ايدانانىڭ الەمى

وسىدان ەكى جىل بۇرىن ايدانا نۇرتازينا ەسىمدى جاس كاسىپكەر «كيىم تىگۋ جانە جوندەۋ بو­يىنشا اتەلە اشۋ» جوباسىمەن نەسيە الىپ, ءوز بيزنەسىن باستاعان بولاتىن. بۇگىنگى كۇندە ول «دامۋ» كاسىپكەرلىكتى دامىتۋ قورىنىڭ كومەگىنە سۇيەنىپ, كاسىبىن ورىستەتە ءتۇسۋدى كوزدەپ ءجۇر, كەڭ­سەسىن كەڭەيتپەكشى, جاڭا تىگىن ستانوكتارىن الىپ, قوسىمشا جۇمىس ورىندارىن اشپاقشى. «جۇرتتىڭ ءبارى ينفلياتسيانى, ارزانداپ كەتكەن مۇنايدى جازعىرادى. مەنىڭشە, بۇل دۇنيەدەگى ەڭ قورقىنىشتى نارسەلەر – سوعىس پەن اشارشىلىق. ال قالعانى – بوس اڭگىمە. مەن ءۇشىن داعدارىس دە­گەنىڭىز – ادامدى قامشىلايتىن, العا ۇمتىلۋعا ىنتالاندىراتىن قوسىمشا مۇمكىندىك كوزى», – دەيدى ايدانانىڭ ءوزى. ايدانا – قاتال تاعدىردىڭ سىنىنا بالا كەزىندە ۇشىراعان جان. توعىز جاسىندا تىزەدەگى بولماشى جاراقاتى اسقىنا كەلىپ, قاتەرلى ىسىككە اينالعان ەدى. دارىگەرلەر وسىنداي دياگنوز قويىپ, اياقتى تىزەدەن كەسۋ كەرەك دەگەن ۇيعارىمعا كەلگەن. الايدا اكەسى مۇ­نىمەن كەلىسە قويمادى. قىزىنىڭ بولاشاعىن ويلاعان اكە جاقسىلىقتان كۇدەرىن ۇزبەي, ەمشىدەن ەمشى قويماي ەل ءىشىن اداقتاعان. ءسويتىپ جۇرگەندە ارادا سەگىز اي ءوتىپ, تىزەدەگى ىسىك اسقىنىپ بارىپ جام­­باسقا شاپقان ەدى. امال جوق, سىرقاتى ابدەن قا­جىتقان ايدانانىڭ وپەراتسيا ۇستەلىنە جاتۋى­نا تۋرا كەلدى. وتا جاسالىپ, وڭ اياق جامباستان كەسىلگەن... قايران انا قىزىنىڭ جانىنان كەتپەي, اۋرۋحانادا ءبىر جىل باقتى. اتا-انانىڭ شەكسىز ماحابباتى مەن سارقىلماس مەيىرىمى ايدانا ق ۇلىنشاقتى ۋايىم مەن ءتۇڭىلۋدىڭ قۇردىمىنان امان الىپ شىققان بولاتىن. قايسار قىز ۋاقىت وتە كەلە بالداقپەن ءجۇرۋدى مەڭگەرىپ الدى. ەڭ باستىسى, ول ءوزىن مۇگەدەكپىن دەپ ساناماعان. ۇيدە وقىپ, ورتا مەكتەپتى ءبىتىردى. ودان كەيىن بانك كوللەدجىنىڭ كۇندىزگى بولىمىنە وقۋعا ءتۇستى. نامىسقا تىرىسىپ, ۇيدەگى شارۋانىڭ ءبارىن اتقاراتىن: كىر جۋىپ, ءۇي جيناپ, تاماق تا ءپىسىردى. ونىڭ ومىرگە دەگەن قۇلشىنىسى قۇربىلارىنىڭ دا قاتارىن كوبەيتكەن. ولاردىڭ دوستىق پەيىلى ايداناعا قانات ءبىتىرىپ, ارمانىن دا اسقاقتاتا تۇسكەن ەدى. كوللەدجدى بىتىرگەننەن كەيىن ايدانا بانك قىزمەتكەرى بولا المادى: ەڭبەك تاجىريبەسى جوق, ونىڭ ۇستىنە ەكىنشى توپتاعى مۇگەدەكتى كىم جۇمىسقا الا قويسىن؟! سودان دۇكەندەردىڭ بىرىنە بارىپ, ءبىر بۇرىشتان ساۋدا نۇكتەسىن اشتى. ساۋداسى ءجۇرىپ كەتپەسە دە كاسىپكەرلىكتىڭ قىر-سىرىنا اجەپتاۋىر قانىعىپ الدى. ءوز الدىما بيزنەس باستاسام دەگەن وي سول كەزدە كەلگەن بولاتىن. «قۇلاننىڭ قا­سۋىنا مىلتىقتىڭ باسۋى» دەمەكشى, ءدال سول جىلدارى ەلىمىزدە 1-ءشى جانە 2-ءشى توپتاعى مۇگەدەك جان­دار­دىڭ جۇمىس ىستەۋىنە جاعداي جاسالعان ەدى. ايدانا بىلەكتى سىبانىپ, قالاداعى بىرنەشە تىگىن تسەحىندا جۇمىس ىستەدى. ەڭبەك ەتە ءجۇرىپ, ءوز الدىما تسەح اشسام دەگەن ارمانى دا ۇلعايا تۇسكەن. اقىرى تاۋەكەلگە بەل بۋىپ, ءوزىنىڭ جەكە تىگىن اتەلەسىن اش­تى. مۇنىڭ الدىندا ءسان كوللەدجىندە ءۇش ايلىق كۋرستان ءوتىپ الدى. حابارلاندىرۋ بويىنشا ەسكى تىگىن ماشينالارى ساتىپ الىندى. ءسويتىپ, جاڭا اتەلەسىنە «ايدا» دەگەن قىزىنىڭ ەسىمىن بەرىپ, جۇمىستى باستاپ تا كەتكەن بولاتىن. بۇل ءومىردىڭ قىزىعى مەن شىجىعى تاۋسىلعان با؟ ءاۋ باستا دارىگەرلەر ايدانانىڭ بالا تۋىنا ءۇزىلدى-كەسىلدى قارسى بولدى. بۇعان كونە قويار ايدانا ما, بىرنەشە رەت قولحات جازىپ ءجۇرىپ, اقىرى ومىرگە ايدا ەسىمدى ءسابيدى اكەلگەن. كىشكەنتاي عانا ايدا اناسىنىڭ ءومىرىن مۇلدە وزگەرتىپ جىبەرگەن ەدى. بۇرىنعى بۇرىنعى ما, ايدانا ەندى جاڭا بيىكتەرگە قۇلشىنا قۇلاش سەرمەگەن. «بيزنەستىڭ جول كارتاسى-2020» باعدارلاماسىنا قاتىسىپ, ۇكىمەتتىڭ كاسىپكەرلەرگە دەگەن قامقورلىعىن با­رىنشا پايدالاندى. كوپ ۇزاماي ايدانانىڭ قولىنان شىققان ءساندى دە ساپالى كيىم-كەشەك قالا تۇرعىندارىنىڭ سۇرانىسىنا يە بولا باستادى. استانادا وتكەن قولدانبالى ونەر كونكۋرسىندا جۇلدەلى ءۇشىنشى ورىن الىپ, ونىڭ سىياقىسىن شاپ-شاعىن بيزنەسىنىڭ قاجەتىنە سالدى. ايدانا بيزنەستەن قولى ءسال بوساي قالسا, «جان دوس» دەپ اتالاتىن مۇگەدەك سپورتشىلاردىڭ قوعامدىق بىرلەستىگىنە بارىپ, بي ۇيىرمەسىنە قا­تىسادى. بۇگىندە قازاقتىڭ قايسار قىزى مۇگە­دەكتەر ارباشاسىندا وتىرىپ-اق كەز كەلگەن ءبيدى مىڭ بۇرالا بيلەيتىن دارەجەگە جەتتى. ءتىپتى, حالىق­ارالىق كونكۋرسقا قاتىسىپ, اۆستريا, رەسەي, گرۋ­زيا سىندى مەملەكەتتەردەن كەلگەن مىقتى ءبيشى­لەردى ارتقا تاستاپ, جۇلدەلى ورىنعا دا يە بولدى. «كۇندەلىكتى جاتتىعۋلار جانىما كۇش-قۋات بەرەدى. بي مەن مۋزىكا مەنى كوككە الىپ ۇشاتىن قۇ­دىرەتتى كۇش. وسىنداي ساتتەردە مەن ءوزىمدى ەرەكشە باقىتتى سەزىنەمىن», – دەيدى ايدانا. مىنە, قيىندىقتان قايمىقپاعان قازاق قىزىنىڭ كىشكەنە عانا ادەمى الەمى ومىرگە دەگەن وسىنداي ۇلى ماحابباتتان ءنار الادى. البەتتە, بۇل الەمدە نالۋ مەن مۇڭعا, ءتۇڭىلۋ مەن تورىعۋعا ورىن مۇلدە جوق! قايرات ءابىلدينوۆ, «ەگەمەن قازاقستان». قاراعاندى. سۋرەتتى تۇسىرگەن د. كۋزميچەۆ.