«نۇر وتان» پارتياسى ءماجىلىس دەپۋتاتتارىنىڭ 84 مانداتىن الدى

استانا. 22 ناۋرىز. بۇگىن ورتالىق سايلاۋ كوميسسياسىنىڭ كەزەكتى وتىرىسى ءوتتى. وندا «التىنشى شاقىرىلاتىن قازاقستان رەسپۋبليكاسى پارلامەنتى ءماجىلىسىنىڭ دەپۋتاتتارىن كەزەكتەن تىس سايلاۋدىڭ قورىتىندىلارىن انىقتاۋ جانە جاريالاۋ, پارتيالىق تىزىمدەر بويىنشا داۋىس بەرۋ قورىتىندىلارىنا قاراي دەپۋتاتتىق مانداتتاردى ءبولۋ تۋرالى» قاۋلى قابىلداندى. بۇل تۋرالى egemen.kz ءتىلشىسى حابارلادى. بارلىق وبلىستاردىڭ جانە استانا مەن الماتى قالالارىنىڭ اۋماقتىق سايلاۋ كوميسسيالارى ۇسىنعان دەرەكتەر بويىنشا ورتالىق سايلاۋ كوميسسياسى سايلاۋدىڭ سوڭعى قورىتىندىلارىن انىقتادى. سوعان وراي سايلاۋشىلار تىزىمىنە ەنگىزىلگەن 9 810 852 ازاماتتىڭ 7 566 150-ءى داۋىس بەرگەنى بەلگىلى بولدى. بۇل بارلىق سايلاۋشىنىڭ 77,12 پايىزىن قۇرايدى. ولاردىڭ ىشىندە «نۇر وتان» پارتياسىنا – 6 183 757 (82,20 پايىز), قازاقستان كوممۋنيستىك حالىق پارتياسىنا – 537 123 (7,14 پايىز), قازاقستاننىڭ «اق جول» دەموكراتيالىق پارتياسىنا – 540 406 (7,18 پايىز), «بىرلىك» ساياسي پارتياسى – 21 484 (0,29 پايىز), جالپىۇلتتىق سوتسيال-دەموكراتيالىق پارتياعا – 88 813 (1,18 پايىز) جانە «اۋىل» حالىقتىق-دەموكراتيالىق پاتريوتتىق پارتياسىنا 151 285 (2,01 پايىز) داۋىس بەرىلگەن. وسىلايشا, سايلاۋ تۋرالى زاڭعا سايكەس سايلاۋشىلار داۋىستارىنىڭ 7 جانە ودان دا كوپ پايىزىن العان ءۇش ساياسي پارتيا پارلامەنت ءماجىلىسى دەپۋتاتتارىنىڭ مانداتتارىنا يە بولدى. اتاپ ايتقاندا, «نۇر وتان», «اق جول» جانە قازاقستان كوممۋنيستىك حالىق پارتياسى ماجىلىسكە ءوز كانديداتتارىن ۇسىنا الادى. «بۇل پارتيالار اراسىنداعى دەپۋتاتتىق مانداتتار تومەندەگىدەي ءبولىنسىن: «نۇر وتان» پارتياسىنا – 84, «اق جول» پارتياسىنا – 7 جانە قازاقستان كوممۋنيستىك حالىق پارتياسىنا 7 ماندات», – دەدى ورتالىق سايلاۋ كوميسسياسىندا وتكەن ارنايى بريفينگتە كوميسسيا توراعاسى قۋاندىق تۇرعانقۇلوۆ. سونىمەن قاتار, وتىرىستا قازاقستان حالقى اسسامبلەياسى سايلايتىن پارلامەنت ءماجىلىسىنىڭ دەپۋتاتتارىن سايلاۋ قورىتىندىلارى دا جاريا ەتىلدى. بۇل رەتتە اسسامبلەيادان ءماجىلىس دەپۋتاتتارى بولىپ ساۋىتبەك ابدراحمانوۆ – «ەگەمەن قازاقستان» رەسپۋبليكالىق گازەتى» اق پرەزيدەنتى, ۆلاديمير بوجكو – قازاقستان رەسپۋبليكاسى ىشكى ىستەر ءمينيسترىنىڭ ورىنباسارى, ناتاليا جۇمادىلداەۆا – قىزىلوردا قالاسىنداعى وقۋشىلار مەن جاسوسپىرىمدەر ءۇيىنىڭ ديرەكتورى, رومان كيم – پارلامەنت ءماجىلىسى V سايلانىمىنىڭ دەپۋتاتى, نارينە ميكاەليان – الماتىداعى ارميان ەتنومادەني بىرلەستىگىنىڭ ءتورايىمى, احمەت مۋرادوۆ – پارلامەنت ءماجىلىسى V سايلانىمىنىڭ دەپۋتاتى, شايماردان نۋرۋموۆ – رەسپۋبليكالىق ۇيعىر ەتنوورتالىعىنىڭ توراعاسى, يۋري تيموششەنكو – پارلامەنت ءماجىلىسى V سايلانىمىنىڭ دەپۋتاتى جانە شاكير حاحازوۆ – دۇنگەن ەتنومادەني ورتالىقتارى قاۋىمداستىعى باسقارماسىنىڭ مۇشەسى سايلاندى. ايتا كەتەيىك, سايلاۋ ناتيجەسى بويىنشا س.ابدراحمانوۆ – 345 (93,50 پايىز), ۆ.بوجكو – 349 (94,58 پايىز), ن.جۇمادىلداەۆا – 343 (92,95 پايىز), ر.كيم – 346 (93,77 پايىز), ن.ميكاەليان – 336 (91,06 پايىز), ا.مۋرادوۆ – 339 (91,87 پايىز), ش.نۋرۋموۆ – 337 (91,33 پايىز), يۋ.تيموششەنكو – 341 (92,41 پايىز) جانە ش.حاحازوۆ 342 (92,68 پايىز) داۋىس الدى. قۋاندىق تۇرعانقۇلوۆ اتالعان قاۋلىنى قابىلداي وتىرىپ, ورتالىق سايلاۋ كوميسسياسى ەلدە سوڭعى ەكى اي بويى جۇرگەن سايلاۋ ناۋقانىن اياقتايتىنىن اتاپ ءوتتى. «وسىلايشا, قازاقستان رەسپۋبليكاسى ورتالىق سايلاۋ كوميسسياسى قازاقستان رەسپۋبليكاسى پرەزيدەنتىنىڭ پارلامەنت ءماجىلىسى دەپۋتاتتارىنىڭ كەزەكتەن تىس سايلاۋىن ۇيىمداستىرۋ جانە وتكىزۋ تۋرالى جارلىعىنىڭ ورىندالۋىن قامتاماسىز ەتتى», –دەدى كوميسسيا توراعاسى. ەلامان قوڭىر. دەرەك: egemen.kz. سۋرەت: 24.kz.