ىنتىماقتاستىقتىڭ جاڭا قىرلارى تالقىلاندى

كەشە استانادا قازاقستان رەس­پۋب­ليكاسىنىڭ سىرتقى ىستەر ءمينيسترى ەرلان ىدىرىسوۆ ۇجىمدىق قاۋىپسىزدىك شارتى ۇيىمىنىڭ (ۇقشۇ) باس حاتشىسى نيكولاي بورديۋجانى قابىلدادى, دەپ حابارلادى وسى ۆەدومستۆونىڭ ءباسپاسوز قىزمەتى. كەزدەسۋ بارىسىندا اڭگىمەلەسۋشىلەر حالىقارالىق احۋالدىڭ كوكەيكەستى ماسەلەلەرى تۋرالى, سونداي-اق, ۇقشۇ-عا مۇشە مەملەكەتتەردىڭ ۇجىمدىق قاۋىپسىزدىگىن قامتاماسىز ەتۋدەگى ۇيىمنىڭ ءرولى تۋرالى پىكىر الماستى. ۇقشۇ باس حاتشىسى 2015 جىلى قابىلدانعان ۇقشۇ ۇجىمدىق قاۋىپسىزدىك كەڭەسى شەشىمدەرىنىڭ جۇزەگە اسىرىلۋ بارىسى جانە ۇقشۇ-نىڭ داعدارىستىق ارەكەت ەتۋ جۇيەسىن دامىتۋعا كوزقاراستار تۋرالى حابارلادى. ە.ىدىرىسوۆ پەن ن.بورديۋجا ۇستىمىزدەگى جىلعى ۇيىم شەڭبەرىندەگى ءىرى ءىس-شارالاردىڭ كەستەسى مەن ۇسىنىلاتىن كۇن ءتارتىبىن, اتاپ ايتقاندا, شىلدەدە وتەتىن سىرتقى ىستەر مينيسترلەرى كەڭەسى مەن كۇزدە وتەتىن ۇقشۇ-نىڭ مەملەكەت باسشىلارى دەڭگەيىندەگى ۇجىمدىق قاۋىپسىزدىك كەڭەسىنىڭ كۇن ءتارتىبىن قاراستىردى. اڭگىمەلەسۋشىلەر, سونداي-اق, ۇقشۇ-عا مۇشە مەملەكەتتەردىڭ تەرروريزممەن جانە ءدىني ەكسترەميزممەن كۇرەس سالا­سىنداعى ىنتىماقتاستىعىن ۇلعايتۋ, ءتۇرلى حالىقارالىق الاڭداردا ءتيىستى ءبىر­لەسكەن ۇسىنىستاردى ىلگەرىلەتۋ پەرسپەكتيۆالارىن تالقىلادى. ە.ىدىرىسوۆ اتاپ وتكەندەي, مۇنداي ىنتىماقتاستىق ءبىزدىڭ ۇيىم شەڭبەرىندەگى ءوزارا بايلانىستاردىڭ جاڭا قىرىن اشادى جانە قازاقستان پرە­زيدەنتى ن.ءا.نازارباەۆ بۇۇ-نىڭ باس اسسامبلەياسىندا وتكەن جىلدىڭ قىر­كۇيەگىندە ۇسىنعان بۇۇ قولداۋىمەن جا­ھان­دىق انتيتەررورلىق كواليتسيا (جەلى) قۇرۋ جونىندەگى باستامانى جۇزەگە اسىرۋعا جاعداي جاسايتىن بولادى.