەنگەن كەلىستى اندەردىڭ تۇساۋى كەسىلدى. قۇرمانعازى اتىنداعى ۇلتتىق كونسەرۆاتوريادا ۇستازدىق ەتەتىن رامازان ستامعازيەۆ بۇگىندە تالاپتىڭ تايىپ مىنگەن كەيىنگى تول­قىن وكىلدەرىن ءتار­بيەلەۋمەن دە اينالىسادى. سول شاكىرتتەرىنىڭ ءبىرى وزگەرىس سەرىكباي استانالىقتاردىڭ الدىنا شىعىپ, جارىلعاپبەردىنىڭ «شاناسىن» قۇيقىلجىتتى. ءسوي­تىپ, ونەرسۇيەر قاۋىمعا ءوزىنىڭ قا­بىلەت-قارىمى وتە مولدىعىن مويىن­داتتى. ابىرويلى ازاماتتىڭ ومىردەگى ءھام ونەردەگى سەنىمدى سەرىگى ۇلتۋ قاباەۆا دا ەلوردالىقتار ال­دىن­دا ەش ايانىپ قالعان جوق. جاق­­سىنىڭ تاڭداپ العان جارىنا لايىق مىنەز تانىتتى. سىڭ­عىرلاعان ۇنىمەن سىزىلتقان ءشا­با ادەنقۇلقىزىنىڭ «قازدار قاي­تىپ بارادى», ەرمەك ەلگە­زەكتىڭ «كوكتەم – سەزىم», تۇر­سىن­جان شاپايدىڭ «مەن ساعىنىپ كەلگەندە», باقىت ەلەۋسىز­ ۇلىنىڭ «دوس­تارىم» اندەرى دىتتەگەن جە­رىنە جەتىپ جاتتى. ۇلىستىڭ ۇلى كۇنى – ناۋرىز مەيرا­مىمەن تۇسپا-تۇس كەلگەن اتالمىش كونتسەرتتە قازاقتىڭ ءداستۇرلى مۋزىكالىق مۇرالارى مەن زاماناۋي ىرعاقتار ءوزارا ۇيلەسىم تاۋىپ, جاڭاشا سيپاتپەن تالعامپاز كورەرمەنگە جول تارتتى. تالعات باتىرحان, «ەگەمەن قازاقستان».