فۋتبولدان قازاقستان قۇراماسى گرۋزيا جانە قىرعىزستانمەن كەزدەسەدى

استانا. 28 قاڭتار. فۋتبولدان قازاقستان ۇلتتىق قۇراماسى 26 ناۋرىز كۇنى تۇركيانىڭ انتاليا قالاسىندا ازەربايجان كومانداسىمەن جولداستىق ماتچ وتكىزگەننەن كەيىن گرۋزيا جانە قىرعىزستان قۇرامالارىمەن كەزدەسەدى. بۇل تۋرالى egemen.kz ءتىلشىسى حابارلادى. 29 ناۋرىزدا قازاقستان قۇراماسى تبيليسيدە گرۋزيانىڭ ۇلتتىق قۇراما كومانداسىمەن, ال 30 تامىز كۇنى سىرت الاڭدا قىرعىزستان قۇراماسىمەن وينايدى. قازاقستان قۇراماسى گرۋزيا فۋتبولشىلارىمەن 2006 جىلعى الەم چەمپيوناتىنىڭ ىرىكتەۋ تۋرنيرىندە ءبىر توپقا تۇسكەن ەدى. سول كەزدە الماتىدا قازاقستان كومانداسى گرۋزيادان 2:1 ەسەبىمەن جەڭىلسە, تبيليسيدەگى كەزدەسۋ 0:0 ەسەبىمەن اياقتالدى. ەكى ەل اراسىنداعى سوڭعى ماتچ 2013 جىلدىڭ 14 تامىزىندا «استانا ارەنا» ستاديونىندا ءوتتى. بۇل جولى كەزدەسۋ وتانداستارىمىزدىڭ پايداسىنا شەشىلدى. كەزدەسۋدە قازاقستان قۇراماسى  قارسىلاستارىن 1:0 ەسەبىمەن جەڭدى. ال, ەلىمىزىدڭ باس كومانداسى قىرعىزستانمەن 7 جولداستىق كەزدەسۋ وتكىزىپ, سونىڭ بەسەۋىندە جەڭىسكە جەتتى. ەكى ويىن تەڭ ەسەپپەن اياقتالدى. ەكى ەلدىڭ قۇرامالارى اراسىندا سوڭعى ماتچتا قازاقستان قۇراماسى قىرعىزستاندى 7:1 ەسەبىمەن ۇتتى. كەزدەسۋ 2014 جىلدىڭ 5 قىركۇيەگىندە «استانا ارەنا» ستاديونىندا ءوتتى. داستان كەنجالين. دەرەك, سۋرەت: قازاقستان فۋتبول فەدەراتسياسىنىڭ ءباسپاسوز قىزمەتى.