ۇلىستى شاتتىققا بولەگەن ۇلىق مەيرام
كەشە مەملەكەت باسشىسى نۇرسۇلتان نازارباەۆ استانادا ناۋرىز مەرەكەسىنە قاتىستى. ەلباسى ادەتتەگىدەي بۇل كۇنى ءسان-سالتاناتى كەلىسىپ, ساپ تۇزەگەن اقشاڭقان كيىز ۇيلەرى كوز تارتقان ەتنواۋىلدى ارالاپ كوردى.
ارينە, بۇل كۇن ونەرپاز بىتكەن ءساندى كيىنىپ, ۇلتتىق ناقىشقا مالىندى. اۋىلدىڭ اينالاسى قىزىل-سارى گۇلگە بولەنىپ, جەردى دە جاسىل جاپقان. استانانىڭ ءالى دە بولسا كوكتەمگە بوي الدىرا قويماعان قارا سۋىعى دا بۇل كۇنى, ءدال وسى ەتنواۋىلدا ساپ تىيىلعانداي. كۇن جادىراپ, اسپاندا ءان قالىقتاپ, اينالانى شاتتىق كەرنەدى.
ەلباسى ناۋرىز تويلانىپ جاتقان ەتنواۋىلدا قازاقستان حالقىن ۇلىستىڭ ۇلى كۇنى – ناۋرىز مەيرامىمەن قۇتتىقتادى.
«ءاز-ناۋرىز بارشا حالقىمىزعا قۇتتى بولسىن! وسى جەرگە جينالعان حالىققا, بارلىق قازاقستاندىقتارعا شىن جۇرەگىممەن باق-بەرەكە تىلەيمىن. وسىناۋ ىزگى مەرەكە پارلامەنت سايلاۋىن وتكىزۋ شاراسىمەن قاتار كەلدى. قازاقستاندىقتار ءبىر ءۇيدىڭ بالاسىنداي تۇتاستىعىن كورسەتتى. حالقىمىزدىڭ وسى بىرلىگى مىزعىمايتىن بولسىن. ءبىزدىڭ جاساپ جاتقانىمىزدىڭ ءبارى قازاقستاندىقتاردىڭ كەيىنگى ۇرپاعىنا مۇرا بولىپ قالادى.
ءبىزدىڭ بولاشاققا اپاراتىن جولىمىز زور جەتىستىكتەر مەن تاۋەلسىزدىگىمىزدىڭ يگىلىكتەرى ارقىلى جارقىراپ تۇراتىن بولسىن. بارشا تابيعات جاڭارعان ناۋرىز مەرەكەسىندە ادامدار ءاردايىم ءبىر-بىرىنە دەگەن وكپە-رەنىشىن كەشىرگەن, مۇقتاجدارعا كومەكتەسكەن, باقىت تىلەپ, اعاش وتىرعىزعان جانە بۇلاق كوزىن اشقان. حالىق بۇل كۇنى تىلەگەن تىلەكتەر مىندەتتى تۇردە ورىندالاتىنىن ايتادى. مەن ءاربىر شاڭىراققا باقىت, شاتتىق شۋاعىن جانە بار جاقسىلىقتى تىلەيمىن», – دەدى قازاقستان پرەزيدەنتى.
مەرەكەلىك ءىس-شارا بارىسىندا كونتسەرتتىك باعدارلاما, تەاترلاندىرىلعان كورىنىستەر, سپورت سايىستارى, كولونەرشىلەر اۋىلى مەن ۇلتتىق سالت-ءداستۇردى تانىستىرۋ شارالارى ۇيىمداستىرىلدى. تايقازان جانىندا تەاترلاندىرىلعان قويىلىم كورسەتىلىپ, قوناقتارعا ناۋرىز كوجە ۇسىنىلدى. ەتنواۋىلدىڭ كىرە بەرىسىندە حالىق ءبيى ءانسامبلى «16 قىز» ءبيىن ورىنداپ, ۇلتتىق كيىم كيگەن قىزدار شاشۋ شاشتى.
ورتالىق كىرەبەرىستە شىعىس بازاردىڭ ينتەراكتيۆتى ۋچاسكەسى – قولونەرشىلەر اۋىلى ورنالاستى, وندا قىششىلار, زەرگەرلەر, كيىز باسۋ جانە اعاشقا ورنەك جاساۋ شەبەرلەرى ءوز ەڭبەكتەرىن ۇسىندى. سونداي-اق, ەتنواۋىلدا ەكى التىباقان ورناتىلىپ, قىز-جىگىتتەر اراسىندا ءان-ايتىس ۇيىمداستىرىلدى. حالىق اندەرى شىرقالدى. سونىمەن قاتار, «تۇساۋكەسەر», «بەسىككە سالۋ», «سىرعا سالۋ», «قىز ۇزاتۋ», «قۇدا ءتۇسۋ» سالت-ءداستۇرى كورسەتىلدى جانە «توعىزقۇمالاق», «وقتاۋ تارتىس», «اسىق ويناۋ» ويىندارى ويناتىلىپ, «قاماجاي» ءبيى بيلەندى.
دينارا بىتىكوۆا,
«ەگەمەن قازاقستان».
سۋرەتتەردى تۇسىرگەندەر
س.بوندارەنكو, ب.وتارباەۆ.
