«اۋىلدىڭ» كۇشى اگروونەركاسىپ كەشەنىندە

قاراعاندى قالاسىندا «اۋىل» حالىقتىق-دەموكراتيالىق پات­ريوتتىق پارتياسىنىڭ باستاماسىمەن «وتاندىق ەت پەن ءسۇت نارىعىنىڭ ەرەكشەلىكتەرى جانە ونى دامىتۋدىڭ بولاشاعى» اتتى رەسپۋبليكالىق فورۋم ءوتتى. فورۋم جۇمىسىنا «اۋىل» حدپپ حاتشىسى ءبورىباي جەكسەمبين, اتالعان پارتيانىڭ وبلىستاعى فيليالىنىڭ, مەملەكەتتىك ورگانداردىڭ, «قازاگرو­قارجى», «اگرارلىق كرەديتتىك كورپو­را­تسيا», «اۋىل شارۋاشىلىعىنا قارجىلىق كومەك كورسەتۋ قورى» كومپانيالارى بولىمشەلەرىنىڭ جانە اگروقۇرىلىمداردىڭ باسشىلارى مەن ماماندارى قاتىستى. قازىرگى تاڭدا دۇنيەجۇزىلىك ساۋدا ۇيىمىنا مۇشە بولعان قازاقستان ءۇشىن اۋىل شارۋاشىلىعىن دامىتۋ, ونىڭ ىشىندە ەت جانە ءسۇت سالاسىنا باسىمدىق بەرۋ ماسەلەسى وزەكتى بولىپ تۇر. جالپى, ساراپشىلاردىڭ ەسەبىنشە, ءبىزدىڭ ەلىمىزدىڭ ىشكى نارىقتى ەت جانە ءسۇت ونىمدەرىمەن تولىق قامتاماسىز ەتىپ قانا قويماي, ەكسپورتقا شىعارۋىنا دا مول مۇمكىندىگى بار. مىسالى, مامانداردىڭ ايتۋىنشا, قازاقستاننىڭ جىل سايىن رەسەي مەن قىتايدىڭ وزىنە جالپى سوماسى 5 ملرد. اقش دوللارى بولاتىن سيىر ەتىن ەكسپورتتاۋعا مۇمكىندىگى بار ەكەن. القالى جيىنعا قاتىسۋشىلار سوڭعى جىلدارى ەلىمىزدە اگروونەركاسىپ كەشەنىن قولداۋ ماقساتىندا بىرقاتار ماڭىزدى شارالاردىڭ قابىلدانعانىن ءبىراۋىزدان اتاپ ءوتتى. مىسالى, 2013 جىلدان بەرى «اگروبيزنەس-2020» باع­دار­لاماسى جۇزەگە اسىرىلىپ كەلەدى. وسى باعدارلاما اياسىندا اۋىل شارۋا­شى­لىعىن دامىتۋعا بيۋدجەتتەن قوماقتى قارجى بولىنۋدە. قازىرگى تاڭدا مەملەكەت اگروونەركاسىپ سالاسىن تىكەلەي نەسيەلەندىرۋدەن باسقا, قولداۋدىڭ نارىققا بەيىمدەلگەن باسقا دا تەتىكتەرىن قاراستىرعان. مىسالى, قۇرال-جابدىقتى, تەحنيكا مەن ءتورت ت ۇلىك مالدى, ينۆەس­تي­تسيالىق شىعىنداردى ليزينگكە نەمەسە نەسيەگە الۋ بويىنشا پايىزدىق ءمول­شەرلەمەسىن سۋبسيديالاۋعا كوشتى. فورۋمدا بايانداما جاساعان «اۋىل» پارتياسىنىڭ حاتشىسى ءبورىباي جەك­سەمبين اتالعان شارالاردىڭ «100 ناق­تى قادام» ۇلت جوسپارىن ىسكە اسىرۋ اياسىندا قابىلدانعانىن اتاپ ءوتتى. «بۇل شارالاردىڭ اگرارشىلار ءۇشىن وتە ماڭىزدى ەكەنىن ەسكەرە وتىرىپ, «اۋىل» پارتياسى ەلىمىزدە اگروونەركاسىپ كەشەنىن دامىتۋ جايى مەن بولاشاعىن, ونىڭ ىشىندە مەملەكەتتىڭ اگرارلىق سەكتورداعى جاڭا باستامالاردى ىسكە اسىرۋ مەحانيزمىن ءتۇسىندىرۋ جانە تالقىلاۋ بويىنشا دوڭگەلەك ۇستەلدەر, سەمينارلار ۇيىمداستىرىلۋدا», – دەدى ب. جەكسەمبين. جالپى, وتاندىق مال شارۋاشىلىعى الەۋەتىن ىسكە اسىرۋ ءۇشىن ۇساق تاۋارلى ءوندىرىستى بەلسەندى تۇردە پايدالانۋ كەرەكتىگى جيىندا باسا ايتىلدى. وسى ماقساتتا شاعىن شارۋا قوجالىقتارى مەن جەكەنىڭ قوسالقى شارۋاشىلىعىن مەملەكەتتىك تۇرعىدان ىنتالاندىرۋ شارالارىن ازىرلەپ, ىسكە اسىرۋ مىندەتى كۇن تارتىبىندە وتكىر تۇر. سونداي-اق, جەردى ءتيىمدى پايدالانۋ ماسەلەلەرى دە ءوز شەشىمىن تابۋى كەرەك. سونىمەن قاتار, كوللەدجدەر مەن كاسىبي مەكتەپتەر جانە جوعارى وقۋ ورىندارى دەڭگەيىندە اۋىل شارۋاشىلىعى سالاسىنا قاجەتتى ماماندار دايارلاۋ ءىسىن دە ىلگەرىلەتكەن ءجون. البەتتە, بۇل ماسەلەلەردىڭ ءبارى دە سالاداعى زاڭنامالاردى جەتىلدىرۋدى تالاپ ەتەدى. «اۋىل» پارتياسىنىڭ وكىلدەرى سالاداعى كوكەيكەستى ماسەلەلەردى شەشۋگە بەلسەندى تۇردە اتسالىسۋعا ءازىر ەكەندىكتەرىن جەتكىزدى. بۇل ءۇشىن, ارينە, اگروقۇرىلىمداردىڭ, مەملەكەتتىك ور­گان­داردىڭ, دامۋ ينستيتۋتتارى مەن قو­عامدىق بىرلەستىكتەردىڭ كۇش بىرىكتىرگەنى قاجەت-اق. جيىن سوڭىندا رەسپۋبليكالىق فورۋم قارار قابىلدادى. قايرات ءابىلدينوۆ, «ەگەمەن قازاقستان».