ءبىر كۇندە ەكى بالاباقشا اشىلدى

وبلىس ورتالىعىندا سوڭعى جىلدارى مەكتەپكە دەيىنگى بالالار مەكەمەلەرى كوپتەپ سالىنۋدا. جاقىندا قالادا ەكى بىردەي بالاباقشانىڭ پايدا­لانۋعا بەرىلۋى – سونىڭ ايقىن دالەلى. «شاتتىق» پەن «دۋمان» بالاباقشالارىندا 400-گە جۋىق بالاپان تاربيەلەنەتىن بولادى. «زارەچنىي-1» تۇرعىن اۋدانىندا بوي كوتەرگەن №48 «شاتتىق» بالاباقشاسىنىڭ اشىلۋ سالتاناتىنا قاتىسقان قالا اكىمى بەكبول ساعىن تۇرعىنداردى پايدالانۋعا بەرىلگەن الەۋمەتتىك نىساننىڭ اشىلۋىمەن قۇت­تىقتاپ, جىلى لەبىزىن ءبىلدىردى. ول ەلباسىنىڭ تاپسىرماسىمەن اقتوبەدە تاعى ءبىر بالاباقشا ىسكە قوسىلعانىن, «ماڭگىلىك ەل» بو­لامىز دەپ الدىنا ۇلكەن مۇرات قويىپ وتىرعان مەملەكەتىمىزدە جاس ۇرپاقتىڭ ءتار­بيەسىنە ۇلكەن ماڭىز بەرىلىپ وتىرعانىن جەت­كىزدى. قازاقتىڭ ۇلى جازۋشىسى مۇحتار اۋە­زوۆتىڭ «ەل بولامىن دەسەڭ, بەسىگىڭدى تۇزە» دەگەن اتالى ءسوزىن تىلگە تيەك ەتە كەلىپ, ەلباسى نۇرسۇلتان نازارباەۆتىڭ 2020 جىلعا دەيىن ەلىمىزدەگى 3-6 جاستاعى بالدىرعانداردى تو­لىقتاي بالاباقشامەن قامتۋدى مىندەتتەگەنىن اتاپ ءوتتى. قازىردىڭ وزىندە اقتوبە قالاسىنداعى 3-6 جاستاعى بالالاردىڭ بالاباقشامەن قامتىلۋ دەڭگەيى 80 پايىزدان اسقانىن بۇل سالاداعى جەتىستىك رەتىندە باعالادى. اتا-انا­لار اتىنان ءسوز العان گۇلنار ساريەۆا با­­لا­­­باقشانىڭ اشىلۋىنا ۇيىتقى بولعانى ءۇشىن ەلباسىنا جانە جەرگىلىكتى بيلىككە ريزاشىلىعىن ءبىلدىردى, ەلىمىزدىڭ گۇلدەنە بەرۋىنە ىزگى تىلەگىن ارنادى. بالاباقشا قۇرىلىسىنا جەرگىلىكتى بيۋد­جەت­تەن 362,3 ميلليون تەڭگە بولىنگەن. 150 ورىن­دىق بالا­باقشادا 6 توپ جۇمىس جاسايدى. 40-قا جۋىق مامان جۇمىس ىستەيدى. مۇندا بالالاردىڭ ويىن جانە جاتىن بولمەلەرى, مۋزىكا زالى, مە­دي­­تسينالىق بولمە, اسحانا ساپالى جيھازدارمەن جا­راق­تاندىرىلعان. مەديتسينالىق بلوگتا دەزين­فەكتسيالىق قۇرالداردى دايىندايتىن جانە فيزيو­تەراپەۆتىك بولمەلەر ورنالاسقان. بالاباقشا الا­ڭىندا بۇلدىرشىندەردىڭ بەل­سەندى قيمىلداۋىنا ار­نال­عان كولەڭكەلى باس­تىرما, شاعىن ساۋلەت نىسان­دارى ورناتىلعان. بۇدان كەيىن قالا باسشىسى وبلىس ورتالى­عىنداعى 11-شاعىن اۋداندا ورنالاسقان №49 «دۋ­مان» بالاباقشاسىنا باردى. مەملەكەت باسشىسى بۇرىن بالاباقشا عيماراتى بولعان نىسانداردى كۇردەلى جوندەۋدەن وتكىزىپ, جاس ۇرپاققا قايتارۋدى جۇكتەگەن بولاتىن. «دۋمان» بالاباقشاسى وسى تاپسىرما نەگىزىندە اشىلىپ وتىر. كۇردەلى جوندەۋدەن كەيىن پايدالانۋعا بەرىلىپ وتىرعان عيماراتتا №11 شاعىن اۋدانمەن قاتار, وعان كورشىلەس ورنا­لاسقان №12, «ماسكەۋ» مەن «بولاشاق» شاعىن اۋداندارىنىڭ دا بالالارى تاربيەلەنەتىن بولادى. 230 بالاعا ارنالعان بالاباقشادا 10 توپ بار. جالپى الاڭى 3621,66 شارشى مەتر عيماراتتىڭ قۇرىلىسىنا بيۋدجەتتەن 238247 مىڭ تەڭگە جۇمسالعان. قۇرىلىستى «ەليتسترويسەرۆيس» جشس جۇرگىزگەن. قالالىق ءبىلىم ءبولىمىنىڭ باسشىسى ءلاز­زات ورازباەۆانىڭ ايتۋىنشا, وتكەن جاز ايىندا 7 مىڭعا جۋىق بالا بالاباقشامەن قام­تىلعان, بيىلعى جىلى 8 مىڭ بۇلدىرشىنگە بالا­باقشاعا جول­داما بەرىلەدى. سونداي-اق, تاياۋدا «نۇر اقتوبە» شاعىن اۋدانىندا 320 ورىندىق بالاباقشا بوي كوتەرەدى دەپ كۇتىلۋدە. ساتىبالدى ءساۋىرباي, «ەگەمەن قازاقستان». اقتوبە وبلىسى. سۋرەتتى تۇسىرگەن حايرەدەن راۋشانوۆ.