كەڭەس ورتالىعى قولىن سوزدى

الدىمداعى جىگىتتىڭ بوي-ءبىتىمى تانىس كورىندى. ەسىمە ەندى ءتۇستى. بۇل اناۋ ءبىر جىلدارى گازەت تاپسىرماسىمەن «تاۋەلسىزدىك قۇرداسى» ايدارىنا ماقالا جازاتىن ۆانيا لەبەدەۆ قوي. وتە تالانتتى جاس. كادىمگى «جىگىتكە جەتى ونەر دە جا­راسادىنىڭ» ءدال ءوزى. مەكتەپتى ۇزدىك ءبىتىرىپ, شوقان ءۋاليحانوۆ اتىن­داعى كوكشەتاۋ مەملەكەتتىك ۋنيۆەرسيتەتىندە گرانتپەن وقىپ جۇرگەن... بويىن قانشا تىك ۇستاۋعا تى­­­رىسقانىمەن, سىلتىپ باسادى. قۋىپ جەتتىم. تانىپ جاتىر. قولىمىزدى قاتتى قىسىپ امان­­­­داستىق. حال-جاعدايىن سۇرا­عانىمدا, «ءبارى دە ارتتا قال­دى» دەگەن سوزىمەن كوپ ماعىنا اڭعارتتى. قازبالاپ جاتپادىم. جايلاپ باسىپ قالا جاستارىنىڭ «كونسالتينگ ورتالىعىنا» كىرىپ كەتتى. سۇراستىرىپ ءبىلدىم. ۋنيۆەر­سيتەتتى 2013 جىلى «اقپاراتتىق جۇيەلەر» ماماندىعى بويىنشا ءتامامداپتى. سول جىلى ماگيس­تراتۋراعا ءتۇسىپ, 2015 جىلى تەحنيكا جانە تەحنولوگيا ماگيسترى اتانعان. تاعدىردىڭ تالكەگىنە نە شارا. ۆانيا لەبەدەۆ كلاسسيكالىق بي جاتتىعۋىنان كەلە جاتقاندا, الا­كولەڭكەدە بۇزاقىلاردىڭ قوقان-لوقىسىنا ۇشىرايدى. ءتاپ-ءتاۋىر سپورتشىعا الدەرى كەلمەيتىنىن بىلگەن الگىلەر بىرنەشە جەردەن پىشاق سالىپتى. اۋرۋحاناعا ەس-ءتۇسسىز جەتكىزىلگەن. دارىگەرلەر كونسيليۋمى جەدەل وتا جاساپ, ونىڭ اياعىن كەسۋگە شەشىم قابىلداعان. جانتۇرشىگەرلىك وقيعا جاس جىگىتتىڭ جىگەرىن مۇقالتا ال­ماعا­نىن ناعىز ەرلىككە بالاۋعا بولادى. ەرلىك دەيتىنىمىز, ول وقۋىن جالعاستىرۋمەن قاتار, سپورتپەن جان اياماي اينالىستى, قوعامعا پاي­دالى بولۋدى ويلادى. بۇگىندە يۆان لەبەدەۆ قيمىل-تىرەك جۇيەسى زاقىمدانعان سپورتشىلار اراسىندا اتى الدىمەن اتالاتىن ازامات­قا اينالعان. ول پاۋەرليفتينگ جانە كوپسايىس جارىسى بويىنشا 2014 جانە 2015 جىلعى وبلىس چەمپيونى. سونداي-اق, تالدىقورعان قا­لا­سىندا وتكەن قازاقستان چەمپيوناتىندا II جانە III جۇلدەلى ورىندارعا يە بولسا, پاۆلودار قالاسىندا بولعان قازاقستاندىق پاراوليمپيادالىق ويىندارىندا II ورىندى جەڭىپ الىپتى. يۆان ءوزىنىڭ ەڭبەك جولىن «كوك­­­­­شەتاۋ قالالىق اقپاراتتىق كىتاپحانالار» كوممۋنالدىق-مەم­لەكەتتىك مەكەمەسىندە باستاعان ەكەن. بىراق, ءارتۇرلى جاعدايلارعا بايلانىستى ۇيىندە ەكى جىلدان استام جۇمىسسىز وتىرىپتى. وسى­دان ەكى اي بۇرىن ول كۇتپەگەن جەر­دەن قالالىق جاستار ۇيىمىنىڭ كونسالتينگتىك كەڭەس ورتالىعى­نان شاقىرۋ العان. سىناقتان مۇدىرمەي وتكەن يۆان لەبەدەۆ قازىر ينفورماتيكا جانە جۇيەلىك تەحنولوگيا مامانى قىزمەتىن اتقارۋدا. ءبىز ونى ءوزىنىڭ سۇيىكتى كاسىبىندە تابىستى بولۋىنا تىلەكتەستىك ءبىل­دىرىپ, كونسالتينگتىك كەڭەس ورتالىعىنىڭ ۇجىمىنا العى­سىمىزدى ايتتىق. باقبەرگەن امالبەك, «ەگەمەن قازاقستان».  اقمولا وبلىسى.