دانالىق دارياسى

ۇلتتىق مۋزەيدە قازاق ۇلتتىق ونەر ۋنيۆەرسيتەتىنىڭ «جىرشىلىق ونەر» كافەدراسى ستۋدەنتتەرىنىڭ قاتىسۋىمەن «جىر كەرۋەنى» اتتى لەكتسيا-كونتسەرت ءوتتى. بۇل شارا «حالىق قازىناسى» عىلىمي-زەرتتەۋ ينستيتۋتىنىڭ قازاق حالقىنىڭ ءداستۇرلى مۋزى­كالىق ونەرىن جاڭعىرتۋ مەن ناسيحاتتاۋعا ارنالعان «ءداس­تۇرلى مۋزىكالىق مۇرا» اتتى با­عدارلاماسى اياسىندا تۇڭعىش رەت ۇيىمداستىرىلىپ وتىر. ماماندار جىراۋلىق ءداستۇردىڭ تاريحى كۇلتەگىن, تونىكوك, ورحون ەنيسەي جازۋلارىنان, ەستەمىس, بۇمىن قاعاندارعا ارنالعان ماداق جىرلارىنان باستاۋ الاتىنىن العا تارتادى. ويتكەنى, مۇنداعى ءسوز تىركەستەرى, ماداقتار جىراۋلىق مەكتەپتىڭ بىرنەشە عاسىرلىق شەجىرەسىن ءمىنسىز ايعاقتايدى. مۇنان كەيىنگى كەزەڭدەردە وتكەن قورقىت اتا, سىپىرا جىراۋ, كەتبۇعا, اسان قايعى, شالكيىز, دوسپامبەت, قازتۋعان, ۇمبەتەي, بۇقار جىراۋلاردىڭ جاۋھارلارى كوش ءىزىن ۇزبەي جالعاستىرادى. ءبىر عاجابى, جىراۋلار ءسوزىنىڭ قۇدىرەتى بيىك رۋحقا, قايرات-جىگەر مەن عالامات كۇشكە يە. ولاردى كىسى جاي تىڭداپ قويا سالمايدى. قۇلاققا قۇيىلا باستاعاننان ادام وتقا قىزىنعانداي اسەر­لەنەدى. شابىت شاقىرادى. ۇرەي, كۇدىكتەن ارىلتادى. عاجايىپ سەزىممەن سەرپىلەدى. ويتكەنى, جىراۋلار قاي كەزدە دە ەڭ الدىمەن, ەلدىڭ مۇڭ-شەرىن, ارمان-ماقساتىن ەش بۇكپەسىز اشىق ايتا الىپ وتىرعان. ول دا بولسا ۇلى دالا مادەنيەتىنىڭ تەك وزىنە عانا ءتان بولىپ كەلەتىن ەرەكشەلىگى. بۇگىنگى تاڭدا جىراۋ بابالارىمىزدىڭ مۇرالارى مەن مارجان ويلارى ارقىلى تاريحي سانانى وياتۋعا, جىرلاردى قالىڭ كوپشىلىككە ناسيحاتتاۋعا بارىنشا كوڭىل بولىنە باستادى. ۇلتتىق مۋزەيدە قازاقستاننىڭ ەڭبەك سىڭىرگەن قايراتكەرى, قازاق ۇلتتىق ونەر ۋنيۆەرسيتەتىنىڭ پروفەسسورى, «پاراسات» وردەنىنىڭ يەگەرى, بەلگىلى كۇمىسكومەي جىراۋ الماس الماتوۆتىڭ جۇرگىزۋىمەن وتكەن ۇلتتىق مۋزەيدەگى لەكتسيا-كونتسەرت سونداي يدەيانى جۇزەگە اسىرۋشى بىردەن-ءبىر جوبا بولىپ تابىلادى. قارشىعا كۇلەن.