*
الماتى
«نۇر وتان» پارتياسىنىڭ كەزەكتى جەڭىسى الماتىنىڭ قاق ورتاسىنداعى بالۋان شولاق اتىنداعى سپورت سارايىندا بارشا سالتانات-شاشۋمەن تويلاندى. ساياسي ءىس-شاراعا ءۇش مىڭنان استام قالا تۇرعىندارى مەن پارتيا ۇيىمىنىڭ مۇشەلەرى قاتىستى. جينالعاندار الدىنا شىققان الماتىداعى ەڭ تانىمال نۇروتاندىقتار قالا تۇرعىندارىنا كەشەگى سايلاۋداعى تاڭداۋلارى ءۇشىن شىن كوڭىلدەن ريزاشىلىق سەزىمدەرىن ءبىلدىردى. تاۋەلسىز مەملەكەتىمىزدىڭ شيرەك عاسىرلىق مەرەيتويىنىڭ ءدال الدىندا جاسالىنعان حالىقتىق تارتۋعا نۇروتاندىقتار ءوز تاراپىنان ەسەلەنگەن جىگەرلى ەڭبەگىمەن جاۋاپ بەرەتىندىكتەرىنە سەندىردى.
– قۇرمەتتى الماتىلىقتار! سىزدەر كۇنى كەشە ەل تاعدىرى مەن جاس مەملەكەتىمىزدىڭ بولاشاعىنا بەيجاي قاراي المايتىندىقتارىڭىزدى تاعى دا دالەلدەپ شىقتىڭىزدار, – دەدى بەلگىلى عالىم, جوعارى وقۋ ورىندارى قاۋىمداستىعىنىڭ پرەزيدەنتى, پروفەسسور راحمان الشانوۆ. – پارلامەنت ءماجىلىسى مەن ءماسليحاتتاردىڭ جاڭا قۇرامى, ءسوز جوق, سىزدەردىڭ بۇل سەنىمدەرىڭىزدى اقتاۋعا تىرىسادى. ءبىزدىڭ الدىمىزدا پارتيا كوشباسشىسى – ەلباسىمىز نۇرسۇلتان نازارباەۆتىڭ «5 ينستيتۋتتىق رەفورمانى جۇزەگە اسىرۋ بويىنشا 100 ناقتى قادام» – ۇلت جوسپارىن ورىنداۋدىڭ جارقىن كەزەڭى تۇر. ءبىز ونى ورىنداۋعا دايىنبىز!
ايگىلى سپورت سارايىنىڭ ءىشى جەڭىمپازدارعا داۋىستاپ, دۋىلداتا قول شاپالاقتاپ كورسەتىلگەن قوشەمەتتىڭ تولقىنىمەن تالاي رەت ءدۇر سىلكىندى. بۇل شىن مانىندە شىنايى سايىستاعى شىنايى جەڭىمپازدارعا كورسەتىلگەن قۇرمەت ەدى.
حالىقارالىق ءىت ۋنيۆەرسيتەتىنىڭ رەكتورى ءدامىر شىنىبەكوۆ قازىر اقپارات اعىنى توقتاۋسىز اعىلعان جاڭا ءداۋىر ەكەنىن العا تارتا سويلەدى. «ءبىزدىڭ ەلىمىزدىڭ الدىندا جاڭاشا دامۋدىڭ قارقىن العان سەنىمدى ستراتەگياسىن جالعاستىرۋ مىندەتى تۇر. «نۇر وتان» پارتياسى الداعى بەس جىلدا وسىناۋ عالامدىق ءمانى زور باعدارلامانى جۇزەگە اسىرۋ جولىندا كەزەكتى جەڭىسكە قول جەتكىزەدى. ءوز باسىم وسى كەزەڭدە قازاقستاننىڭ الەمدەگى باسەكەگە قابىلەتتى 30 ەلدىڭ قاتارىنان ورىن الۋىنا «نۇر وتاننىڭ» ۇلەسى ايرىقشا بولاتىنىنا سەنىمدىمىن», دەدى.
تاڭداۋ مارتەبەسىنە يە بولعان حالىق قالاۋلىلارىنىڭ ارقالار جۇگى قازىرگىدەي الەمدىك داعدارىس بەلەڭ العان قيلى كەزەڭدە, ءتىپتى, اۋىرلاي تۇسپەك. جەڭىمپازدار فورۋمىندا ول تۋرالى دا اشىق ايتىلدى.
سالتانات پەن قۋانىش فورۋمىنىڭ سوڭى ەلىمىزدىڭ ەڭ تانىمال ونەر جۇلدىزدارىنىڭ كونتسەرتىمەن جالعاستى.
سۋرەتتى تۇسىرگەن يۋري بەككەر.
*
اقتاۋ
اقتاۋدا «نۇر وتان» پارتياسىنىڭ سايلاۋداعى جەڭىسى ناۋرىز مەيرامىمەن بىرگە اتالىپ ءوتتى. تەڭىز جاعالاۋىندا اسەم بەزەندىرىلىپ, «بىرلىك. تۇراقتىلىق. جاسامپازدىق» اتاۋىمەن وتكەن فورۋمعا جاستار, قالا تۇرعىندارى مەن قوناقتارى قاتىستى.
– ءبىز بۇگىن ەلباسىمىزدىڭ ساياساتىن قولدايتىنىمىزدى, ونىڭ ەڭ جاقىن كومانداسىندا ەكەنىمىزدى كورسەتۋ ءۇشىن باس قوسىپ وتىرمىز. ءبىز بىرلىك, تۇراقتىلىق, جاسامپازدىقتى تۋ ەتكەن «نۇر وتان» پارتياسىنا سەنەمىز! – دەپ ساڭقىلداعان جۇرگىزۋشىلەر جينالعاندارعا ەكپىن بەرە ءتۇستى. وتان جانە تۋعان جەر, وسى ۇعىمداردى جان-ءتانىمەن ءسۇيۋ باعىتىنداعى پاتريوتتىق اندەر اۋەلەگەن كەشتە «جاس وتان» جق مۇشەلەرى جالاۋشالاردى كوككە كوتەرە تەربەتتى.
حالىق الدىنا شىققان ماڭعىستاۋ وبلىسىنىڭ اكىمى ا.ايدارباەۆ, ماڭعىستاۋ وبلىستىق ءماسليحاتىنىڭ حاتشىسى, «نۇر وتان» پارتياسى ماڭعىستاۋ وبلىستىق فيليالىنىڭ سايلاۋالدى وڭىرلىك شتابىنىڭ توراعاسى ب. ءجۇسىپوۆ, ماڭعىستاۋ وبلىسىنىڭ قۇرمەتتى ازاماتى, قوعام قايراتكەرى ق.ەرەجەپوۆ, ت.شەۆچەنكو اتىنداعى ۋكراين ەتنومادەني بىرلەستىگىنىڭ مۇشەسى, «ليكوشا» بالاباقشاسىنىڭ مەڭگەرۋشىسى ت.ارتەمەنكو, ماڭعىستاۋ وبلىسىنىڭ كاسىپوداقتار ورتالىعىنىڭ توراعاسى ق.جانابەكوۆ ماڭعىستاۋ وبلىسىنىڭ تۇرعىندارى مەن قوناقتارىن «نۇر وتان» پارتياسىنىڭ سايلاۋداعى جەڭىسىمەن جانە ۇلىستىڭ ۇلى كۇنى مەيرامىمەن قۇتتىقتادى.
فورۋمنىڭ ەكىنشى ءبولىمى مەرەكەلىك كوڭىلدى كەشكە, ياعني جەرگىلىكتى ونەرپازداردىڭ كونتسەرتىنە ۇلاستى.
گۇلايىم شىنتەمىرقىزى,
«ەگەمەن قازاقستان».
*
اقتوبە
ورتالىق سايلاۋ كوميسسياسىنا الدىن الا كەلىپ تۇسكەن مالىمەتتەرگە سايكەس, ناۋقانعا قاتىسقان التى ساياسي پارتيانىڭ اراسىندا ۇشەۋى عانا ءتيىستى شەكتى باعىندىرا الدى. سونىڭ ىشىندە «نۇر وتان» پارتياسى سايلاۋشىلاردىڭ 82,15 پايىز داۋىسىن العانى بەلگىلى بولىپ وتىر. وسىعان وراي وبلىس ورتالىعىنداعى قر تۇڭعىش پرەزيدەنتى ن.نازارباەۆ اتىنداعى ورتالىق ساياباقتا ايماقتىق جەڭىمپازدار فورۋمى وتكىزىلدى.
«العا, قازاقستان, العا «نۇر وتان»! «نۇرسۇلتان – قازاقستان!» دەگەن داۋىستار اقتوبە اسپانىن جاڭعىرتتى. «نۇر وتان» پارتياسىنىڭ جالاۋشالارىن بۇلعاپ, جالاۋلارىن جەلبىرەتكەن جەڭىمپازدار قاتارى اۋقىمدى. ساياباققا جينالعان مىڭداعان ادامنىڭ جۇزدەرىنەن جەڭىستىڭ قۋانىشتى لەبى ەسەدى. ساحنا تورىنەن پاتريوتتىق اندەر اۋەنى توگىلەدى. قۇبىلمالى كوكتەمنىڭ كۇنى دە شايداي اشىلىپ, اينالاعا شۋاعىن شاشۋدا. مۇنىڭ ءوزى جەڭىس قۋانىشىمەن استاسىپ, كوڭىل كوكجيەگىن كەڭەيتە تۇسەدى.
القالى جيىندا ءسوز العان وبلىس اكىمى, «نۇر وتان» پارتياسى وبلىستىق فيليالىنىڭ توراعاسى بەردىبەك ساپارباەۆ فورۋمعا قاتىسۋشىلاردى «نۇر وتان» پارتياسىنىڭ سايلاۋداعى ايقىن جەڭىسىمەن جانە ناۋرىز مەيرامىمەن قۇتتىقتادى.
– بۇل سايلاۋدىڭ باستى ەرەكشەلىگى, ونىڭ جىل باسى – ناۋرىز مەرەكەسىمەن تۇسپا-تۇس جانە ەل تاۋەلسىزدىگىنىڭ 25 جىلدىعى قارساڭىندا ءوتۋى دەر ەدىم. الەمدىك ساياسي جانە ەكونوميكالىق داعدارىسقا قاراماستان حالىق بىرلىك پەن تاتۋلىقتىڭ ۇلگىسىن كورسەتتى, سايلاۋعا ۇيىمشىلدىقپەن قاتىستى. سايلاۋشىلار ءوز بولاشاعىنىڭ مەملەكەت باسشىسى ن.نازارباەۆپەن, قازاقستاننىڭ دامۋىمەن جانە «نۇر وتان» پارتياسىمەن ءبىر ەكەنىن تاعى ءبىر دالەلدەدى. اقتوبەلىك سايلاۋشىلاردىڭ 80 پايىزدان استامى «نۇر وتان» پارتياسىن قولداپ داۋىس بەردى, ەلباسى ساياساتىنا جانە ەلىمىزدىڭ ەرتەڭىنە دەگەن سەنىم ارتتى. بۇل سىزدەردىڭ ەلباسىنىڭ جانە مەملەكەتتىڭ ساياساتىن قولدايتىندىقتارىڭىزدىڭ ايقىن كورىنىسى, – دەدى ءوڭىر باسشىسى.
فورۋمدا س.بايىشەۆ اتىنداعى اقتوبە ۋنيۆەرسيتەتىنىڭ دەپارتامەنت ديرەكتورى كونستانتين تسحاي ءسوز الىپ, ەلدەگى بەرەكە-بىرلىكتىڭ ەلباسىنىڭ سارابدال ساياساتىنان باستاۋ الاتىنىن اتاپ ءوتتى. اقتوبە حروم قوسىندىلارى زاۋىتىنىڭ تسەح باستىعى ماكسيم موزگوۆىح فورۋمعا قاتىسۋشىلاردى جۇمىسشىلار اتىنان قۇتتىقتاي كەلىپ, 2017 جىلدان باستاپ جۇمىسشى ماماندىعىن تاڭداعان جاستارعا تەگىن كاسىپتىك ءبىلىم بەرىلەتىنىن ەلباسىنىڭ كوشباسشىلىق كورەگەندىگىمەن ساباقتاستىردى. «جاس وتان» جاستار قاناتى وبلىستىق فيليالىنىڭ توراعاسى اسىلجان بۇركىتالين جاستارعا جالىندى قيمىل جاراساتىنىن جەتكىزدى. ەڭبەك ارداگەرى سەرىك بوتاعارين, «اقتوبە فەرروقورىتپا زاۋىتى» اق ۇنتاقتاۋشىسى اندرەي درونوۆ, وبلىستىق اۋرۋحانانىڭ ءبولىم مەڭگەرۋشىسى ايگۇل ەسىرعوجينا جانە باسقالارى قازاقستاننىڭ ودان ءارى دامۋى ءۇشىن وتكەن سايلاۋدىڭ ماڭىزى زور ەكەنىنە جان-جاقتى توقتالدى. ولار ەلباسى ن.نازارباەۆتىڭ باستاماسىمەن قولعا الىنعان «100 ناقتى قادام» ۇلت جوسپارى جانە بەس ينستيتۋتتىق رەفورمانى جۇزەگە اسىرۋعا ءوز ۇلەستەرىن قوسۋعا دايىن ەكەندىكتەرىن مالىمدەدى.
ساتىبالدى ءساۋىرباي,
«ەگەمەن قازاقستان».
*
اتىراۋ
اتىراۋدا دا «نۇر وتان» پارتياسىنىڭ مۇشەلەرى مەن جاقتاستارى جەڭىمپازدار فورۋمىن وتكىزدى. جەڭىمپاز پارتيانىڭ مۇشەلەرى بۇل وڭىردە ەسەلەپ ءوسىپ كەلەدى. قازىر وڭىرلىك فيليال قۇرامىندا پارتيانىڭ 32 023 بەلسەندى مۇشەسى بار. ولاردىڭ ءبارى دە پارتيا باعدارلاماسىنىڭ ءساتتى ىسكە اسۋىنا اتسالىسۋدا. جەڭىمپازدار فورۋمىنا قاتىسۋشىلار وڭىردە ۇدەمەلى يندۋستريالىق-يننوۆاتسيالىق جوبالاردىڭ ىسكە اسىرىلىپ كەلە جاتقانىن قولدايدى.
«نۇر وتان» پارتياسىنىڭ اتىراۋ وبلىستىق فيليالى 27 سايلاۋ وكرۋگى بويىنشا وبلىستىق ءماسليحات دەپۋتاتتىعىنا ءار سايلاۋ وكرۋگىنەن ءبىر كانديداتتان ۇسىندى. كانديداتتار قۇرامىندا دارىگەر مەن زاڭگەر دە, كاسىپكەر مەن مۇنايشى دا, ءتىپتى, كاسىپوداق ۇيىمىنىڭ وكىلى مەن اۋىل شارۋاشىلىعى سالاسىنىڭ بىلگىر مامانى دا بار.
– بۇل جەڭىس – ءبىز ءۇشىن ۇلكەن جەتىستىك. ءبىز ەلدىڭ ىقىلاسىنا بولەنگەن, ەل مۇددەسى ءۇشىن جۇمىس جاسايتىن پارتيا ەكەنىمىزدى تاعى دالەلدەدىك. ون جەتى جىلدان بەرى پارتيا توراعاسىمەن بىرگە ەل تۇرمىسىن جاقسارتۋعا اتسالىسىپ كەلەمىز. سايلاۋداعى كەزەكتى جەڭىسىمىز «نۇر وتان» پارتياسىنىڭ مۇشەلەرىنە ۇلكەن جاۋاپكەرشىلىك پەن جاڭا مىندەتتەر جۇكتەيدى. ءبىز ەلباسىنىڭ باستاۋىمەن تاۋەلسىز ەلىمىزدىڭ جاڭا بيىكتەرگە كوتەرىلىپ, ۇلكەن جەتىستىكتەرگە جەتەتىنىنە سەنەمىز, – دەدى جەڭىمپازدار فورۋمىندا «نۇر وتان» پارتياسى اتىراۋ وبلىستىق فيليالى توراعاسىنىڭ ورىنباسارى كەڭەس قوسىباەۆ.
جولداسبەك شوپەعۇل,
«ەگەمەن قازاقستان».
*
كوكشەتاۋ
قازاقستان تاۋەلسىزدىگىنىڭ 25 جىلدىعى اتالىپ وتەتىن بيىلعى ناۋرىز مەيرامىن كوكشەلىكتەر كوتەرىڭكى كوڭىلمەن, شات-شادىمان دۋمانمەن تويلادى. اقمولا وبلىسىنىڭ اكىمى, «نۇر وتان» پارتياسى وبلىستىق فيليالىنىڭ توراعاسى سەرگەي كۋلاگين ءوڭىر تۇرعىندارىن, قالا قوناقتارىن بەيبىتشىلىك پەن تۇسىنىستىك, قۇت-بەرەكە مەيرامىمەن قۇتتىقتادى.
– اعىمداعى جىلعى ناۋرىز – مەيرامىن مەرەكەلەۋ قوعامدىق-ساياسي ماڭىزى زور وقيعامەن, ياعني قازاقستان رەسپۋبليكاسى پارلامەنتى ءماجىلىسىنىڭ جانە بارلىق دەڭگەيدەگى ءماسليحاتتاردىڭ سايلاۋىمەن تۇسپا-تۇس كەلدى. كەشە عانا ءبىز سىزدەرمەن ءوز كونستيتۋتسيالىق قۇقىعىمىزدى پايدالانىپ سايلاۋعا بەلسەنە قاتىستىق جانە بۇكىل الەمگە اۋىزبىرلىگىمىز بەن ىنتىماعىمىزدى ناقتى ىسپەن كورسەتە بىلدىك. بۇل دەگەنىمىز كەلىسىم مەن جالپىۇلتتىق بىرلىگىمىزدىڭ جارقىن كورىنىسى بولىپ تابىلادى. «نۇر وتان» پارتياسىنىڭ وبلىستىق فيليالىنىڭ توراعاسى رەتىندە مەن زور قۋانىشپەن الدىن الا سايلاۋ مالىمەتتەرىنە سايكەس, «نۇر وتان» پارتياسىنىڭ ايقىن باسىمدىقپەن جەڭىسكە جەتكەنىن ايتقىم كەلەدى. بۇل جەتەكشى پارتيانىڭ ستراتەگيالىق باعدارلاماسى قازاقستاندىقتاردىڭ قولداۋىنا يە بولعانىن بىلدىرەدى. بۇل تەك «نۇر وتاننىڭ» جەڭىسى ەمەس, بۇل بۇكىل حالىقتىڭ جەڭىسى, – دەپ اتاپ ءوتتى پارتيانىڭ ايماقتىق فيليالىنىڭ توراعاسى س.كۋلاگين.
تاۋەلسىزدىك الاڭىنا «نۇر وتاننىڭ» اقمولا وبلىستىق سايلاۋالدى شتابىنىڭ, باستاۋىش پارتيا ۇيىمدارىنىڭ مۇشەلەرى, بەلگىلى قوعام قايراتكەرلەرى, پارتيانىڭ جاقتاستارى, ونەر سالاسىنداعى زيالىلار, اتاقتى سپورتشىلار, قوعامدىق پىكىر سەركەلەرى, جاستار, وبلىس ورتالىعىنىڭ تۇرعىندارى ءسوز الىپ, دەموكراتيالىق قوعامىمىزدىڭ قارىشتى قادامىنا تىلەكتەستىگىن ءبىلدىردى.
وسى ورايدا, پارتيانىڭ وڭىردەگى سايلاۋالدى 20 شتابى, پارتيا اكتيۆى بەكىتىلگەن جۇيەلىك كەستەگە, رەسپۋبليكالىق شتابتىڭ ۇسىنىستارىنا جانە ورتالىق سايلاۋ كوميسسياسىنىڭ كۇنتىزبەلىك ءىس-شارالار جوسپارىنا ساي قىرۋار جۇمىستار اتقارعانىن اتاپ ءوتۋىمىز كەرەك. تۇرعىندار اراسىنداعى ۇگىت-ناسيحات جۇمىسى «قر سايلاۋ تۋرالى» زاڭىنىڭ, حالىقارالىق نورمالار تالاپتارىنىڭ اياسىندا ءجۇرگىزىلدى. دايىندىق كەزەڭىندە 414 مىڭ ادامدى قامتىعان, 2245 ءىس-شارا ۇيىمداستىرىلدى. بۇل ىسكە پارتيانىڭ 1250 بەلسەندى مۇشەسى تارتىلعان. سونداي-اق, پارلامەنت ءماجىلىسىنىڭ دەپۋتاتتىعىنان پارتيا ءتىزىمى بويىنشا ءۇمىتكەرلەر وبلىس اۋماعىندا 4500 ادامدى قامتيتىن 70-تەن استام كەزدەسۋگە قاتىستى.
باقبەرگەن امالبەك,
«ەگەمەن قازاقستان».
سۋرەتتى تۇسىرگەن
ەرمۇرات دوسىموۆ.
*قاراعاندى
قاراعاندى قالاسىندا قازاقستان رەسپۋبليكاسى پارلامەنتى ءماجىلىسى مەن بارلىق دەڭگەيدەگى ءماسليحاتتار دەپۋتاتتارىنىڭ كەزەكتەن تىس سايلاۋىندا باسىم داۋىسقا يە بولعان جەڭىمپازداردىڭ فورۋمى وبلىس اكىمدىگى الدىنداعى تاۋەلسىزدىك الاڭىندا ءوتتى.
سالتاناتتى جيىندى اشقان وبلىس اكىمى نۇرمۇحامبەت ابدىبەكوۆ جيىلعان قاۋىمدى سايلاۋداعى تاريحي جەڭىسپەن قۇتتىقتاپ, قاراعاندى وڭىرىندە بۇل ماڭىزى زور ساياسي شارانىڭ جوعارى دەڭگەيدە ۇيىمداستىرىلىپ, دەموكراتيالىق تالاپتارعا ساي وتكەنىن ايتتى.
«بۇل جەڭىس ءبىزدىڭ قوعامنىڭ تۇراقتىلىق پەن وركەندەۋدى, جارقىن بولاشاقتى تاڭداعانىن كورسەتتى, – دەدى ءوڭىر باسشىسى. – ۇزاق جولدى باعىندىردىق, الدا جاڭا مىندەتتەر تۇر. سوندىقتان دا وسى سايلاۋدا ەلدىڭ گۇلدەنگەن ەرتەڭى ءۇشىن ەرىكتى تۇردە تاڭداۋ جاساۋ اسا ماڭىزدى بولدى».
جالپى, وبلىستا سايلاۋعا تاڭداۋشىلاردىڭ 79 پايىزى قاتىسىپ, «نۇر وتان» پارتياسى ايقىن باسىمدىقپەن جەڭىسكە جەتتى.
سايلاۋدىڭ ارقا وڭىرىندە زاڭعا ساي, اشىق جانە ءادىل تۇردە وتكەنىن حالىقارالىق بايقاۋشىلار دا ءبىراۋىزدان اتاپ ءوتتى. مىسالى, قاراعاندى وبلىسىندا حالىقارالىق بايقاۋشى رەتىندە جۇمىس ىستەگەن بۇكىلرەسەيلىك قوعامدىق پىكىردى زەرتتەۋ ورتالىعىنىڭ باس ديرەكتورى ۆالەري فەدوروۆ: «قازاقستانداعى سايلاۋ – حالىقتىڭ ءوز قالاۋىن ەركىن ءبىلدىرۋى», دەگەن جوعارى باعا بەردى.
سونىمەن قاتار, جەڭىمپازدار فورۋمدارى وبلىستىڭ باسقا دا ءىرى قالالارى مەن اۋدان ورتالىقتارىندا ءوتتى. مىسالى, جەزقازعان قالاسىندا جەڭىمپازدار «نۇر وتان» پارتياسى عيماراتىنىڭ الدىنا جيىلىپ, سالتاناتتى جيىن ۇيىمداستىردى.
كەشەگى سايلاۋدى جەزقازعاندىقتار دا جيناقى وتكىزىپ, داۋىس بەرۋ شاراسىنا تۇرعىنداردىڭ 79 پايىزى قاتىستى. جەڭىمپاز «نۇر وتان» پارتياسى بولسا 82,57 پايىز داۋىس الىپ, ەل ىشىندە ابىروي-بەدەلگە يە ساياسي كۇش ەكەنىن تاعى ءبىر مارتە دالەلدەدى.
قاراعاندى قالاسى مەن وبلىستىڭ باسقا دا وڭىرلەرىندە وتكەن جەڭىمپازدار فورۋمىندا حالىق ءوزى سەنىم ارتقان پارتيانىڭ جەڭىسىنە شىن جۇرەكتەن قۋانىپ, جەرگىلىكتى ونەرپازدار دايىنداعان كونتسەرتتى تاماشالاپ, اسا كوتەرىڭكى كوڭىل-كۇيدە بولدى.
قايرات ءابىلدينوۆ,
«ەگەمەن قازاقستان».
*
قوستاناي
بيىل ناۋرىزبەن قاتار كەلگەن قازاقستان پارلامەنتى ءماجىلىسى مەن بارلىق دەڭگەيدەگى ءماسليحاتتار سايلاۋىندا بۇكىل قازاقستاندىقتار داۋىس بەرىپ, ءوز تاڭداۋىن جاسادى. وسى ساياسي باسەكەدە «نۇر وتان» پارتياسىنىڭ تاعى دا ءباسى بيىك بولدى. قوستانايدا ە.ومىرزاقوۆ اتىنداعى وبلىستىق فيلارمونيانىڭ كونتسەرت زالىنا وڭىردەگى پارتيا مۇشەلەرى, جاستار, زيالى قاۋىم وكىلدەرى جينالىپ, پارتيا جەڭىسىن اتاپ ءوتتى.
الدىمەن جينالعاندار كەشە تىكەلەي ەفير ارقىلى بەرىلگەن ورتالىق سايلاۋ كوميسسياسىنىڭ توراعاسى قۋاندىق تۇرعانقۇلوۆتىڭ مالىمدەمەسىن تاعى دا قايتالاپ تىڭدادى. سايلاۋ ناۋقانىنا قاتىسقان التى پارتيانىڭ اراسىندا «نۇر وتان» تاعى قارا ءۇزىپ, العا شىقتى. سايلاۋدىڭ الدىن الا قورىتىندىسى بويىنشا «نۇر وتان» پارتياسى بارلىق داۋىستىڭ 82,15 پايىزىنا يە بولدى. قوستاناي ءوڭىرىنىڭ تۇرعىندارى دا ساياسي ناۋقاندا بەلسەندىلىك كورسەتتى. ورتالىق سايلاۋ كوميسسياسىنىڭ مالىمەتى بويىنشا, سايلاۋ كۇنى داۋىس بەرۋ پايىزى جاعىنان قوستانايلىق سايلاۋشىلار تۇسكە دەيىن-اق كوش باستاعان بولاتىن. جاۋىپ تۇرعان قارعا, اۋا رايىنىڭ قولايسىز, قۇبىلۋىنا قاراماستان, وبلىس سايلاۋشىلارىنىڭ وتە جوعارى بەلسەندىلىك تانىتقان جەڭىمپاز پارتيا فورۋمىندا وبلىس اكىمى ارحيمەد مۇحامبەتوۆ تە اتاپ ءوتتى.
– ساياسي ناۋقان – ەلدىڭ بىرلىگىنە سىن. ال ءبىزدىڭ ەلىمىز وسى سايلاۋدا تاعى دا ءوزىنىڭ بىرتۇتاستىعىن كورسەتە ءبىلدى. سايلاۋدىڭ الدىن الا قورىتىندىسى بويىنشا, وبلىسىمىزداعى سايلاۋشىلاردىڭ 82 پايىزى «نۇر وتان» پارتياسىنا داۋىس بەرگەن. بۇگىنگى تاڭدا «نۇر وتان» پارتياسىنىڭ وڭىردە 68 مىڭ مۇشەسى بار. ەلىمىزدىڭ جەتەكشى ساياسي ۇيىمى وسىمەن قاتارىنان ءۇشىنشى رەت ايقىن باسىمدىقپەن جەڭىسكە جەتىپ وتىر. حالىق ەلباسىمىزعا, پارتياعا, كەلەشەككە سەنگەندىگىنەن وسىنداي دۇرىس, ءادىل تاڭداۋ جاسادى, – دەدى وبلىس اكىمى ارحيمەد مۇحامبەتوۆ.
مۇنان كەيىن وبلىستىق ارداگەرلەر كەڭەسىنىڭ توراعاسى كەنجەبەك ۇكين, «نۇر وتان» پارتياسىنىڭ مۇشەلەرى ىبىراش ەستاەۆ, الما دوسجانوۆا, ەلەنا دانيلوۆا تاعى باسقالار وسىناۋ قۋانىشقا ءوز تىلەكتەرىن قوستى, جەتەكشى پارتيامەن ەلىمىزدىڭ العا باسا بەرەتىندىگىنە سەنىم ءبىلدىردى. ءوڭىر ونەرپازدارىنىڭ ءان-جىرى, بي مەن كۇيى «نۇر وتان» پارتياسىنىڭ جەڭىسىن ءسۇيىنشىلەپ, شاشۋ بولىپ شاشىلدى.
ءنازيرا جارىمبەتوۆا,
«ەگەمەن قازاقستان».
*
قىزىلوردا
ن.بەكەجانوۆ اتىنداعى وبلىستىق مۋزىكالىق دراما تەاترىندا «نۇر وتان» پارتياسىنىڭ جەڭىسىنە ارنالعان «جەڭىمپازدار فورۋمى» ءوتتى.
فورۋمدا «نۇر وتان» پارتياسى قىزىلوردا وبلىستىق فيليالىنىڭ ءتوراعاسى, وبلىس اكىمى قىرىمبەك كوشەرباەۆ بۇل جەڭىس تورتكىل دۇنيەگە ەلىمىزدىڭ تۇتاستىعىن تاعى دا ءبىر پاش ەتكەنىن ايتىپ ءوتتى. قىزىلوردالىقتاردىڭ 81,75 پايىزى سايلاۋعا قاتىسىپ, بۇل جولى دا ەرەكشە بەلسەندىلىك كورسەتتى. تاڭداۋ جاسالار ساتتە وبلىس سايلاۋشىلارىنىڭ 82 پايىزدان استامى ءوز سەنىمىن جەتەكشى پارتياعا امانات ەتىپ تاپسىردى.
سايلاۋدا جەڭىسكە جەتكەن جەرلەستەرىن قۇتتىقتاعان ايماق باسشىسى التىنشى شاقىرىلعان ءماسليحاتتار قۇرامى مەن قۇرىلىمىنا قاتىستى جاڭالىقتاردى دا اتاپ ءوتتى. بيىلعى دەپۋتاتتىق قۇرامنىڭ 65 پايىزى جاڭارىپ وتىر. وبلىستىق, قالالىق, اۋداندىق ماسليحاتتارعا سايلانعان 147 دەپۋتاتتىڭ 23-ءى ايەلدەر قاۋىمىنىڭ وكىلدەرى. ياعني, الدىڭعى قۇراممەن سالىستىرعاندا ايەلدەر ۇلەسى 9-دان 17 پايىزعا دەيىن, ال جاستار ۇلەسى بەس ەسە وسكەن. وبلىس باسشىسى جاڭارىپ, جاسارعان قۇرامداعى حالىق قالاۋلىلارى بەلسەندى جۇمىس ىستەپ, ءوڭىر ەكونوميكاسى مەن الەۋمەتتىك دامۋىنا تىڭ سەرپىن بەرەتىنىنە سەنىم ءبىلدىردى.
مۇنان كەيىن فورۋمدا قازاقستان پارلامەنتى ءماجىلىسى دەپۋتاتتىعىنا «نۇر وتان» پارتياسى ءتىزىمى بويىنشا كانديدات بالايىم كەسەباەۆا, جەرگىلىكتى ماسليحاتتاعى جاس دەپۋتاتتار اراسىنان تاۋەلسىزدىكتىڭ قۇرداسى ەرجان جاقىپوۆ, جاڭاقورعان اۋداندىق ءماسليحاتىنىڭ دەپۋتاتى زاعيپا ءابجالەلوۆا ءسوز سويلەپ, جەرلەستەرىن سايلاۋداعى ايقىن جەڭىستەرىمەن قۇتتىقتاپ, ەلىمىزدىڭ ءوسىپ-وركەندەۋى جولىندا ماعىنالى ماقساتتاردى جۇزەگە اسىرۋعا كۇش-جىگەرلەرىن ايامايتىنىن جەتكىزدى. مۇنان سوڭ قاتىسۋشىلار شىرقاعان «اتامەكەن» انىمەن فورۋم اياقتالدى.
ەرجان بايتىلەس,
«ەگەمەن قازاقستان».
*
ورال
كەشە ورال قالاسىنداعى «نۇر وتان» ساياسي پارتياسى باتىس قازاقستان وبلىستىق فيليالى عيماراتىنىڭ ءۇلكەن ءماجىلىس زالى حالىققا لىق تولدى. مۇندا پارلامەنت ءماجىلىسى سايلاۋىندا «نۇر وتان» پارتياسىنىڭ ايقىن باسىمدىقپەن داۋىس الۋىنا بايلانىستى جەڭىمپازدار فورۋمى وتكىزىلدى. فورۋمدا العاشقى ءسوزدى «نۇر وتان» پارتياسى باتىس قازاقستان وبلىستىق فيليالىنىڭ ءتوراعاسى, وبلىس اكىمى نۇرلان نوعاەۆ الىپ, بارشا اقجايىق جۇرتشىلىعىنا سايلاۋ كۇنى كورسەتكەن بەلسەندىلىگى ءۇشىن ريزاشىلىعىن جەتكىزدى, ءسويتىپ, ولاردى بۇگىنگى جارقىن جەڭىسىمەن قۇتتىقتادى. سونىڭ ىشىندە «نۇر وتان» پارتياسىنىڭ مەرەيى ۇستەم ءتۇسىپ وتىر. بۇل بارشا قازاقستان حالقىنىڭ ءوزارا بىرلىگى مەن ىنتىماعىنىڭ ناتيجەسى. جاسامپازدىقتىڭ جارقىن جەمىسى. سايلاۋ الدىندا «نۇر وتان» پارتياسى جانىنان قۇرىلعان سايلاۋالدى شتابتارى مەن قوعامدىق ۇيىمداردىڭ بىرلەسكەن ءىس-قيمىلىنىڭ قورىتىندىسى. ەلىمىزدە وسىنداي جەڭىستەر مەن جەتىستىكتەر كوپ بولا بەرسىن, دەدى ول ودان ءارى.
بۇدان كەيىن جەڭىمپاز پارتيا وكىلدەرىن قۇتتىقتاعان قازاقتىڭ كورنەكتى اقىن قىزى اقۇشتاپ باقتىگەرەەۆا ءبۇگىنگى «نۇر وتان» پارتياسىنىڭ سايلاۋداعى جارقىن جەڭىسى – ەلدىكتىڭ باستى ءبىر كورىنىسى مەن ۇلگىسى بولا بىلگەنىن ايتىپ بەردى. بارشا الەمدىك قاۋىمداستىققا قازاقستان دەگەن ەل بارىن, اۋىزبىرشىلىگى مىقتى قازاق دەگەن مەملەكەت قۇراۋشى ۇلت بارىن تاعى ءبىر مارتە پاش ەتتىك. بۇعان ءماجىلىس پەن ءماسليحاتتار سايلاۋىنا الەمنىڭ تۇكپىر-تۇكپىرىنەن كەلگەن شەتەلدىك بايقاۋشىلار دا كوزدەرىن جەتكىزىپ, ونىڭ ءادىل دەموكراتيالىق سيپاتىن ايعاقتاپ وتىر. حالىقتىڭ كوزى كورەگەن. حالىقتىڭ كوزى قىراعى. حالىقتان اسقان دانا جوق. حالقىمىزدىڭ تاڭداۋى «نۇر وتانعا» ءتۇسۋى دە ونىڭ وسىنداي بايقاعىشتىعىنان, وعان سەنىم ارتۋىنان دەپ بىلەمىن. ەركىن ەلدىڭ ەرتەڭى جاستار. سايلاۋ كۇنى مەن ولاردىڭ سايلاۋ ۋچاسكەلەرىندە كوزدەرى ۇشقىن اتىپ جالىنداپ جۇرگەنىن, وسىنداي ءورشىل كوڭىل كۇيدە ۋرنالارعا سايلاۋ بيۋللەتەندەرىن تاستاعانىن كورىپ قۋاندىم. ورتاق جەڭىسىمىز قۇتتى بولسىن اعايىن! – دەپ اعىنان جارىلدى اقىن اپامىز.
فورۋمدا «نۇر وتان» پارتياسى ورال قالالىق فيليالى توراعاسىنىڭ ءبىرىنشى ورىنباسارى دارحان قادىراليەۆ ەلىمىزدە ورنىعا باستاعان ادامي جانە قوعامدىق قۇندىلىقتاردىڭ ءماجىلىس پەن ءماسليحاتتار سايلاۋىن سونى سەرپىنمەن ءوتكىزۋگە اسەرى تيگەنىنە توقتالدى. قازاقستان حالقى سايلاۋ كۇنى وڭ ءارى دۇرىس تاڭداۋ جاسادى. بۇل ءبارىمىزدىڭ ورتاق جەڭىسىمىز, دەپ تۇيىندەدى ول ءوز ويىن.
سونداي-اق, «نۇر وتان» پارتياسى جانىنان سايلاۋ الدىندا قۇرىلعان قوعامدىق شتابتىڭ مۇشەلەرى سالتانات تۇمانباەۆا مەن ليليا حايرۋللينا كەشەگى سايلاۋ كۇنى تاۋەلسىزدىك تۋىن بيىككە تاعى ءبىر جارقىراتا جەلبىرەتۋگە جول اشقانىن جەتكىزدى. بۇل كۇن الداعى ىزگىلىكتى ىستەر مەن تىندىرىمدى دا تياناقتى مەملەكەتتىك باعدارلامالاردى جۇزەگە اسىرۋدىڭ جانە داعدارىستى ەركىن ەڭسەرە ءبىلۋدىڭ اقجولتاي, باستاماشى كۇنى بولىپ قالادى, دەدى ولار.
تەمىر قۇسايىن,
«ەگەمەن قازاقستان».
سۋرەتتى تۇسىرگەن
رافحات حالەلوۆ.
*
وسكەمەن
شىعىس ءوڭىرى «نۇر وتان» پارتياسىنىڭ پارلامەنتتىك سايلاۋداعى جەڭىسىنە شات-شادىمان مەرەكەمەن قولداۋ كورسەتتى. «بىرلىك! تۇراقتىلىق! جاسامپازدىق!» اتتى جەڭىمپازداردىڭ وڭىرلىك فورۋمىندا شىعىسقازاقستاندىقتار تاۋەلسىز ءھام قۋاتتى قازاقستاندى قۇرۋعا مۇمكىندىك بەرەتىن ماڭىزدى وزگەرىستەرگە قاتىسۋعا ءارقاشان دا ءازىر ەكەندىكتەرىن جەتكىزدى. وسكەمەندەگى اباي ەسكەرتكىشىنىڭ الدىندا وبلىس ورتالىعىنىڭ مىڭداعان تۇرعىندارى مەن قوناقتارى قۋانىش كەرنەگەن مەرەكەلىك كوڭىل-كۇيمەن باس قوستى. سايلاۋدىڭ الدىن الا شىعارىلعان قورىتىندىلارى ءوڭىر تۇرعىندارىنىڭ بەلسەندىلىگىن بايقاتىپ, «نۇر وتان» پارتياسىنىڭ حالىقتىڭ جوعارى قولداۋىنا يە بولعانىن كورسەتتى. ياعني, وبلىس حالقىنىڭ 82,44 پايىزى ءماجىلىس پەن ءماسليحاتتار سايلاۋىنا قاتىستى.
فورۋم بارىسىندا ەلىمىزدىڭ ساياسي عۇمىربايانىنداعى جاڭا كەزەڭنىڭ باستالۋىمەن بىرگە حالىقتى ءھام دەپۋتاتتىققا سايلانۋشىلاردى «نۇر وتان» پارتياسى شىعىس قازاقستان وبلىستىق فيليالىنىڭ توراعاسى, وبلىس اكىمى دانيال احمەتوۆ قۇتتىقتادى.
– «نۇر وتان» پارتياسى – ازاماتتاردىڭ ءال-اۋقاتى مەن ەلىمىزدى ءارى قاراي دامىتۋعا باعىتتالعان پرەزيدەنت رەفورمالارىنىڭ قوزعاۋشى كۇشى. شىعىسقازاقستاندىقتار ءوز تاڭداۋىن جاساي وتىرىپ, ۇلى زامانداسىمىز نۇرسۇلتان ءابىش ۇلى نازارباەۆتىڭ توڭىرەگىنە توپتاستى. وسىلايشا, قازاقستاندى اۋقىمدى تۇردە جاڭعىرتۋ ءمىندەتتەرىن شەشۋگە ءاردايىم ازىرلىگىن ءبىلدىردى, – دەدى دانيال احمەتوۆ.
سونىمەن بىرگە, ءوڭىر باسشىسى جەرلەستەردى كوكتەمنىڭ كوركەم مەرەكەسى – ءاز ناۋرىزبەن قۇتتىقتاپ, ءار وتباسىعا باقىت پەن شاتتىق تىلەدى.
ايتا كەتەلىك, رەسپۋبليكا الاڭىنداعى ءىس-شارادا ارنايى كيىز ۇيلەر تىگىلىپ, مەرەكەلىك ساۋدا-ساتتىق, سپورتتىق جارىستار مەن بايقاۋلار ءوتتى. سونداي-اق, «نۇر وتان» پارتياسى تىككەن كيىز ۇيگە كەلگەن تۇرعىندار جەڭىسپەن قۇتتىقتاپ, ۇلتتىق تاعامنان ءدام تاتتى.
دۋمان اناش,
«ەگەمەن قازاقستان».
*
پەتروپاۆل
وبلىس ورتالىعىنداعى سپورت سارايىندا وتكەن فورۋمعا «نۇر وتان» پارتياسىنىڭ مىڭداعان قولداۋشىلارى باس قوسىپ, «قازاقستان! نۇرسۇلتان! نۇر وتان!», «العا, قازاقستان! جاسا, نۇر وتان!», «بىرلىك. تۇراقتىلىق. جاسامپازدىق!» دەپ ۇرانداتتى.
ەلىمىزدەگى جەتەكشى ساياسي ۇيىمنىڭ پارلامەنت ءماجىلىسى مەن بارلىق دەڭگەيدەگى ءماسليحاتتار دەپۋتاتتارىنىڭ سايلاۋىندا ايقىن باسىمدىقپەن جەڭىسكە جەتۋىنە وراي ۇيىمداستىرىلعان ايتۋلى شارادا ايماق باسشىسى, «نۇر وتان» پارتياسى سقوف توراعاسى ەرىك سۇلتانوۆ جينالعاندارعا جالىندى ءسوز ارنادى. «ءبارىڭىزدى ەلباسى نۇرسۇلتان نازارباەۆ توراعاسى بولىپ تابىلاتىن پارتيانىڭ ورتاق جەڭىسىمەن قۇتتىقتايمىن. پرەزيدەنت حالىق بىرلىگىن نىعايتۋ, تۇراقتىلىقتى ساقتاۋ, ەكونوميكالىق ءوسىمدى قامتاماسىز ەتۋ باعدارلامالارىن ۇسىنعانىن, بۇل ماسەلەلەردىڭ ساياسي ۇيىمنىڭ تۇعىرناماسىندا ايقىن بەلگىلەنگەنىن ءبارىڭىز جاقسى بىلەسىزدەر», دەي كەلىپ, ەرىك حامزا ۇلى سولتۇستىكقازاقستاندىقتاردىڭ ۇلكەن جاۋاپكەرشىلىك پەن ساياسي بەلسەندىلىك تانىتقاندارىنا ريزاشىلىق ءبىلدىردى.
فورۋمدا وبلىستىڭ قۇرمەتتى ازاماتى قۇدايبەرگەن قاليەۆ, «ءمامبەتوۆ جانە ك» كومانديتتىك سەرىكتەستىگىنىڭ اتقارۋشى ديرەكتورى ارىستان ءجۇنىسوۆ, سولتۇستىك قازاقستان گۋمانيتارلىق-تەحنيكالىق كوللەدجىنىڭ ديرەكتورى الەكساندر مەرك, وبلىستىق بالالار اۋرۋحاناسىنىڭ باس دارىگەرى ولەگ زاۆيالوۆ, «ۆودا حرۋستالنايا» جشس ديرەكتورى الەكساندر كازانتسەۆ, «قوعامدىق كەلىسىم» مەملەكەتتىك كاسىپورنىنىڭ ديرەكتورى اسەمگۇل ەسقوجا, م.قوزىباەۆ اتىنداعى سقمۋ ستۋدەنتى ەكاتەرينا ستاروستينا ءسوز ءسويلەپ, شىن كوڭىلدەن شىققان جۇرەكجاردى تىلەكتەرىن جولدادى.
جيىن سوڭى جەرگىلىكتى كوركەمونەرپازداردىڭ كونتسەرتتىك باعدارلاماسىنا ۇلاسىپ, پاتريوتتىق رۋحتاعى اسەم اندەرمەن كومكەرىلدى.
ءومىر ەسقالي,
«ەگەمەن قازاقستان».
*
تاراز
حالقىمىزدىڭ الەم الدىنداعى ابىرويىن تاعى ءبىر اسقاقتاتقان سايلاۋ ۇلىستىڭ ۇلى كۇنى – ناۋرىز مەيرامىمەن تۇسپا-تۇس كەلدى. قازاقستان رەسپۋبليكاسى پارلامەنت ءماجىلىسىنىڭ كەزەكتەن تىس سايلاۋىندا بارشا وتانداستارىمىز ءوز تاڭداۋىن جاسادى. «نۇر وتان» پارتياسى ۇلكەن ناتيجەلەرمەن جەڭىسكە جەتتى. «نۇر وتاننىڭ» جەڭىسى – قازاقستاننىڭ كەزەكتى بيىك بەلەسى. بارشا قازاقستاندىقتار سياقتى, جامبىلدىقتار دا «نۇر وتان» پارتياسىنىڭ كۇش-جىگەرى مەن بولاشاق جوسپارلارىن قولدايتىنىن ءبىلدىردى.
وسىعان بايلانىستى كەشە تاراز قالاسىندا «بىرلىك! تۇراقتىلىق! جاسامپازدىق!» اتتى جەڭىمپازدار فورۋمى ءوتتى. فورۋمدا مادەنيەت قايراتكەرى, تاراز قالاسى مەن تالاس اۋدانىنىڭ قۇرمەتتى ازاماتى الىبەك امزە ۇلى, «ايۆەنگو» جشس ديرەكتورى ليۋبوۆ پوپوۆا, سونىمەن قاتار, جاس اقىن بەگايدار امانباەۆ, «قازفوسفات» جشس سارى فوسفور ءوندىرۋ تسەحىنىڭ اپپاراتشىسى الەكساندر پيا ءسوز سويلەپ, «نۇر وتان» پارتياسىمەن بىرگە ەلىمىزدىڭ دە ەڭسەسى بيىكتەي بەرەتىنىن پاش ەتتى.
– بولاشاعىمىزدىڭ جارقىن ەكەنىنە كۇمانىمىز جوق. ويتكەنى, حالقىمىز ەلباسىنىڭ دانا دا دارا ساياساتى ارقاسىندا تىنىش, اسپانى اشىق, تاماشا ەلدە ءومىر ءسۇرىپ جاتىر. قازاقستاننىڭ الەۋمەتتىك-ەكونوميكالىق, وندىرىستىك سالادا, حالىقارالىق ارەنادا قول جەتكىزگەن ۇلكەن تابىستارىندا «نۇر وتان» پارتياسىنىڭ دا ەلەۋلى ۇلەسى بار دەپ بىلەمىز, – دەدى جامبىل وبلىسىنىڭ اكىمى كارىم كوكىرەكباەۆ.
شىنىندا, «نۇر وتان» پارتياسىنىڭ ماقساتى – ءبىر بولۋ, بىرگە بولۋ, ۇلتقا قامقور, ۇرپاققا قورعان بولۋ. ەندەشە, بارشا قازاقستاندىقتارعا ورتاق جەڭىس قۇتتى بولسىن! تاۋەلسىزدىگىمىز باياندى, مەملەكەتىمىز ماڭگى, ەڭسەلى ەلىمىزدىڭ كەلەشەگى جارقىن بولعاي!
فورۋمنىڭ سوڭى كونتسەرتتىك باعدارلاماعا ۇلاستى.
ورالحان ءداۋىت,
«ەگەمەن قازاقستان».
*
تالدىقورعان
ورتالىق الاڭ تورىندە سارى, كوك ءتۇستى ماتالار «بىرلىك! تۇراقتىلىق! جاسامپازدىق!» دەگەن جازۋلارمەن جەلبىرەيدى. بۇل «نۇر وتان» پارتياسىنىڭ پارلامەنت ءماجىلىسى مەن بارلىق دەڭگەيدەگى ءماسليحاتتار دەپۋتاتتارىنىڭ سايلاۋىندا جەڭىسكە جەتكەندىگىن ايتقىزباي-اق اڭعارتىپ تۇر. وسى قۋانىشىن ەلمەن ءبولىسۋ ءۇشىن نۇروتاندىقتار جالپىحالىقتىق سالتاناتتى باسقوسۋ ۇيىمداستىردى. تابيعات-انا دا بۇل شاتتىقتى قۇپ كورگەندەي, جادىراي جىلىلىق سەۋىپ تۇر. كۇن مەن ءتۇن تەڭەلەتىن وسى تاۋلىكتىڭ ۇلكەن قۋانىشىن بولىسكەن جاميعات تا شات. ءاز ناۋرىزدىڭ العاشقى كۇنىن جەتىسۋ حالقى وسىلاي قارسى الىپ, قازاقى دانالىقپەن «قۋانىشتى ءبولىسسە كوبەيەدى» دەگەن ءتامسىلدى ءوزارا ايتىسۋدا.
ساحنا تورىنە شىعىپ العاشقى ءسوزدى العان «نۇر وتان» پارتياسى ساياسي كەڭەسىنىڭ مۇشەسى, الماتى وبلىسى اكىمىنىڭ ورىنباسارى باقتيار ونەرباەۆ ەرەكشە ەكپىنمەن, كوڭىلدەرگە قۋانىش تولتىرا, ساياسي ناۋقاندا ەل ءوز تاڭداۋىن جاساعاندىعىن ايتا كەلىپ, پارلامەنت ءماجىلىسىنىڭ دەپۋتاتتىعىنا سايلاۋعا تۇسكەن 124 نۇروتاندىقتىڭ 10-ى الماتى وبلىسىنان قوسىلعاندىعىنا توقتالدى. ارينە, بۇل جەڭىس سايلاۋالدى ۇگىت-ناسيحات جۇمىسىنىڭ زاڭناما تالابىنا ساي, جوسپارلى تۇردە اتقارىلعاندىعىنان دا ەل قۇلاعدار ەتىلدى.
كەلەسى كەزەكتە, جەڭىمپاز پارتيا اتىنان دينا نۇرپەيىسوۆا, جاستار وكىلى ساعي اتامحانوۆ, قازاقستان حالقى اسسامبلەياسى اتىنان ناتاليا بەلىح, عالىم سايدا سادۋاقاسوۆا جانە باسقا بەلسەندىلەر «نۇر وتان» پارتياسىنىڭ بارلىق مۇشەلەرىن جەڭىسپەن قۇتتىقتادى. ءسويتىپ, تالدىقورعاندىقتار ەل تىنىشتىعى بىرلىگى, تاتۋلىعى ءۇشىن كۇنى كەشە ازاماتتىق پارىزىن وتەپ, «نۇر وتان» پارتياسىن جاقتاپ داۋىس بەرگەندىكتەرىنە رازى بولا, ەڭ باستىسى, جاقسى جەتىستىككە جەتكەنىنە قۋانا تاراستى.
نۇربول الدىباەۆ,
«ەگەمەن قازاقستان».
*
شىمكەنت
شىمكەنتتەگى جەڭىل اتلەتيكا مانەجىندە «نۇر وتان» پارتياسى وڭتۇستىك قازاقستان فيليالىنىڭ ۇيىمداستىرۋىمەن جەڭىمپازدار فورۋمى ءوتتى. LED ەكران ارقىلى ءسوز سويلەگەن ورتالىق سايلاۋ كوميسسياسىنىڭ توراعاسى قۋاندىق تۇرعانقۇلوۆ سايلاۋ قورىتىندىسىن جاريا ەتتى.
– «نۇر وتان» – حالىقتىق پارتيا. ونىڭ وسى سايلاۋدا جەڭىسكە ەركىن جەتەتىنىنە ەشكىمنىڭ ءشۇباسى بولعان جوق, – دەيدى «وقو ازاماتتىق اليانسى» زاڭدى تۇلعالار بىرلەستىگىنىڭ توراعاسى, وبلىستىق ءماسليحاتتىڭ دەپۋتاتى ءشارىپبەك جامالبەكوۆ. – بۇل سايلاۋ دوداسىندا «نۇر وتان» 82,15 پايىز داۋىس جيناپ, مارەگە شاشاسىنا شاڭ جۇقپاي جەتتى. جەڭىسكە جەتۋ بار, مويىنعا العان جاۋاپكەرشىلىكتى اياعىنا جەتكىزىپ ورىنداۋ جانە بار.
بۇل حالىقتىق پارتياعا اينالعان «نۇر وتاننىڭ» قولىنان كەلەدى.
سالتاناتتى شارادا مىنبەگە كوتەرىلگەن وبلىس اكىمى بەيبىت اتامقۇلوۆ جۇرتشىلىقتى شىنايى جەڭىسىمەن قۇتتىقتادى.
وبلىستا 1029 سايلاۋ ۋچاسكەسى جۇمىس جاسادى. داۋىس بەرۋگە قۇقىعى بار 1 317 255 سايلاۋشى تىركەلگەن. ەل ءۇشىن ۇلكەن ماڭىزى بار شارادا وڭتۇستىكقازاقستاندىقتار ۇلكەن ۇيىمشىلدىق تانىتىپ, 85,06 پايىز داۋىس بەردى. بۇل قازاقستاننىڭ بارشا وبلىس, قالالارىمەن سالىستىرعاندا جاقسى كورسەتكىش.
وسى دەرەكتەردى تىلگە تيەك ەتكەن وبلىس باسشىسى:
– سايلاۋدا «نۇر وتان» پارتياسى ەڭ كوپ داۋىس جينادى. دەمەك, ءبىزدىڭ تۇراقتىلىقتى, دامۋدى تاڭدادى. «نۇر وتان» پارتياسىنا داۋىس بەرۋ ارقىلى ەلباسى ساياساتىن قولدايتىندىقتارىن كەزەكتى رەت كورسەتتى. «نۇر وتاننىڭ» جەڭىسى – بۇكىل ەلدىڭ ورتاق جەڭىسى! – دەدى.
فورۋمدا ەل اعالارى, «نۇر وتان» پارتياسى اتىنان سايلاۋعا ءتۇسىپ جەڭىسكە جەتكەن دەپۋتاتتار, ەتنومادەني ءبىرلەستىكتەر وكىلدەرى جانە جاستار ءسوز الىپ, بۇل جەڭىستىڭ زاڭدى ەكەندىگىن, «نۇر وتان» پارتياسى حالىقتىق پارتياعا اينالعاندىعىنىڭ جەمىسى ەكەندىگىن ايتتى.
جيىندا ءشامشى قالداياقوۆ اتىنداعى وبلىستىق فيلارمونيانىڭ ءانشىلەرى مەن بيشىلەرى ونەر شۋاعىن شاشتى.
بۇل سايلاۋ بارشا قازاقستاندىقتار سياقتى, وڭتۇستىك تۇرعىندارىنىڭ دا كوشباسشى پارتياعا بار ءۇمىتىن جالعاپ وتىرعاندىعىن تاعى دا بايقاتتى.
باقتيار تايجان,
«ەگەمەن قازاقستان».
