ونىڭ ايتۋىنشا, بۇل تابىسقا قاتىستى قاتاڭ شەكتەۋ ەنگىزۋ دەگەندى بىلدىرمەيدى. دەگەنمەن بانكتەر ءاربىر ازاماتتىڭ تاۋەكەل دەڭگەيىن ەسكەرۋگە مىندەتتى بولادى.
«بۇل ناقتى ءبىر شەكتەۋ ەمەس. بۇل – تاۋەكەلدەردى باسقارۋ جۇيەسى ارقىلى ىسكە اساتىن تەتىك. بانكتەر قارىز الۋشىنىڭ تابىسىن باعالاپ, ونىڭ تولەم قابىلەتتىلىگىنە قاراي شەشىم قابىلداۋى ءتيىس», دەدى اگەنتتىك باسشىسى.
2 جانە 5%-دىق يپوتەكا: جەڭىلدەتىلگەن نەسيە كىمدەرگە بەرىلەدى جانە ونى قالاي الۋعا بولادى؟
ابىلقاسىموۆانىڭ سوزىنشە, يپوتەكا بويىنشا جالپى تاۋەكەل دەڭگەيى تومەن بولعانىمەن, 2020 جىلدان كەيىن بەرىلگەن نەسيەلەر بويىنشا مەرزىمى وتكەن تولەمدەر سانى ارتىپ كەلەدى. اسىرەسە جوعارى پايىزدىق كەزەڭدە راسىمدەلگەن يپوتەكالاردا تاۋەكەلدىڭ وسكەنى بايقالعان.
«سوڭعى جىلدارى جوعارى پايىزدىق مولشەرلەمە كەزىندە بەرىلگەن يپوتەكالار بويىنشا تاۋەكەل كورسەتكىشىنىڭ ارتقانىن كورىپ وتىرمىز. سوندىقتان بانكتەرگە تاۋەكەلى جوعارى قارىز الۋشىلارعا نەسيە بەرمەۋ جونىندە ناقتى تالاپ قويىلىپ وتىر», دەدى ول.
بۇل وزگەرىس ءىس جۇزىندە تابىسى تومەن ازاماتتار ءۇشىن نارىقتىق يپوتەكاعا قولجەتىمدىلىكتىڭ قيىنداي تۇسۋىنە اسەر ەتۋى مۇمكىن. دەگەنمەن رەتتەۋشى ورگان تۇرعىن ءۇيدىڭ قولجەتىمدىلىگىن ارتتىرۋ باعىتىنداعى قوسىمشا شارالار دا قاتار قاراستىرىلىپ جاتقانىن اتاپ ءوتتى.
اگەنتتىك باسشىسىنىڭ ايتۋىنشا, قازىرگى تاڭدا جەڭىلدەتىلگەن يپوتەكالىق باعدارلامالار ءاردايىم ناقتى مۇقتاج ازاماتتارعا باعىتتالا بەرمەيدى.
«جەڭىلدەتىلگەن يپوتەكالىق ونىمدەرگە ءارتۇرلى ساناتتاعى ازاماتتار قول جەتكىزىپ وتىر, ولاردىڭ ىشىندە نارىقتىق شارتتارمەن دە نەسيە الا الاتىندار بار. سوندىقتان بۇل باعدارلامالاردىڭ ماقساتتى باعىتتالۋىن كۇشەيتۋ قاجەت», دەدى ءمادينا ابىلقاسىموۆا.
بيلىك ەندىگى ۋاقىتتا مەملەكەتتىك قولداۋدى شىن مانىندە يپوتەكا الا المايتىن, الەۋمەتتىك تۇرعىدان وسال ازاماتتارعا باعىتتاۋدى جوسپارلاپ وتىر.
سونىمەن قاتار تۇرعىن ءۇي-قۇرىلىس جيناق جۇيەسىن دامىتۋ جانە كوممەرتسيالىق بانكتەر ارقىلى نارىقتىق يپوتەكانى جەتىلدىرۋ كوزدەلگەن.
مامانداردىڭ پىكىرىنشە, نەگىزگى ماقسات – يپوتەكالىق ساياساتتى تەڭگەرىمدى ەتۋ: تۇرعىن ءۇيدىڭ قولجەتىمدىلىگىن ساقتاۋ, باعانىڭ شامادان تىس وسۋىنە جول بەرمەۋ جانە حالىقتىڭ ارتىق قارىز جۇكتەمەسىنە ءتۇسۋىنىڭ الدىن الۋ.
