مول مۇمكىندىكتەر بەرىلگەن ناۋقان

پارلامەنت ءماجىلىسىنىڭ دەپۋتاتتارىن سايلاۋ ناتيجەسى بو­يىنشا «اۋىل» حالىقتىق-دەموكراتيالىق پاتريوتتىق پار­تياسىنىڭ توراعاسى ءالي بەكتاەۆ باق وكىلدەرىمەن كەزدەسۋ ءوت­كىزىپ, مالىمدەمە جاسادى. ءبىز قازاقستان رەسپۋبليكاسىنىڭ پرە­زيدەنتى, ەلباسى نۇرسۇلتان ءابىش ۇلى نازارباەۆتى «نۇر وتان» پارتياسىنىڭ لايىقتى دا تاريحي جەڭىسىمەن قۇتتىقتايمىز, دەي وتىرىپ, پارتيا توراعاسى كەشەگى وتكەن سايلاۋدىڭ ءادىل دە اشىق بول­عاندىعىنا نازار اۋداردى. سونىمەن قاتار, وسىناۋ  سايلاۋ ەل­باسىنىڭ تاۋەلسىزدىگىمىز بەن ەركىندىگىمىزدى نىعايتۋ ءۇشىن,  كەشەگى قابىلدانىپ جاتقان 5 ينستيتۋتتىق رەفورما مەن ۇلت جوسپارى —  «100 ناقتى قادامدى»  ىسكە اسىرۋ باعىتىندا جۇرگىزىپ وتىرعان  سايا­ساتىنىڭ جالپى­ۇلتتىق قولداۋعا يە ەكەنىن تاعى ءبىر رەت كورسەتىپ بەردى. ەلباسى تۋىنىڭ توڭىرەگىنە جينالعان حالىق ەلىمىزدىڭ بولاشاعى مەن ەلدەگى تۇ­راقتىلىق ءۇشىن, ىنتىماق پەن بىرلىك جولىندا داۋىس بەردى دەپ ەسەپتەيمىز, دەدى پارتيا توراعاسى. سونداي-اق, «اۋىل» پارتياسى اتىنان وزگە ساياسي پارتيالاردىڭ باسشىلارىنا سايلاۋداعى جەڭىسىمەن قۇتتىقتاۋ جولداندى. بۇل رەتتە,  سايلاۋدا «اۋىل» پارتياسىن قولداپ, سەنىم ارتىپ داۋىس بەرگەن سايلاۋشىلارعا ريزاشىلىق ءبىلدىرىلدى. ساياسي دودا بولعاننان كەيىن وندا العا قويعان ماقساتتار بولاتىنى, الداعى ۋاقىتتا ونى ورىنداۋ ءۇشىن «اۋىل» پارتياسى ءالى دە بولسا جۇمىس جاسايتىنى قاداپ ايتىلدى. جانە دە كەشەگى پارلامەنت ءماجىلىسىنىڭ دەپۋتاتتارىن سايلاۋ تەڭدەي باسەكەلەستىك ورتادا وتكەنىن, بارلىق پارتيالار ءۇشىن ۇگىت-ناسيحات شارالارىن جۇرگىزۋگە مول مۇمكىندىكتەر جاسالعانىن جەتكىزدى. پارتيا توراعاسىنىڭ سوزىنە قارا­عاندا, بارلىق پارتيالارعا وزدەرىنىڭ سايلاۋالدى جۇمىستارىن جۇرگىزۋگە تولىقتاي جاعدايلار جاسالدى. ول:  «بۇل سايلاۋ ەلىمىزدىڭ ءارى قاراي تۇراقتى دامۋى مەن قوعام جانە مەملەكەت اراسىندا سىندارلى كەلىسىمدى قۇرۋعا مۇمكىندىك بەرەتىن دەر كەزىندە جاسالعان, ماڭىزدى قادام بولدى», دەدى. جانە دە ءبىز ءوزىمىزدىڭ سايلاۋالدى  شارالارىمىزدى جۇرگىزىپ, سايا­سي باعدارلامامىزدى جۇرتشىلىققا جەتكىزە الدىق. قازاقستاندىقتاردىڭ ساياسي مادەنيەتى بيىك جانە ازاماتتىق ۇستانىمى جوعارى ەكەنىنە كەشەگى سايلاۋ كەزىندە  تاعى دا كوز جەتكىزدىك. ەل تۇرعىندارىن  ۇلىستىڭ ۇلى كۇنى – ناۋرىز مەرەكەسىمەن قۇتتىقتاي وتىرىپ, بارلىقتارىڭىزدىڭ شاڭى­راقتارىڭىزعا شاتتىق,  بەرەكە مەن بىرلىك تىلەيمىن, دەدى پارتيا توراعاسى. ەلميرا ماتىباەۆا, «ەگەمەن قازاقستان».