قازاق تاەكۆوندوشىلارى حالىقارالىق تۋرنيردە ءۇش جۇلدەگە قول جەتكىزدى

استانا. 16 اقپان. تاەكۆوندودان تۇركيادا وتكەن Turkish Open حالىقارالىق تۋرنيرىندە قازاقستاندىق سپورتشىلار ءۇش مەدالدى قورجىنعا سالدى. بۇل تۋرالى egemen.kz ءتىلشىسى حابارلادى. سايىس بارىسىندا 49 كيلو سالماقتا سىنعا تۇسكەن اينۇر ەسبەرگەنوۆا كۇمىس جۇلدەگە قول جەتكىزدى. ول تۇركيا, بەلگيا جانە حورۆاتيا سپورتشىلارىنان باسىم ءتۇسىپ, فينالدا تاعى ءبىر تۇرىك قىزى رۋكيە يىلديريمگە ەسە جىبەردى. سونىمەن قاتار, 58 كيلو سالماق دارەجەسىندە ەل نامىسىن قورعاعان الماس مۇقامىروۆ قولا مەدالدى موينىنا تاقتى. الماس جارتىلاي فينالدا پالەستينالىق ابۋ الرۋبۋدەن جەڭىلگەن بولاتىن. ءوز كەزەگىندە پالەستينا سپورتشىسى وسى سالماقتىڭ چەمپيونى اتانعانىن اتاپ وتكەن ءجون. قورجىنعا تۇسكەن ءۇشىنشى مەدالدى 74 كيلودا باق سىناعان ەرجان ابىلقاس الدى. جارتىلاي فينالدا وزبەكستاندىق سپورتشىعا جول بەرگەن ەرجان ءتۋرنيردىڭ قولا جۇلدەگەرى اتاندى. ايتا كەتەيىك, اتالعان سايىسقا قازاقستان نەگىزگى قۇراممەن قاتىستى. قۇرامانىڭ كوشباسشىسى نۇرسۇلتان ماماەۆ قانا تۇركياداعى دوداعا قاتىسا المادى. ول بۇگىندە فيليپپيندە ىرىكتەۋ تۋرنيرىنە دايىندالۋدا. ەلامان قوڭىر. دەرەك: egemen.kz. سۋرەت: confederation.kz.