وليمپيادا چەمپيونى ناۋرىز مەرەكەسىمەن قۇتتىقتادى

الماتى. 23 ناۋرىز. بۇگىن الماتىدا وليمپيادا چەمپيونى ءالجان جارمۇحامەدوۆ «استانا» الاڭىندا 28-ءشى بۇكىلالەمدىك قىسقى ۋنيۆەرسيادا ويىندارىن ۇيىمداستىرۋ كوميتەتىنىڭ مەرەكەگە ارنايى تىككەن كيىز ۇيدە قوناق بولىپ, قازاقستاندىقتاردى مەرەكەمەن قۇتتىقتادى. بۇل تۋرالى egemen.kz ءتىلشىسى حابارلادى. «ۋنيۆەرسيادا – ستۋدەنتتەر سپورتىنداعى ەڭ ۇلكەن دودا. بارلىق مەملەكەتتەردەن سپورتشىلار جينالىپ, جوعارى دەڭگەيدە مەدالدارعا تالاسۋى – جارىستىڭ ەڭ ۇلكەن قىزىعى. الماتىداعى ۋنيۆەرسيادا – بارشامىز ءۇشىن ۇلكەن مەرەكە. ۋنيۆەرسيادا ويىندارى سپورتتىق مانساپتىڭ ارى قاراي دامۋىنا ۇلكەن سەرپىلىس بەرەتىن مۇمكىندىك. وسى دوداعا قاتىساتىن بارلىق سپورتشىلارعا ساتتىلىك, جەڭىس ءارى جاقسى ناتيجە كورسەتۋىن تىلەيمىن», – دەدى ۋنيۆەرسيادا چەمپيونى ءالجان جارمۇحامەدوۆ. ءالجان جارمۇحامەدوۆ – كەڭەس كەزەڭىنىڭ سپورتشىسى, باسكەتبولشى, ونىڭ قورجىنىندا حالىقارالىق جارىستاردىڭ جۇلدەلەرى بار. ەلەۋلى جەتىستىكتەرى – 1970 جىلعى يتالياداعى ۋنيۆەرسيادا التىنى مەن 1972 جىلى ميۋنحەن وليمپياداسى. ءالجان جارمۇحامەدوۆ ۋنيۆەرسيادا ويىندارىندا جەڭىسكە جەتكەن تۇڭعىش قازاق سپورتشىسى. قازىرگى ۋاقىتتا ول ماسكەۋ قالاسىنىڭ تۇرعىنى. ناۋرىز مەرەكەسىندە الاڭدا 2017 جىلى الماتىدا وتەتىن 28-ءشى قىسقى ۋنيۆەرسيادانىڭ مەرەكەلىك كيىز ءۇيى تۇرعىزىلدى جانە الداعى دودا جايلى باستى اقپاراتتار جانە كادە-سىيلار دا قويىلدى. ايناش ەسالي. دەرەك, سۋرەت: egemen.kz.