جەزقازعاندا پوليتسيا اۆتوكولىگىنە وق اتقاندار قولعا ءتۇستى

قاراعاندى. 14 ناۋرىز. جەزقازعان قالاسىندا پوليتسيانىڭ قىزمەتتىك اۆتوكولىكتەرىنە وق اتقان كۇدىكتى قولعا ءتۇستى. بۇل تۋرالى وبلىستىق ىشكى ىستەر دەپارتامەنتىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. پوليتسيا قىزمەتكەرلەرى جەزقازعان قالاسىندا جالعان قۇجاتتارمەن جۇرگەنى ءۇشىن «ۆاز-2106» اۆتوكولىگىنىڭ يەسىنە اكىمشىلىك حاتتاما تولتىرىپ, ماشينانىڭ ءوزىن ايىپ تۇراعىنا جىبەردى. وسى كەزدە جۇرگىزۋشىنىڭ تانىسى ماسەلەنى باسقا جولمەن رەتكە كەلتىرمەك بولادى. الايدا, بۇل ارەكەتىنەن ەشنارسە شىقپاعاننان كەيىن كۇدىكتى ەكى سىبايلاسىمەن بىرگە قايتىپ كەلىپ, پوليتسيا اۆتوكولىكتەرىنە وق جاۋدىرعان. جەدەل ىزدەستىرۋ شارالارىنىڭ ناتيجەسىندە كۇدىكتىلەردىڭ ءبارى دە قولعا ءتۇستى. ءتارتىپ ساقشىلارىنا قارسى وق اتقان 25 جاستاعى كۇدىكتى ۋاقىتشا ۇستاۋ وقشاۋلاعىشىنا قامالىپ, ونىڭ ەكى سىبايلاسى ەشقايدا كەتپەۋ تۋرالى قولحاتپەن بوساتىلدى. قازىرگى ۋاقىتتا سوتقا دەيىنگى تەرگەۋ امالدارى جۇرگىزىلۋدە. قايرات ءابىلدينوۆ. دەرەك: قاراعاندى وبلىسى ىشكى ىستەر دەپارتامەنتىنىڭ ءباسپاسوز قىزمەتى. سۋرەت: altyn-orda.kz.