ماسلەنيتسانى شىعارىپ سالدى

قاراعاندى قالاسىنداعى كەنشىلەردىڭ مادەنيەت سارايىنىڭ الدىندا سلاۆيان حالىقتارىنىڭ ءداستۇرلى ماسلەنيتسا مەرەكەسى ءسان-سالتاناتپەن اتاپ ءوتىلدى. قار ارالاس جاڭبىر جاۋىپ, كۇن رايىنىڭ كۇرت بۇزىلعانىنا قاراماستان, قالا تۇرعىندارى كوكتەمدى قارسى الاتىن كوپ مەيرامداردىڭ ءبىرىن قاراسى سەلدىرەمەي تاماشالادى. قاراعاندىداعى ماسلەنيتسا مەيرامىن جەرگىلىكتى «كازاچيا ۆولنيتسا» قوعامدىق بىرلەستىگى ۇيىمداستىردى. بىرلەستىكتىڭ توراعاسى سەمەن راكوۆتىڭ ايتۋىنشا, ماسلەنيتسا مەرەكەسىن بۇ­لار وسىمەن سەگىزىنشى رەت ۇيىم­داستىرىپ وتىر ەكەن. «اۋەلدە بۇل مەرەكە كەنشىلەر استاناسىنداعى ورتالىق ساياباقتا ءوتىپ كەلدى. ال ەندى وسىمەن ءتورتىنشى رەت قالانىڭ قاق ورتاسىندا, كەنشىلەردىڭ مادەنيەت سارايىنىڭ الدىندا تويلاۋدى داستۇرگە اينالدىردىق. بىزدەر, قازاقستاندىقتار – ءبىر­تۇتاس حالىقپىز. سودان دا بولار, ماسلەنيتسا مەرەكەسىن اتاپ ءوتۋ­گە قالامىزداعى ەتنومادەني بىرلەس­تىكتەردىڭ ءبىرى قالماي اتسالىستى», – دەدى سەمەن راكوۆ. ماسلەنيتسا كوز­دەگەن ماق­ساتى­نا جەتتى. «كازاچيا ۆولنيتسا» قوعام­دىق بىرلەس­تىگى ۇيىم­داس­تىرعان كونتسەرت­تىك باعدارلاما, ءتۇرلى ويىندار, سپورتتىق شارالار مەن باي­قاۋلار جۇرتتىڭ كوڭىلىنەن شىقتى. مەرەكەگە, جو­عارىدا اي­تىل­عانىن­داي, قالا­مىزداعى باسقا دا ەتنو­مادەني ءبىر­لەس­تىكتەردىڭ وكىل­دەرى قاتىسىپ, توي-دۋماننىڭ كورى­گىن قىزدىرا ءتۇستى. ءتۇرلى ۇلت پەن ۇلىستىڭ بالالارى ءبىر-ءبىرىن كوك­تەم مەرەكەسىمەن قۇتتىقتاپ, اقجا­ر­­ما تىلەكتەردىڭ تيەگىن اعىتتى. باس­قا­نىڭ تويى عوي دەپ سىرتتان باعىپ تۇر­ماي, ور­تاق قۋانىشتىڭ ۇستىندە ءبىر­لىگى جاراس­قان ەلدىڭ بالاسى ەكەن­دىگىن كورسە­تىپ, ءوز ونەرلەرىن ورتاعا سالدى. ماسلەنيتسا مەرەكەسىنىڭ اتاقتى قۇيماقسىز وتپەيتىنى بەلگىلى. بۇل جولعى مەرەكەدە قوعامدىق بىرلەستىكتىڭ بەلسەندىلەرى ەكى مىڭعا تارتا قۇيماق ءپىسىرىپ, حالايىققا ۇسىندى. ءدامى ءتىل ۇيىرگەن قۇيماقتار كوزدى اشىپ-جۇمعانشا قولدان-قولعا تاراپ كەتتى. مەرەكەنىڭ سوڭىنا تامان ءداستۇرلى تۇردە ماسلەنيتسانىڭ ساماننان جاسالعان ت ۇلىبى ورتەندى. بۇل شارانىڭ دا وزىندىك ءمان-ماعىناسى بار: ەسكى-قۇسقىنىڭ, كىر-قوقىستىڭ ءبارى كەلمەسكە كەتىپ, ونىڭ ورنىن تىرشىلىكتىڭ جاڭا وسكىنى باسۋ كەرەك دەگەندى بىلدىرەتىن ىرىم بولسا كەرەك. ياعني, بۇل – تاعى ءبىر كوكتەم كەلىپ, ءتۇرلى ۇلتتىڭ بالاسى تاتۋ-ءتاتتى تۇرىپ جاتقان ورتاق ءۇيىمىزدىڭ قاقپاسىن جاڭا ۇمىتپەن جادىراي قاقتى دەگەن ءسوز. قايرات ءابىلدينوۆ, «ەگەمەن قازاقستان». قاراعاندى.