اقمولا وبلىسىندا پارا الماق بولعان پوليتسەي ۇستالدى

كوكشەتاۋ. 16 اقپان. اقمولا وبلىستىق ىشكى ىستەر دەپارتامەنتىنە قاراستى جول-پاترۋلدىك پوليتسيا قىزمەتكەرى پارا العالى جاتقان جەرىندە قولعا ءتۇسىپ قالدى. بۇل تۋرالى وبلىستىق ىشكى ىستەر دەپارتامەنتى ءباسپاسوز قىزمەتىنىڭ دەرەگىنە سىلتەمە جاساعان egemen.kz ءتىلشىسى حابارلادى. وبلىستىق ىشكى ىستەر دەپارتامەنتى وزىندىك قىزمەتتىك باقىلاۋ قىزمەتكەرلەرى جەمقورلىقپەن كۇرەسۋ جانە ونىڭ فاكتىلەرىن انىقتاۋ ماقساتىندا كەزەكتى رەيدتىك جۇمىستارىن ج.رگىزىپ جاتىر. ولار وزدەرىنىڭ دۇرىس جولدان تايعان ارىپتەستەرىنىڭ «لاس تىرلىكتەرىنىڭ» الدىن كەسۋگە كۇش سالۋدا. «اقپاننىڭ 14-ءى كۇنى ساعات 15:15 مينۋت شاماسىندا ستەپنوگور قالاسى اۆتوۆوكزالى عيماراتىنىڭ ىشىندە 42 جاستاعى جەرگىلىكتى تۇرعىننان 100 مىڭ تەڭگە كولەمىندە پارا الماق بولعان جول-پاترۋلدىك پوليتسيا روتاسىنىڭ قىزمەتكەرى قولعا ءتۇستى. اتالعان جول-پاترۋلدىك پوليتسيا قىزمەتكەرى ماس كۇيىندە كولىك باسقارعان جۇرگىزۋشىنى اكىمشىلىك جاۋاپكەرشىلىكتەن بوساتۋ ءۇشىن اقشا سۇراعان», - دەلىنگەن حابارلامادا. قازىرگى تاڭدا 23 جاستاعى پوليتسيا قىزمەتكەرى ۋاقىتشا ۇستاۋ وقشاۋلاعىشىندا وتىر. ونىڭ ۇستىنەن قىلمىستىق كودەكستىڭ 366-بابى, 2-بولىگى بويىنشا قىلمىستىق ءىس قوزعالدى. باقبەرگەن امالبەك. دەرەك: اقمولا وبلىسى ىشكى ىستەر دەپارتامەنتىنىڭ ءباسپاسوز قىزمەتى.