استانا. 14 ناۋرىز. قاراعاندى قالاسىنداعى «سارىرقا» ارنايى ەكونوميكالىق ايماقتىڭ اۋماعىندا قورعانىس ءمينيسترى يمانعالي تاسماعامبەتوۆ العاشقى قازاقستاندىق پاترون زاۋىتى قۇرىلىسىنىڭ باستالۋىنا ارنالعان راسىمگە قاتىستى. جوبا ەلىمىزدىڭ قارۋلى كۇشتەرى جوعارعى باس قولباسشىسىنىڭ تاپسىرماسى بويىنشا ازىرلەندى. بۇل تۋرالى egemen.kz ءتىلشىسى حابارلادى.
بۇل زاۋىتتا 5,45*39 مم, 7,62*54 مم, 9*18 مم, 9*19 مم كاليبرلى پاتروندار شىعارىلادى. قازىرگى كەزدە ەلىمىزدىڭ قارۋلى كۇشتەرىندە پاتروننىڭ وسى تۇرلەرى ۇلكەن سۇرانىسقا يە.
زاۋىت «سارىارقا» ارنايى ەكونوميكالىق ايماعىنىڭ اۋماعىندا سالىنادى. ايماقتىڭ اۋماعىندا بارلىق ينجەنەرلىك كوممۋنيكاتسيالار, اۆتو جانە تەمىرجول كولىگى بار. قۇرىلىستىڭ جالپى اۋدانى 26 400 شارشى مەتر بولادى. زاۋىت 2017 جىلدىڭ جەلتوقسان ايىندا سالىنىپ بىتەدى.
«پاترون زاۋىتى ەلىمىزگە قاجەت كاسىپورىن. شەتەلدە مۇنداي زاۋىتتار بارشىلىق. ءبىزدىڭ ەلدە جەز سياقتى قورىتپالار كوپ. ولار وندىرىلمەي جاتپاۋى ءتيىس. ءبىزدىڭ ەلدىڭ جەردە جاتقان بايلىعى, اقشاسى. وق-دارىلەر وسى قورىتپادان جاسالادى. پاترون زاۋىتىندا جەز سياقتى قورىتپانىڭ 300 تونناسىن قولدانۋ كوزدەلىپ وتىر», دەيدى «كازتەحنولوگي» اق باسقارما توراعاسى مەدەر ماسەلوۆ.
ونىڭ ايتۋىنشا, پاترون زاۋىتى سالىق تۇرىندە ءوڭىردىڭ بيۋدجەتىنە جىلىنا 680 ملن تەڭگە قارجى تۇسىرەدى. بۇل ەڭ قاراپايىم بولجام. الداعى كەزدە زاۋىتتىڭ جۇمىسى جاندانىپ, وق-دارىلەر كوپتەپ ساتىلىپ جاتسا, قازاقستاننىڭ وق-دارىلەردى وندىرەتىن ەلدەر قاتارىنا ەنۋىنە مۇمكىندىك بەرەدى. قازىردىڭ وزىندە «كازتەحنولوگي» اق زاۋىت ءونىمىن ەكسپورتتاۋ بويىنشا كەلىسسوزدەر جۇرگىزۋدە. اتاپ ايتقاندا, «Kadex-2016» كورمەسى اياسىندا كوپتەگەن مەملەكەتتەرگە ءونىم جەتكىزۋ جونىندە كەلىسىمگە قول قويۋ جوسپارلانىپ وتىر.
بۇگىندە ەلىمىزدە وق-دارىلەر شىعارىلمايدى. قازىر اسكەردە پايدالانىپ جاتقان پاتروندار كسرو-دان قالعان وق-دارىلەر. ال, العاش ەلىمىزدەگى پاترون زاۋىتى جىلىنا 30 ملن. وق-ءدارىنى شىعارادى. پاتروندار وزىق قۇرالمەن جابدىقتالادى. پاترونداردى جاسايتىن جابدىقتى كانادالىق Waterbury Farrel كومپانياسى جەتكىزەدى. وسى زاۋىتتا 164 جۇمىسشى ىستەيتىن بولادى.
داستان كەنجالين.
دەرەك, سۋرەت: قازاقستان رەسپۋبليكاسى قورعانىس مينيسترلىگى.
