فوتو: primeminister.kz
تاراپتار سەنىم مەن كاسىبيلىككە نەگىزدەلگەن ستراتەگيالىق ارىپتەستىكتىڭ جوعارى دەڭگەيىن اتاپ ءوتتى. 1993-2026 جىلدار ارالىعىندا كولىك, ءبىلىم بەرۋ, ەكولوگيا, «جاسىل» تەحنولوگيا جانە تسيفرلاندىرۋ سالالارىندا 8 ملرد دوللاردان استام قارجىعا 50-دەن اسا جوبا ىسكە اسىرىلعان.
دۇنيەجۇزىلىك بانك قازاقستانداعى ەكونوميكالىق رەفورمالاردى ىلگەرىلەتۋگە, ينفراقۇرىلىمدى دامىتۋعا جانە ماكروەكونوميكالىق ءارى فيسكالدىق تۇراقتىلىقتى قامتاماسىز ەتۋگە ماڭىزدى ۇلەس قوسىپ كەلەدى.
كەزدەسۋ بارىسىندا سەرىك جۇمانعارين سوڭعى جىلدارداعى شەشۋشى قادامداردىڭ ءبىرى – بيۋدجەت-سالىق رەفورماسى ەكەنىن اتاپ ءوتتى. ونىڭ ايتۋىنشا, رەفورمانىڭ تيىمدىلىگى بيىلعى ءبىرىنشى توقسان قورىتىندىسىمەن راستالعان.
2026-2030 جىلدارعا ارنالعان جاڭا ارىپتەستىك ستراتەگياسىندا ىنتىماقتاستىقتىڭ باسىم باعىتتارى ايقىندالدى. ولاردىڭ قاتارىندا:
– كولىك جانە تسيفرلىق بايلانىستاردى دامىتۋ;
– سۋ جانە ەنەرگەتيكا سەكتورىن جاڭعىرتۋ;
– قارجى نارىعىن جەتىلدىرۋ;
– جەكە ينۆەستيتسيا تارتۋ;
– كليماتتىق كۇن ءتارتىبىن كۇشەيتۋ;
– جاڭارتىلاتىن ەنەرگيا كوزدەرىن كەڭىنەن پايدالانۋ بار.
دۇنيەجۇزىلىك بانك 1 ملرد دوللار ءبولدى: ونى قازاقستان قاي ماقساتتا قولدانادى؟
ۇكىمەتتىڭ ءباسپاسوز قىزمەتىنىڭ مالىمدەۋىنشە, قازىرگى تاڭدا بىرلەسكەن پورتفەل اياسىندا 2 ءىرى جوبا جۇزەگە اسىرىلىپ جاتىر. اتاپ ايتقاندا, قۇنى 1 182,5 ملرد تەڭگە بولاتىن قاراعاندى – جەزقازعان اۆتوجولىن قايتا جاڭارتۋ جوباسى (2025-2028 جىلدار) جانە شامامەن 84 ملن دوللار سوماسىندا قارجىلاندىرۋدى كوزدەيتىن «قازاقستاننىڭ ينكليۋزيۆتى ەكونوميكاسى ءۇشىن جەدەلدەتىلگەن تسيفرلاندىرۋ» جوباسى.
سونىمەن قاتار, كولىك, ەنەرگەتيكا, سۋ رەسۋرستارى جانە تسيفرلاندىرۋ سالالارىندا تاعى 8 جوبا پىسىقتالىپ جاتىر. پەرسپەكتيۆالى باستامالار قاتارىندا سولتۇستىك ارال تەڭىزىن قالپىنا كەلتىرۋ, «بەينەۋ – سەكسەۋىل» اۆتوجولىن سالۋ جانە تەمىرجول-كولىك جۇيەسىن ترانسفورماتسيالاۋ جوبالارى بار.
كەزدەسۋدە «ەنەرگەتيكالىق جانە كوممۋنالدىق سەكتورلاردى جاڭعىرتۋ» ۇلتتىق جوباسىنا ەرەكشە نازار اۋدارىلدى. بۇل باستاما اياسىندا 200-دەن استام تابيعي مونوپوليا سۋبەكتىسىن جاڭارتۋ جوسپارلانىپ وتىر, بۇل ەلدىڭ تۇراقتى ەكونوميكالىق وسىمىنە تىكەلەي ىقپال ەتپەك.
قازاقستان ەكونوميكانى ءارتاراپتاندىرۋ, تسيفرلىق ترانسفورماتسيا جانە «جاسىل» وسىمگە كوشۋ باعىتىن جۇيەلى تۇردە جۇزەگە اسىرىپ كەلەدى. وسى رەتتە دۇنيەجۇزىلىك بانكپەن ىنتىماقتاستىقتى ودان ءارى كەڭەيتۋگە مۇددەلىلىك ءبىلدىرىلدى.
دۇنيەجۇزىلىك بانكتىڭ SPI-2024 رەيتينگىندە قازاقستان نەشىنشى ورىندا تۇر؟
انتونەللا باسساني ۇيىمنىڭ بارلىق تالقىلانعان جوبالاردى ىسكە اسىرۋعا دايىن ەكەنىن جەتكىزدى.
«تەڭىزگە شىعاتىن جول جوق بولۋىنا قاراماستان, قازاقستان ايتارلىقتاي الەۋەتكە يە بولا وتىرىپ, تۇراقتى ءوسۋ قارقىنىن كورسەتىپ جاتىر. سونىمەن قاتار, جاھاندىق وزگەرىس بەيىمدەلۋ مەن ونىمدىلىكتى ارتتىرۋدى تالاپ ەتىپ وتىر. ءبىز ەلدى ينفراقۇرىلىمعا ينۆەستيتسيا سالۋ ارقىلى دا, رەفورمالاردى جۇزەگە اسىرۋ ارقىلى دا قولداۋعا دايىنبىز», دەدى ول.
سونداي-اق, ەنەرگەتيكا مەن سۋ سەكتورلارىن جاڭعىرتۋ ىنتىماقتاستىقتىڭ ەڭ اۋقىمدى جانە كاپيتالدى قاجەت ەتەتىن باعىتتارىنىڭ ءبىرى ەكەنى اتاپ ءوتىلدى. دۇنيەجۇزىلىك بانك بۇل سالادا مەملەكەتتىك قارجىلاندىرۋمەن قاتار, جەكە ينۆەستيتسيا تارتۋعا دا جاردەمدەسۋگە نيەتتى.
تاراپتار الداعى مامىر ايىندا جوسپارلانعان ينفراقۇرىلىمدىق ينۆەستيتسيالىق باعدارلامالاردى تالقىلاۋدى قوسا العاندا, ىنتىماقتاستىقتى ودان ءارى كەڭەيتۋگە دايىن ەكەنىن راستادى.
