قىزىلوردادا فۋتزالدان جارىس ءوتتى

قىزىلوردا. 14 ناۋرىز. 12-13 ناۋرىز كۇندەرى قىزىلوردا قالاسىندا فۋتزالدان جاۋىنگەر-ينتەرناتسيوناليست باتىرجان شالعىنباەۆتى ەسكە تۇسىرۋگە ارنالعان رەسپۋبليكالىق تۋرنير ءوتتى. بۇل تۋرالى egemen.kz ءتىلشىسى حابارلادى. بيىل 20-شى مارتە ۇيىمداستىرىلعان تۋرنيرگە بايقوڭىر, الماتى قالاسى, اتىراۋ, ماڭعىستاۋ, جامبىل, وڭتۇستىك قازاقستان جانە قىزىلوردا وبلىستارىنان 28 كوماندا, 400-دەن اسا سپورتشى قاتىسىپ, ۇزدىكتەر انىقتالدى. ەكى كۇنگە سوزىلعان جارىس قورىتىندىسى بويىنشا «وليمپ -ۆەرسال» كومانداسى ءبىرىنشى ورىندى يەلەندى. ولار فينالدا وڭتۇستىكقازاقستاندىق «JTI قازاقستان» كومانداسىن ۇتتى. ويىننىڭ نەگىزگى ۋاقىتى تەڭ اياقتالعاندىقتان جەڭىمپاز پەنالتيدە انىقتالىپ, ەسەپ 4:2 بولدى. ءۇشىنشى ورىندى قىزىلوردالىق «ازامات» كومانداسى, ءتورتىنشى ورىندى الماتىلىق «ەنەرگوكوللەدج» كوماندالارى يەلەندى. جارىستا «ۇزدىك قورعاۋشى» نوميناتسياسىمەن نۇرلان دايراباەۆ («ازامات» كومانداسى) ماراپاتتالسا, عالىم قوسمۇحامەتوۆ («وليمپ-ۆەرسال» كومانداسى) «ۇزدىك قاقپاشى», اندرەي شلەما («JTI قازاقستان» كومانداسى) «ۇزدىك شابۋىلشى», اسەت مەڭلىقوجا («وليمپ-ۆەرسال» كومانداسى) «مەرگەن ويىنشى», داۋرەن تۇرساعۇلوۆ («ەنەرگوكوللەدج» كومانداسى) «ۇزدىك ويىنشى» اتاعىنا يە بولدى. تۋرنيردە ءبىرىنشى ورىنعا اۆتوكولىك تىگىلدى. ال ەكىنشى ورىنعا 300 مىڭ تەڭگە, ءۇشىنشى ورىنعا 200 مىڭ تەڭگە, ءتورتىنشى ورىنعا 100 مىڭ تەڭگە, باعالى سىيلىقتار, مەدالدار جانە العىس حاتتار بەرىلدى. ەرجان بايتىلەس. دەرەك, سۋرەت: egemen.kz