«جاڭعاق تال»

فرانتسياداعى كينوفەستيۆالدان ەكى بىردەي جۇلدەمەن ورالدى سوڭعى ۋاقىتتا شاكەن ايمانوۆ اتىنداعى «قازاقفيلم» كينوستۋدياسى تۇسىرگەن كارتينالاردىڭ ىشىندە «جاڭعاق تال» ءفيلمى كو­ڭىلگە جىلى شۋاق ۇيالاتاتىن جاق­سى تۋىندىلاردىڭ قاتارىنان تابىلعان ەدى. كينەماتوگرافيا سالاسىنان حاباردار جاندار وتكەن جىلى رەجيسسەر ەرلان نۇرمۇحامبەتوۆتىڭ وسى «جاڭعاق تال» ءفيلمى كو­رەيا­داعى پۋسان فەستيۆالىندە كور­سەتىلىپ, الەمدىك پرەمەراسى ءجۇر­گەنىن ءبى­لەدى جانە ول سول دودادا دا New Currents («جاڭا اعىم») سەكتسياسى اياسىندا جۇلدەگە يە بولعان-دى. ەندى, مىنە, قازاقستاندىق كينوكارتينا ۆەزۋلدە وتكەن (فرانتسيا) ازيا كينوسىنىڭ ءححىى حالىق­ارالىق كينوفەستيۆالىندا ەكى ءبىر­دەي جۇلدەگە يە بولدى. رەجيسسەر ەرلان نۇرمۇحامبەتوۆتىڭ كارتيناسى حالىقارالىق قازىلاردىڭ ارناۋلى جۇلدەسى مەن كينو سىن­شىلارىنىڭ ارناۋلى جۇلدەسىن جەڭىپ الدى. ۆەزۋلدەگى بۇل كينوفەستيۆال فرانتسيادا عانا ەمەس, ەۋروپادا كوپتەن بەرى وتكىزىلىپ كەلە جاتقان اۋقىمدى ازيالىق كينوفورۋم بولىپ تابىلادى. وڭتۇستىك قازاقستان وبلى­سىنىڭ لەنگىر قالاسىندا ءتۇسى­رىل­گەن «جاڭ­­عاق تال» ءفيلمى – كا­دىمگى وتبا­سىلىق قارىم-قاتى­ناس­تارعا قۇ­رىلعان تۋىندى. ىرىك­تەۋ كوميسسيا­سى كونكۋرستىق كور­سەتىلىم ءۇشىن اتال­مىش كارتينانى ۇزدىك ازيالىق كينوتۋىندىلار اراسىنان تاڭداپ العان بولاتىن. فەستيۆال اياسىندا فرانتسۋز كو­رەرمەندەرىنە ۇسىنىلعان «جاڭ­عاق تال» ءفيلمىنىڭ كورسە­تىلىمىنە رەجيسسەر ەرلان نۇرمۇحام­بەتوۆ­تىڭ ءوزى دە قاتىسقان. قازاقستاندىق تۋىندىعا باسە­كەلەس رەتىندە قىتاي, جاپونيا, وڭ­تۇستىك كورەيا, يران, فيليپپين جانە تۇركيا ەلدەرىنىڭ 8 كينوكارتيناسى ۇسىنىلعان. سولاردىڭ ارا­سىندا جەڭىپ شىققانى – «جاڭعاق تال». ال فەستيۆال اياسىندا بار­­لىعى 90-نان استام فيلم كورسە­تىلگەن. ايناش ەسالي, «ەگەمەن قازاقستان». الماتى.