ەلباسى تۇركيا پرەزيدەنتىنە كوڭىل ايتۋ جەدەلحاتىن جولدادى

استانا. 14 ناۋرىز. ەلباسى تۇركيا رەسپۋبليكاسىنىڭ پرەزيدەنتى رەجەپ تايپ ەردوعانعا انكارا قالاسىندا بولعان تەررورلىق اكتىگە بايلانىستى كوڭىل ايتۋ جەدەلحاتىن جولدادى. بۇل تۋرالى akorda.kz حابارلادى. جەدەلحاتتا قايعىلى وقيعا سالدارىنان كوپتەگەن جازىقسىز ادامداردىڭ قازا بولعانى جانە زارداپ شەككەنى تۋرالى حاباردى قازاقستان پرەزيدەنتى زور كۇيزەلىسپەن قابىلداعانى اتاپ وتىلگەن. «ەلىڭىزبەن كورشى ايماقتاعى تۇراقسىزدىق پەن حالىقارالىق تەرروريزمنىڭ ورشۋىنە قاراماستان, تۇركيا ىشكى تۇراقتىلىعى مەن قاۋىپسىزدىگىن نىعايتىپ, قازىرگى زامان قاۋىپ-قاتەرلەرىنە قارسى كۇرەستە تاباندىلىق تانىتاتىنىنا سەنىمدىمىن. حالىقارالىق تەرروريزمنىڭ تامىرىنا بالتا شابۋ الەمدىك قوعامداستىق الدىندا تۇرعان ەڭ وزەكتى مىندەت دەپ سانايمىن», – دەلىنگەن جەدەلحاتتا. مەملەكەت باسشىسى قازاقستان ءححى عاسىردىڭ ەڭ قاۋىپتى قاتەرىنە قارسى كۇرەستە باۋىرلاس تۇرىك حالقىن قولدايتىنىن اتاپ ايتتى. سوڭىندا نۇرسۇلتان نازارباەۆ قازاقستان حالقىنىڭ جانە جەكە ءوزىنىڭ اتىنان رەجەپ تايپ ەردوعانعا, قازا تاپقانداردىڭ تۋىس-تۋعاندارىنا, سونداي-اق, بارشا تۇركيا حالقىنا كوڭىل ايتىپ, زارداپ شەككەندەردىڭ تەزىرەك ساۋىعىپ كەتۋىنە تىلەكتەستىگىن ءبىلدىردى. ەلامان قوڭىر. دەرەك, سۋرەت: akorda.kz.