تارمۋ مەن جەرگىلىكتى پوليتسيا مەموراندۋمعا قول قويدى

تاراز. 16 اقپان. م.ح. دۋلاتي اتىنداعى تارمۋ باسشىلىعى مەن جامبىل وبلىستىق ىشكى ىستەر دەپارتامەنتىنىڭ جەرگىلىكتى پوليتسيا قىزمەتىنىڭ اراسىندا ءوزارا ارىپتەستىك تۋرالى مەموراندۋمعا قول قويىلدى. بۇل تۋرالى egemen.kz ءتىلشىسى حابارلادى. جامبىل وبلىستىق ىشكى ىستەر دەپارتامەنتىنىڭ جەرگىلىكتى پوليتسيا قىزمەتىنىڭ باستىعى, پولكوۆنيك باقىتجان بەيسەەۆ 2016 جىلى كۇشىنە زاڭنامالار نەگىزىندە قۇرىلعان جاڭا قىزمەتتىڭ مىندەتتەرىنە توقتالىپ ءوتتى. ال, ۋنيۆەرسيتەت رەكتورى ماحمەتعالي سارىبەكوۆ ارىپتەستىك تۋرالى مەموراندۋم نەگىزىندە ۋنيۆەرسيتەت عيماراتتارىنداعى تىنىشتىق جەرگىلىكتى پوليتسيا قىزمەتىنىڭ ءجىتى باقىلاۋىندا بولاتىندىعىنا نازار اۋداردى. «بۇل مەموراندۋمعا ستۋدەنتتەر اراسىنداعى قۇقىق بۇزۋشىلىقتىڭ الدىن-الۋ ماقساتىندا قول قويىلىپ وتىر. وسى قۇجات نەگىزىندە جاستار اراسىنداعى قىلمىسقا بىرلەسىپ قارسى تۇرۋدىڭ كەشەندى جوسپارى تۇزىلەدى. ول جوسپار بويىنشا ارنايى مامانداردىڭ قاتىسۋىمەن سەمينارلار, ترەنينگتەر, كەزدەسۋلەر وتەتىن بولادى. قۇقىق بۇزۋشىلىققا تاپ بولعان ستۋدەنتتەرگە پسيحولوگيالىق كومەك كورسەتۋدى دە ويعا الىپ وتىرمىز. قۇقىقبۇزۋشىلىققا قارسى كۇرەس جايىن ايتا وتىرىپ ستۋدەنتتەردىڭ ءوزىن-ءوزى قورعاۋ ماسەلەسىندە نازاردان شەت قالدىرماعان ءجون. ءدال وسى ماقساتتا ستۋدەنتتەر «دينامو» سپورت كەشەنىنىڭ بازاسىندا ءوزىن-ءوزى قورعاۋدىڭ ءادىس-تاسىلدەرىن مەڭگەرمەك. جۇمىستىڭ ناتيجەلىگىن ارتتىرۋدا جەرگىلىكتى پوليتسيا قىزمەتىنە تارمۋ-دىڭ اسكەري كافەدراسى بازاسىنداعى «بۇركىت» ستۋدەنتتىك جاساعى دا كومەك كورسەتۋگە ءازىر. وعان قوسا, ۋنيۆەرسيتەتىمىزدىڭ گيدروكەشەنىندەگى قوعامدىق ءتارتىپتى ساقتاۋ ءۇشىن اتالمىش كەشەن اۋماعىنا ۋچاستكەلىك پوليتسيا پۋنكتى ورناتىلادى», دەدى ۋنيۆەرسيتەت رەكتورى. ورالحان ءداۋىت. دەرەك, سۋرەت: egemen.kz