ءوز جۇمىسىن باستادى

«اقمولا مەديا ورتالىعىنىڭ» ءماجىلىس زالىندا سايلاۋعا بايقاۋ جاساۋ جونىندەگى اقمولا وبلىستىق فيليالىنىڭ توراعاسى عوسمان تولەعۇل بۇقارالىق اقپارات قۇرالدارى وكىل­دەرىمەن ءباسپاسوز ءماسليحاتىن وتكىزىپ, وندا سايلاۋ ناۋقانىنا قوعامدىق باقىلاۋ جاساۋ تەتىگى جايلى ايتىپ بەردى. سايلاۋ – ساياسي ناۋقان, ونىڭ زاڭ اياسىندا ءوتۋى دەموكراتيالىق ۇدەرىستەردىڭ اشىقتىعىن كور­سەتەدى. بيىلعى پارلامەنت ءما­جىلىسى مەن جەرگىلىكتى ءماسليحاتتار سايلاۋلارى كەزەكتەن تىس وتكەلى وتىرعاندىقتان, دايىندىق شارالارى دا قولعا الىندى. ع.تولەعۇل ءوزىنىڭ سوزىندە سايلاۋ بارىسىنا قوعامدىق باقىلاۋ جاساۋدىڭ ماڭىزدىلىعىنا باسا توقتالدى. وركەنيەتكە ۇم­تىل­عان ەلى­مىزدە ءادىل سايلاۋ وتكىزۋ مەملە­كەتىمىزدىڭ دە بەدەلىن كوتەرەتىنى انىق, دەدى ول. جالپى, اقمولا وبلىسىنداعى بارلىق سايلاۋ ۋچاسكەلەرى تولى­عىمەن قوعامدىق بايقاۋشىلارمەن قامتاماسىز ەتىلمەكشى. وتكەن پرەزيدەنتتىك سايلاۋدا وبلىس بويىنشا بارلىعى 500-دەن اسا بايقاۋشى جۇمىس ىستەگەن ەدى. بۇل جولعى سايلاۋ ۇدەرىستەرى دە حالىقارالىق زاڭ تالاپتارى اياسىندا وتەتىنىنە سەنىم ءبىلدىردى وبلىستىق سايلاۋعا باقىلاۋ جاساۋ فيليالىنىڭ توراعاسى ع. تولەعۇل. جۋرناليستەر تاراپىنان دا كوپتەگەن ساۋالدار قويىلدى. وندا سايلاۋ كەزىندە زاڭ بۇزۋ فاكتىلەرى انىقتالا قالعان جاعدايدا ونى شەشۋدىڭ تەتىكتەرى اڭگىمە وزەگىنە اينالدى. بىراق, بۇل قوعامدىق باقىلاۋ كوميسسياسى سايلاۋ كوميسسياسىنىڭ جۇمىسىنا ارالاسا المايدى. تەك, بايقاۋ قۇزىرىن عانا يەلەنەدى. سوندىقتان, الداعى سايلاۋدىڭ زاڭ اياسىندا ءوتۋى ءۇشىن اتالعان قوعامدىق كوميسسيا بەلسەنە اتسالىساتىن بولادى. باقبەرگەن امالبەك, «ەگەمەن قازاقستان». كوكشەتاۋ.