بايقاۋشىعا بارلىق جاعداي جاسالدى

كەشە ۇلتتىق اكادەميالىق كىتاپحانادا سايلاۋدىڭ قالاي وتكەنى جونىندە ءباسپاسوز ءماسليحاتى ءوتتى. وعان قوعامدىق ۇيىمداردىڭ وكىلدەرى مەن وتاندىق جانە شەتەلدىڭ بىرقاتار جۋرناليستەرى, سونداي-اق, سايلاۋدى باقىلاعان حالىقارالىق ۇيىمداردىڭ بايقاۋشىلارى قاتىستى. شارانى ۇيىمداستىرعان قا­زاقستان رەسپۋبليكاسىندا ساي­لاۋدى بايقاۋ جونىندەگى رەسپۋب­ليكالىق قوعامدىق كوميسسيانىڭ توراعاسى مەن ورىنباسارلارى ناۋقانداعى ءوز جۇمىستارى تۋرالى اڭگىمەلەدى. ماسەلەن, ساي­لاۋدىڭ بارلىق ۇدەرىسىن بۇگە-شىگەسىنە دەيىن مۇقيات قاداعالاۋ ءۇشىن 10 مىڭنان اسا بايقاۋشى دايىنداعاندارىن ايتقان قوعام­دىق كوميسسيا توراعاسى نۇرلان ەرىمبەتوۆ, قىزمەتكە جەگىلگەن سايلاۋ ۋچاسكەلەرىندەگى وكىلدەرىنىڭ اشىق جۇمىس ىستەۋلەرى ءۇشىن بارلىق جاعداي جاسالعانىن تىلگە تيەك ەتتى. «سايلاۋدى بايقاۋعا داي­ىن­دالعان 10 مىڭنان اسا بايقاۋ­شىلارىمىزدىڭ ءبارى بىردەي ءوز مىندەتىن جاقسى بىلەتىن ازاماتتار. ولاردىڭ باسىم كوپشىلىگىنىڭ بۇعان دەيىن دە مۇنداي اۋقىمدى شارالارعا قاتىسىپ, مول تاجىريبە جيناقتاعانىن ايتىپ وتكەنىمىز ءجون. مۇنىمەن بىرگە, ءبىر اي بويى بۇل جولعى سايلاۋدىڭ بۇعان دەيىنگى ناۋقانداردان ەرەك­شەلىكتەرىن بايقاۋشىنىڭ اربىرىنە مۇقيات ءتۇسىندىرۋ جۇ­مىستارى تياناقتى جۇرگىزىلدى. ولاردىڭ قالاي ءجۇرىپ-تۇرىپ, سايلاۋشىلار اراسىندا وزدەرىن قالاي ۇستاۋى كەرەكتىگىنە دەيىن تەرەڭ ۇقتىرىلدى», دەدى ول. كوميسسيا توراعاسى جەرگىلىكتى تۇرعىندارمەن, ياعني ەلەكتوراتپەن دە ءتيىستى جۇمىستار اتقارىلعانىن نازاردان تىس قالدىرمادى. «قوعاممەن دە تىعىز بايلانىس­تا بولىپ, ولاردىڭ قۇقىعى مەن سايلاۋ ءتارتىبى جونىندە ءتۇسىندىرۋ جۇمىستارى جۇرگىزىلدى. ماجىلىسپەن قاتار, ءماسليحاتتار دەپۋتاتتارىن دا سايلاۋ كەرەك بولعاندىقتان, كەيبىر ۇساق-تۇيەك تۇسىنىسپەۋشىلىكتەر بولعان بولۋى ىقتيمال. بىراق, جالپى العاندا, سايلاۋ ناتيجەلى ءوتتى دەۋگە اۋىز بارادى», دەدى ن.ەرىمبەتوۆ. شارا بارىسىنىڭ ەكىنشى بولىگىندە كوميسسيا توراعاسىنا ءتۇرلى سۇراقتار قويىلدى. بۇل جونىندە شەتەلدىك بۇقارالىق اقپارات قۇرالدارىنىڭ وكىلدەرى بەلسەندىلىك تانىتتى. لاتۆيانىڭ ءجۋرناليسى ازاماتتاردىڭ تۇگەل دەرلىك قاتىسقانىنا قالاي كوز جەتكىزۋگە بولاتىنى جونىندە سۇرادى. «بىزدە مۇنداي ماسەلە الماتى قالاسىندا عانا ورىن الۋى مۇمكىن. سەبەبى, قالا ۇلكەن بولعاندىقتان, ول جەرگە جاڭادان كوشىپ كەلىپ, ءالى تىركەلۋگە ۇلگىرە الماي جۇرگەن ادامدار بار. سونداي-اق, ۇلكەن قالاعا جۇمىس ىزدەپ كەلىپ, وندا ۋاقىتشا تۇرىپ جاتقاندار دا كەزدەسەدى. مۇنداي جاعدايدا, وسى تۇرعىدا كەمشىلىكتەر ورىن الۋى كادىك. سوعان قاراماستان, حالىقتىڭ باسىم كوپشىلىگى سايلاۋعا قاتىس­قانى ءبىزدى شىن قۋانتىپ وتىر», دەدى كوميسسيا توراعاسى. پولشا ءجۋرناليسى حالىق­ارالىق بايقاۋشىلار تاراپىنان ءبىر كابيناعا ءبىر وتباسى بىرگە كىرىپ-شىققانىن بايقاپ قالعاندارى بار ەكەنىن العا تار­تىپ, ونىڭ قانشالىقتى زاڭدى ەكەنىن سۇرادى. «مۇنداي زاڭ­سىزدىقتى, وكىنىشكە قاراي ءبىزدىڭ بايقاۋشىلار بايقاماي قالعان بولۋى كەرەك. بىراق ءبىز بۇل ماسەلەمەن مىندەتتى تۇردە شۇعىلدانامىز. ءسويتىپ, ءتيىستى ادامدارعا ەسكەرتىلەتىن بولادى. ەستەرىڭىزدە بولسا, كەڭەستىك زاماندا ءبىر وتباسىنىڭ بارلىق تولقۇجاتىن ءبىر عانا ادام اكەلىپ, ءبارىنىڭ اتىنان داۋىس بەرە سالاتىن ەدى. حالىق بولعان سوڭ سول مەنتاليتەتتەن الىستاي قوي­ماعاندارى دا بولۋى ىقتيمال. بىراق قازىر زامان باسقا, زاڭ باسقا. ءار سايلاۋ ۋچاسكەسىندە ءوز ەلىمىزدىڭ كەمى 6-7 بايقاۋشىسى بولسا, حالىقارالىق ۇيىمداردىڭ وكىلدەرى تاعى بار. مۇنى حالىق جاقسى ءبىلىپ وتىر. سوندىقتان ولار ەشكىمگە قاراماي-اق تاڭداۋ جاساۋعا بولاتىنىن كورىپ تۇر», دەگەن ن.ەرىمبەتوۆ بريفينگ قاتىسۋشىلارىن ۇلىستىڭ ۇلى كۇنى – ناۋرىز مەرەكەسىمەن قۇتتىقتادى. نۇرباي ەلمۇراتوۆ, «ەگەمەن قازاقستان».