كىشى دجوردج بۋش اقش پرەزيدەنتتىگىنەن ۇمىتكەر ىنىسىنە قولداۋ ءبىلدىردى

استانا. 16 اقپان. كىشى دجوردج بۋش العاش رەت ءىنىسى دجەب بۋشتىڭ سايلاۋالدى كامپانياسىنا قاتىستى. بۇل تۋرالى تاسس اقپارات اگەنتتىگىنە سىلتەمە جاساعان egemen.kz ءتىلشىسى حابارلادى. اقش-تىڭ 43-پرەزيدەنتى كىشى دجوردج بۋش تۋعان باۋىرى – فلوريدا شتاتىنىڭ بۇرىنعى گۋبەرناتورى دجەب بۋشتىڭ سايلاۋالدى كامپانياسىنا تىكەلەي قاتىستى. دجەب بۋش رەسپۋبليكالىق پارتيا اتىنان اقش پرەزيدەنتتىگىنە ۇمىتكەر رەتىندە ۇسىنىلۋعا قول جەتكىزگەن بولاتىن. ەكس-پرەزيدەنت كولۋمبيا قالاسىندا وتكەن سايلاۋالدى شەرۋگە قاتىستى. بۇل جەردە ول «امەريكالىق لەگيون» ارداگەرلەر ۇيىمىنىڭ مۇشەلەرىمەن كەزدەسىپ, كەيىننەن چارلستوندا وتكەن ميتينگكە قاتىسۋ ءۇشىن جولعا شىقتى. بۇرىنعى مەملەكەت باسشىسىنىڭ اعاسىن قولداپ, سايلاۋالدى كامپانياسىندا سويلەگەن ءسوزىن ونىڭ ساياسي باسەكەلەسى, ميللياردەر دونالد ترامپ بىردەن تالقىعا سالدى. وڭتۇستىك كارولينادا جۋرناليستەرمەن كەزدەسۋ كەزىندە ول: «ەگەر ەكس-پرەزيدەنت اعاسىنىڭ كامپانياسىنا قاتىسسا, ونىڭ بۇرىنعى قىزمەتتەرىن ءجىتى تەكسەرۋگە بولادى دەپ ويلايمىن. اتاپ ايتقاندا, قىزمەتىنىڭ بۇرىندارى نازارعا الىنباعان تۇستارىن», – دەدى. بۇدان بۇرىن ءباسپاسوز ءماسليحاتى كەزىندە دونالد ترامپ دۇنيەجۇزىلىك ساۋدا ورتالىعىنا دجوردج بۋش پرەزيدەنت بولىپ تۇرعان كەزدە تەراكت جاسالعانىن بىرنەشە مارتە ەسكە سالعان ەدى. اقش-تىڭ بۇرىنعى پرەزيدەنتى اعاسى دجەبكە قولداۋ كورسەتىپ, سايلاۋالدى كامپانياسىندا وڭتۇستىك كارولينادا 20 اقپان كۇنى وتەتىن سايلاۋالدى شاراعا كەم دەگەندە ءبىر اپتا قالعاندا ءسوز سويلەگەن ەدى. بۇل شارادا فلوريدا شتاتىنان رەسپۋبليكالىق پارتيانىڭ سەزى كەزىندە تاڭداپ الىنعان 50 دەلەگاتتىڭ كىمگە داۋىس بەرەتىنى انىقتالاتىن بولادى. وسى جەردە رەسپۋبليكاشىلداردىڭ اقش پرەزيدەنتتىگىنە رەسمي ۇمىتكەرىنىڭ ەسىمى دە اتالادى. بۇدان بۇرىن, ناقتىراق ايتقاندا, 1 اقپاندا نيۋ-گەمپشير شتاتىندا وتكەن العاشقى سايلاۋلار كەزىندە دجەب بۋشتىڭ كامپانياسىنا 90 جاستاعى اناسى, بۇرىنعى پرەزيدەنت – ۇلكەن دجوردج بۋشتىڭ جۇبايى باربارا دا قاتىسقان ەدى. ەلامان قوڭىر. دەرەك: تاسس. سۋرەت: Reuters.