«ايتار العىسىمىز شەكسىز!» – دەيدى قارت انا

«ەگەمەننىڭ» ورال قالاسىنداعى ءتىلشى قوسىنىنا جاسى ۇلعايعان انا كەلدى. ەگدەلىك – قۋاناتىنداي, قول سوعاتىنداي قۇبىلىس ەمەس. بەلى دە بۇگىلىپ بارا جاتقانداي كورىندى. قاسىندا تاعى ءبىر جاس ايەل بار. ول قارت انانىڭ قىزى بولىپ شىقتى. كەلگەن شارۋاڭىزدى ايتا وتىرىڭىز, اپا, دەدىك ءبىز ول كىسىگە ىقىلاس تانىتا. – قاراعىم, ءبىز مىنا تۇرعان قىزىم بيبىگۇل ەكەۋمىز تاسقالا اۋىلىنان «ەگە­مەنگە» ارنايى كەلىپ وتىرمىز. اۋدان ورتالىعىنداعى شەتكەرى كوشەلەردىڭ ءبىرى – شەۆچەنكودا تۇرامىز.تاعى دا وسى ماڭايدا ستاديون جانە احمەتقاليەۆ اتىنداعى كوشەلەر بار. وسى ءۇش كوشەنىڭ تۇرعىندارىنىڭ دەنى زەينەتكەرلەر دەۋگە بولادى. وسى كەزگە دەيىن كارى قويدىڭ جاسىنداي عۇمىرىمىز قالعاندا اۋىز­سۋ ازابىن كورىپ كەلدىك. ونى قىستىڭ كوزى قىراۋدا اۋىل شەتىندەگى شەگەن قۇدىقتان بيدونمەن تاسىدىق. ونىڭ ءوزى ءمولدىر ەمەس, لاي سۋ ەدى. ءتىپتى, سول لاي سۋدىڭ وزىنە زار بولدىق. ويتكەنى, شەلەكتەپ الا بەرگەن سوڭ سۋى ءبىتىپ قالادى. سونىمەن بىرگە, كوشە جولدارى دا شۇرىق-تەسىك بولاتىن. ءتىپتى, ەلەكتر باعانالارى دا تارتىلماعان ەدى. تاياۋدا ۇيىمىزگە سۋ قۇبىرى تارتىلىپ, اۋىز-سۋ ازابىنان ءبىر-اق كۇندە قۇتىلدىق. بۇعان قوسا جول دا جوندەلدى. ءۇيىمىزدىڭ ىرگەسىنە جارىق تا تارتىلدى. سوندىقتان, ءوتىنىشىمىزدى اياقسىز قالدىرماعان ءىس باسىنداعى ازاماتتارعا دەگەن ريزاشىلىعىمىزدى «ەگەمەن» ارقىلى جەتكىزسەك پە دەپ كەلىپ ەدىك, – دەدى ءوزىن قىمبات ابىلعازيەۆا دەپ تانىستىرعان سەكسەننىڭ سەڭ­گىرىنە شىققان انا. – نەسى بار, ويىڭىز دۇرىس ەكەن. جاق­سىنىڭ جاقسىلىعىن ايت, نۇرى تا­سىسىن دەمەي ما؟ ەندەشە, تۇرمىستارىڭىزدىڭ تۇزەلۋىنە كومەك كورسەتكەندەردىڭ اتى-جوندەرىن اتاپ جىبەرسەڭىز, – دەدىم مەن وسى ارادا. – بىرىنشىدەن تاسقالا اۋدانىنىڭ اكىمى سانجار اليەۆتىڭ اتى-ءجونىن اتاعىم كەلەدى. ول تۇرعىنداردىڭ جينا­لىسىنا ءۇش رەت كەلىپ قاتىسىپ, جاناي­قايىمىزعا تۇسىنىستىكپەن قۇلاق استى. ءارى شۇعىل شەشىم قابىلدادى. بۇعان قوسا ءىستىڭ ءجۇرۋ بارىسىن ءوزى تىكەلەي مۇقيات قاداعالاپ وتىردى. تاسقالا اۋىلدىق وكرۋگىنىڭ اكىمى سۆەتلانا وتەمىسوۆا مەن كوممۋنالدىق-شارۋاشىلىق كاسىپورنىنىڭ باسشىسى كەنجەعالي بيساليەۆكە دە ال­عىسىمىز شەكسىز. ءارى مۇنى تەك مەنىڭ عانا ەمەس, بارلىق كوشە تۇرعىندارىنىڭ اتىنان ايتىلعان العىس دەپ قابىلداۋىڭىزدى سۇرايمىن. قىمبات اپا, بۇگىندە ەلىمىزدە تۇرعىن ءۇي-كوممۋنالدىق شارۋاشىلىعىن وركەن­دەتۋ, بۇل تۇرعىدا تۇرعىندارعا قو­لايلى تۇرمىستىق جاعدايلار تۋعىزۋ جونىندە جەر­گىلىكتى اتقارۋشى ورگاندارعا جۇكتەلگەن جاۋاپ­كەرشىلىك جوعارى. ءسىز ەسىمدەرىن اتاعان تاس­قالا توپىراعىنىڭ باسشى ازاماتتارى وسى سەنىم مەن جاۋاپكەرشىلىك ۇدەسىنەن شىعا بىلگەن ەكەن. بۇل اماناتىڭىزدى «ەگە­مەن» ار­قىلى جەتكىزۋگە ءازىرمىز. بۇعان الاڭداماڭىز. جولىڭىز بولسىن, – دەدىم مەن ول كىسىگە اۋىلىنا قايتار جولدا. سويتە قويشى, اينالايىن, دەپ اپامىز العىسىن قايتا-قايتا جاۋدىرمالاتىپ ەسىككە قاراي بەتتەدى. تەمىر قۇسايىن, «ەگەمەن قازاقستان». باتىس قازاقستان وبلىسى, تاسقالا اۋدانى.