قاپشىق

اتىراۋدا پوليپروپيلەن ونىمىنەن تىگىلە باستادى اتىراۋداعى «قازحيم» سەرىك­تەستىگىن قۇرعان ينۆەستورلار 2011 جىلى بۇرىنعى حيميا زاۋىتىنىڭ پوليپروپيلەن جانە شپاگات تسەحىن جاڭعىرتۋ جۇمىستارىن قولعا الدى. قازىر بۇل تسەحتى قۇددى زاۋىت دەۋگە بولادى. الدىمەن 1,3 گەكتار اۋماعى بار نىسان قالىپقا كەلتىرىلىپ, ەسكى قوندىرعىلار جيناپ اكەتىلدى. 2012 جىلى «دامۋ» قورىنان نەسيەگە الىنعان 400 ميلليون تەڭگەگە اۆستريالىق جاڭا تەحنولوگيانىڭ جەلىسى الىندى. جەلىنىڭ جۇرەگى – ەكسترۋدەر. بۇل تۇيىرشەكتەلگەن پوليپروپيلەندى ەرىتىپ, قوندىرعى جەلىسىندە بىرنەشە مەترلىك جايماعا اينالدىرادى. وسىدان سوڭ قاپشىققا قاجەتتى مولشەرلەرمەن كەسىلىپ, جانجاعى تىگىلەدى. قاجەتتىلىگىنە قاراي پوليەتيلەننەن استار سالىنادى. دايىن قاپشىقتار سىرتىنا قاجەتتى دەرەكتەر جازىلىپ, تاپسىرىس بەرۋشىگە جونەلتىلەدى. – قازىر شيكىزاتتى رەسەيدەن ساتىپ الىپ وتىرمىز. ەۋرازيالىق ەكونوميكالىق وداققا مۇشە ەلدەر اراسىندا شيكىزات تاسىمالداۋدىڭ ەش قيىندىعى جوق. بۇرىنعىداي كەدەندىك كەدەرگىلەر مەن قاعازباستىلىقتان ارىلدىق, – دەي­دى ءوندىرىس باسشىسى ەتيۆار مامە­دوۆ. – ەندى اتىراۋداعى مۇناي-حيميا كەشەنىنىڭ ىسكە قوسى­لۋىن اسىعا توسىپ ءجۇرمىز. ءويت­كەنى, ءبىزدىڭ ءوندىرىسىمىز قانات جايىپ كەلەدى. قازىردىڭ وزىندە ايىنا 120 توننا پوليپروپيلەن ساتىپ الۋعا دايىنبىز. وسىنشا كولەمدەگى شيكىزات ايىنا 1 ميلليون دانا قانت, ۇن, تۇز جانە باسقا ونىمدەردى قاپتاۋعا ارنالعان قاپشىق, سونىمەن بىرگە, تاۋ-كەن ونەركاسىبىنە دە پايدالانىلاتىن 30 مىڭ كونتەينەر شىعارۋعا جەتەدى. كاسىپورىندا 185 جاڭا جۇمىس ورنى اشىلىپ, وعان جەرگىلىكتى تۇرعىندار تارتىلعان. ولاردىڭ ءبارى دە وزگە ەلدەردەگى وسى تەكتەس كاسىپورىنداردا دايىندىقتان ءوتىپتى. «ءبىز ءۇشىن تۇراقتى جۇمىس ورنىنىڭ بولعانى اسا ماڭىزدى, سول سەبەپتەن, كۇندەلىكتى ءىسىمىزدى جاۋاپكەرشىلىكپەن اتقارۋعا تىرىسامىز. وسى كاسىپورىندا جۇمىس جاساعانىما 4 ايدان ەندى اسىپ بارادى. ءبىر قاراعاندا, كوپ ۋاقىت وتە قويماسا دا, جۇمىسىم وزىمە ۇنايدى. ويتكەنى, بىزدەگى قوندىرعىلاردىڭ ءبارى دە جاڭاردى, دەمەك, ءوندىرىسىمىزدىڭ كەلەشەگى بار. ءبىزدىڭ ساپالى ءونىمىمىز ورتاق تابىسىمىزعا جول اشادى. سول سەبەپتەن, شەبەرلىگىمىزدى شىڭداپ, تاپسىرىس بەرۋشىنىڭ سۇرانىسىن ۋاقىتىندا ورىنداۋعا جۇمىلامىز», دەپ وسى زاۋىتقا ەڭبەككە تارتىلعانىنا قۋانادى ەكسترۋدەر وپەراتورى مۇرات ارىستانعاليەۆ. قازاقستاندا ءدال وسىنداي ءوندىرىس ورنى سونشالىقتى كوپ ەمەس. ءتۇرلى كولەمدەگى قاپشىقتار مەن كونتەينەر, شپاگات شىعاراتىن ەلىمىزدىڭ كوكشەتاۋدان وزگە وڭىرلەرىندە جوق ەكەنىن ەسكەرسەك, اتىراۋلىقتار ونىمىنە تەك قازاقستاندا عانا ەمەس, جاقىن شەتەلدەردەن دە سۇرانىس ارتا تۇسەرى داۋسىز. «قازحيم» ونىمدەرىن ساتىپ الۋشىلار قاتارىندا «قازحروم», «قازازوت», «ارالتۇز» سەكىلدى وتاندىق ءىرى كاسىپورىندارمەن بىرگە, رەسەيلىك تۇتىنۋشىلار دا بار. سونىڭ ءبىرى – «كۋيبىشەۆازوت» كاسىپورنى. – ءونىم وندىرەتىن كەز كەلگەن كاسىپورىن تۇتىنۋ نارىعىن كەڭەيتۋدى كوزدەيدى عوي. بۇل رەتتە ەۋرازيالىق ەكونوميكالىق وداقتىڭ ارقاسىندا بىزگە تاعى ءبىر نارىق كەڭىستىگى – بەلارۋس ەلىنىڭ ەسىگى اشىلدى. تاعى ءبىر ماقساتىمىز – ەۋروپا نارىعى, – دەيدى «قازحيم» جشس باس ديرەكتورى الەكساندر پەركين. – ويتكەنى, بەلارۋس رەسپۋبليكاسىنان سول ەلدىڭ تاۋارلارى ءبىزدىڭ قاپشىقتارىمىزعا قاپتالىپ, ەۋروپاعا جول تارتادى. دەمەك, ەۋروپالىق تۇتىنۋشىلار نازارى قازاقستاندا شىعارىلعان قاپشىقتاردىڭ ساپاسىنا دا اۋادى. ءبىز قازىردىڭ وزىندە چەحيادان سول سەكىلدىڭ تالاپتارى مەن نورمالارىن زەرتتەۋگە كىرىسكەن ءوز وكىلدىگىمىزدى اشىپ قويدىق. ءبىزدىڭ تاۋارىمىزدىڭ ۇلگىلەرى گەرمانيا ساراپشىلارى مەن جەتەكشى ماماندارىنىڭ سەرتيفيكاتتاۋىنا ۇسىنىلدى. ەۋروپاعا كىرۋىمىزگە رۇقسات بەرىلسە, بۇل ءبىز ءۇشىن تەك تابىسىمىزدى كوبەيتۋ عانا ەمەس, سونىمەن بىرگە, ءبىرىنشى كەزەكتە ءوندىرىس قۋاتىنىڭ ارتۋىنا, سونىمەن بىرگە, جاڭا جۇمىس ورنىنىڭ اشىلۋىنا ىقپال ەتەدى. ارينە, جەگىلىكتى بيۋدجەتكە قوسىمشا تۇسىمدەر دە كوبەيەدى. جولداسبەك شوپەعۇل, «ەگەمەن قازاقستان». اتىراۋ.