بارشاعا ورتاق جاۋاپكەرشىلىك

وڭىردەگى نۇروتاندىقتار پارتيا سەزىنە جاقسى جۇمىستارىمەن كەلىپ وتىر. ولاردىڭ بارلىعى ەلباسى, «نۇر وتان» پارتياسىنىڭ توراعاسى ن.ءا.نازارباەۆتىڭ جولداۋلارى مەن ەلىمىزدى ىلگەرىلەتۋگە ارنالعان ءتۇرلى باعدارلامالارىنىڭ ناتيجەسىندە مۇمكىن بولىپ وتىر. وسى ورايدا پرەزيدەنت: «قازاقستان حالقىنا جولداۋىمداعى بارلىق مىندەتتەردى جۇزەگە اسىرۋدا مەن «نۇر وتان» پارتياسىنا ەرەكشە ورىن بەرەمىن. جولداۋ بارلىق پارتيا مۇشەسى ءۇشىن ءىس-قيمىل نەگىزى جانە تاياۋداعى جىلدارعا ارنالعان باعدارلاما بولۋى ءتيىس. كەڭ كولەمدى ءتۇسىندىرۋ جۇمىستارىن جۇرگىزىپ, ادامداردى جۇمىلدىرۋ, قويىلعان بارلىق مىندەتتەردى ورىنداۋدا بىرىكتىرۋ كەرەك. پارتيادان سايلانعان دەپۋتاتتار داعدارىسقا قارسى جانە قۇرىلىمدىق قايتا جاڭعىرۋلاردى زاڭنامالىق تۇرعىدان قامتاماسىز ەتۋلەرى ءتيىس», دەگەن بولاتىن. بۇدان تۇيەرىمىز, جولداۋدى جۇرتشىلىققا جەتكىزۋ, تياناقتى ءتۇسىندىرۋ, مەجەلەنگەن ماقساتتارعا جۇمىلدىرۋ سىندى جاۋاپكەرشىلىگى مول جۇمىس بىزگە تاپسىرىلدى. وبلىستاعى پارتيا مۇشەلەرى جولداۋ جۇكتەگەن مىندەتتەردى ىسكە اسىرۋدا بەلسەندىلىك تانىتىپ, اۋقىمدى ءارى كەشەندى شارالاردى ناتيجەلى اتقارۋعا وزدەرىنىڭ سۇبەلى ۇلەستەرىن قوساتىنى كۇمانسىز. ناقتىلى ءىس-شارالار اياسىندا ماسليحاتتارداعى فراكتسيا مۇشەلەرى تىندىرىمدى تىرلىك اتقارۋدا. دەپۋتاتتارىمىز ءوز وكرۋگتەرىندەگى سايلاۋشىلارمەن تىعىز بايلانىستا جۇمىس جاساپ, جولداۋدى قاراپايىم تۇرعىندار اراسىندا كەڭىنەن ناسيحاتتاۋ, ۇعىندىرۋ باعىتىنداعى ناتيجەلى شارالاردى قولعا العان. سونىمەن قاتار, اتالعان شارالاردى جانداندىرۋعا وڭىردەگى 19 اۋماقتىق پارتيا فيليالى مەن 309 باستاۋىش پارتيا ۇيىمىن, 92 مىڭنان استام پارتيا مۇشەسىن جانە «جاس وتان» جاستار قاناتىن جۇمىلدىرىپ, جۇمىستى جۇيەلى جۇرگىزە باستادىق. وتكەن جىلدىڭ باستى قۇجاتىندا ەلىمىزدىڭ ەكونوميكالىق, الەۋمەتتىك جانە ت.ب. سالالاردىڭ نەگىزگى باسىمدىقتارى تياناقتى سارالانۋىمەن قا­تار, ءاربىر ەل ازاماتىن ويلاندىرعان ماسەلەلەردىڭ شەشۋ جولدارى قامتىلدى. الەۋمەتتىڭ الەۋمەتتىك جاعدايىنا باسىمدىق بەرگەن جولداۋعا قوعام تاراپىنان ەرەكشە ءمان بەرىلدى. پرەزيدەنت الەمدە ورىن الىپ وتىرعان ناقتى جاھاندىق احۋالدا ەكونوميكالىق ءوسۋ, ناتيجەلى رەفورمالار جاساۋ مەن دامۋدىڭ داڭعىل جولىن ايرىقشا ايقىنداپ بەردى. مەملەكەت باسشىسى ءوز سوزىندە: «مەملەكەت قانداي جاعدايدا دا الەۋمەتتىك مىندەتتەمەلەرىن شاشاۋ شىعارماي ورىنداپ كەلەدى. جاڭا جىلدان بيۋدجەت قىزمەتكەرلەرىنىڭ جالاقىسى, الەۋمەتتىك جاردەماقىلار مەن شاكىرتاقى ورتاشا العاندا 30 پايىزعا دەيىن كوبەيەدى. وسىنىڭ بارلىعى حالىقتىڭ بولاشاققا سەنىممەن قاراپ, الاڭسىز ءومىر سۇرۋىنە تولىق نەگىز بولادى», دەپ اتاپ وتكەن ەدى. ياعني, بۇل مەملەكەتىمىزدىڭ داعدارىس كەزىندە الەۋمەتتىك مىندەتتەمەلەردى تولىعىمەن ءارى دەر كەزىندە ورىنداي الاتىندىعىن بىلدىرەتىن جايت بولىپ وتىر. جولداۋدا ەڭ جاقسى جوسپار – ۋاقىت تالابىنا بەيىمدەلگەن جوسپار ەكەندىگى ايرىقشا ايتىلىپ, ەگەمەن ەلىمىزدىڭ ءوسىپ-وركەندەۋى مەن جان-جاقتى دامۋىن قامتاماسىز ەتەتىن كەشەندى شارا­لار ۇعىنىقتى باياندالدى. سونداي-اق, داعدارىسقا قارسى جانە قۇرى­لىم­دىق جاڭارۋلاردىڭ بەس باعىتى, اتاپ ايتقاندا, قارجى سەكتورىن تۇراق­تان­دىرۋ, بيۋدجەت ساياساتىن وڭتايلاندىرۋ, جەكەشەلەندىرۋ جانە ەكونوميكالىق باسەكەلەستىكتى ىنتالاندىرۋ, جاڭا ينۆەستيتسيالىق ساياساتتىڭ نەگىزدەرى مەن جاڭا الەۋمەتتىك ساياسات كوپشىلىك نازارىنا ۇسىنىلدى. القالى جيىندا ەلىمىزدە جاسالاتىن بۇيىمدارعا قويىلاتىن باستى كريتەريلەر اتالدى. ەلباسى: «قۋاتتى ەل بولۋ – باسەكەگە قابىلەتتى بولۋ دەگەن ءسوز. «قازاقستاندا جاسالعان» ءاربىر بۇيىمدا ءتورت قاسيەت – ساپالى, ىڭعايلى, ادەمى جانە ارزان بولۋى كەرەك. سوندا عانا ءىسىمىز ءونىمدى, زاتىمىز ءوتىمدى بولادى», دەدى. وسى پىكىردەن وڭ ناتيجە شىعارامىن دەيتىن ءار كاسىپكەر نارىققا تاۋارىن ۇسىنار الدىندا ءونىمىنىڭ ساپاسى مەن ىڭعايلىلىعىنا جانە تۇتىنۋشىلارعا قولجەتىمدى باعادا بولۋىنا باسىمدىق بەرۋى كەرەك. بۇل تۇرعىدا نارىققا باسەكەگە قابىلەتتى دايىن تاۋار جونەلتەتىن ىسكەر ازاماتتار ءوز ونىمدەرىن وسى تالاپقا سايكەستەندىرۋ باعىتىندا قارقىندى جۇمىس جاساۋى ءتيىس. ەل ۇكىمەتىنە وسى جىلعى ءى توقساننىڭ سوڭىنا دەيىن ەڭبەكپەن قامتۋدىڭ جاڭا جول كارتاسىن ازىرلەۋ تاپسىرىلدى. وسى ماقساتقا قارالعان قارجى كولەمى ارتىپ, الدىڭعى جىلدارداعى جول كارتاسىمەن سالىستىرعاندا, ۇلعايتىلاتىنى ەرەكشە ايتىلدى. بۇل ەكى قولعا ءبىر كۇرەك تاپپاي جۇرگەن ازاماتتاردىڭ قايتا دايارلىقتان ءوتىپ, تۇراقتى جۇمىسقا تۇرۋىن قامتاماسىز ەتۋمەن قاتار, ينفراقۇرىلىمداردىڭ رەتتەلەتىنىن جانە ءوز ءىسىن ورگە سۇيرەيمىن دەگەن ازاماتتارعا بەرىلەتىن نەسيەلەر كولەمىنىڭ ارتاتىنىن بىلدىرەدى. ەلباسى جولداۋىندا ايتىلعان اۋقىمدى تاپسىرمالاردى ورىنداۋدا ءبىزدىڭ مۇمكىندىگىمىز مول. مەجەلەنگەن ماقساتتار مەن مىندەتتەردى ىسكە اسىرۋدا ۇقىپتىلىق پەن ۇنەمدىلىككە نازار اۋدارىپ, ەل قازىناسىنان قارالاتىن قاراجاتتى ءوز ماقساتىندا ءتيىمدى پايدالانا ءبىلۋىمىز كەرەك. جولداۋ – جاۋاپكەرشىلىك جۇكتەيدى ءارى جارقىن بولاشاعىمىزدىڭ ىرگەسىن بۇگىننەن باس­تاپ بەكەمدەۋگە ۇندەيدى. ەلباسى تاپسىرعان مەرەيلى مىندەتتەردى ساپالى اتقارۋ – بارشا قازاقستاندىقتارعا ورتاق ءىس. وڭتۇستىكقازاقستاندىق «نۇر وتان» پارتياسى مۇشەلەرىنىڭ جولداۋ جۇكتەگەن مىندەتتەردى ورىنداۋعا مۇمكىندىگى جەتكىلىكتى. بارشا قازاقستاندىقتار, تولە بي بابا ايتقانداي, ءبىر قولدىڭ سالاسىنداي, ءبىر ءۇيدىڭ بالاسىنداي بىرىكسە, «ماڭگىلىك ەل» مۇراتىنا جەتۋگە كۇش-قۋاتىمىز ابدەن جەتەدى. بەرىك وسپانوۆ, «نۇر وتان» پارتياسى وڭتۇستىك قازاقستان وبلىستىق فيليالى توراعاسىنىڭ ءبىرىنشى ورىنباسارى, سەزد دەلەگاتى. شىمكەنت.