فوتو: اقوردا
«تاۋەلسىزدىكتىڭ العاشقى جىلدارىنان باستاپ ەلدەرىمىز اراسىندا دوستىق قارىم-قاتىناس ورنادى. يزرايل مەملەكەتى قازاقستاننىڭ ەگەمەندىگىن العاشقىلاردىڭ ءبىرى بولىپ مويىندادى. 1993 جىلى ديپلوماتيالىق وكىلدىكتەرىمىزدى اشتىق. سودان بەرى بەلسەندى ساياسي ديالوگ قالىپتاستى. ساۋدا-ەكونوميكالىق جانە ينۆەستيتسيالىق ىقپالداستىقتا ەلەۋلى جەتىستىكتەرگە قول جەتكىزدىك», دەدى قاسىم-جومارت توقاەۆ.
پرەزيدەنتتىڭ پىكىرىنشە, يبراھيم كەلىسىمدەرى وڭىرلىك تۇراقتىلىققا, ساۋدا-ەكونوميكالىق ىنتىماقتاستىقتى جانداندىرۋعا بەرىك نەگىز قالايدى.
«وزىڭىزگە ءمالىم, قازاقستان بۇعان دەيىن قابىلداعان شەشىمىن ۇستانادى. يبراھيم كەلىسىمدەرىنە رەسمي تۇردە قوسىلۋ ءراسىمىن تاياۋ كەلەشەكتە استانادا ۇيىمداستىرۋعا بولادى دەپ ەسەپتەيمىز. سونىمەن قاتار جاساندى ينتەللەكت جانە تسيفرلاندىرۋ سالالارىنداعى ىنتىماقتاستىقتى نىعايتۋعا مۇددەلىمىز. بيىل قازاقستاندا جاساندى ينتەللەكت جانە تسيفرلاندىرۋ جىلى بولىپ جاريالاندى. مەن بۇل ماسەلەگە ايرىقشا ءمان بەرەمىن», دەدى مەملەكەت باسشىسى.
اقوردادا يزرايل پرەزيدەنتىن سالتاناتتى قارسى الۋ ءراسىمى ءوتتى
يتسحاك گەرتسوگ قازاقستان مەن يزرايل اراسىنداعى ارىپتەستىك قارقىندى دامىپ كەلە جاتقانىن ايتتى
«پرەزيدەنت مىرزا, قازاقستان تولەرانتتىلىق پەن كونفەسسياارالىق ديالوگتىڭ بىرەگەي ۇلگىسىن كورسەتىپ وتىر. سول ءۇشىن سىزگە العىس ايتامىن. سونىمەن قاتار ەكى ەل اراسىنداعى ىسكەرلىك بايلانىستار مەن تاۋار اينالىمىن ارتتىرۋعا مۇمكىندىك مول ەكەنىنە نازار اۋدارعىم كەلەدى. بۇل باعىتتا ناقتى شارالار قابىلداي الامىز. اتاپ ايتقاندا, ءبىز تىكەلەي اۋە قاتىناسىن اشۋعا مۇددەلىمىز. ول ىسكەرلىك جانە ساۋدا قاتىناستارىنا وڭ ىقپال ەتەدى. بۇدان بولەك, ەكىجاقتى قۇقىقتىق-كەلىسىمشارت بازاسىن كەڭەيتۋگە نيەتتىمىز. قازىرگى كەزدە بىرقاتار كەلىسىم, سونىڭ ىشىندە قوسارلانعان سالىقتى الىپ تاستاۋ تۋرالى ۋاعدالاستىق پىسىقتالىپ جاتىر», دەدى يزرايل پرەزيدەنتى.
مەملەكەتتەر باسشىلارى وڭىرلىك جانە حالىقارالىق وزەكتى ماسەلەلەر جونىندە پىكىر الماستى.
كەلىسسوز قورىتىندىسى بويىنشا تاراپتار تۇراقتى ساياسي ديالوگتى جالعاستىرۋعا, بارلىق دەڭگەيدەگى ىقپالداستىقتى جانداندىرۋعا, سونداي-اق بىرلەسە كۇش جۇمىلدىرا وتىرىپ سەرىكتەستىكتى جاڭا ءارى ساپالى كەزەڭگە شىعارۋعا كەلىستى.
مەملەكەت باسشىسى مەن يزرايل پرەزيدەنتى شاعىن قۇرامدا كەلىسسوز جۇرگىزدى
