قوستانايدا كاسىپكەر سوتتا ءوز قۇقىعىن قورعاپ شىقتى

قوستاناي. 28 قاڭتار. جىتىقارا اۋدانىنداعى كاسىپكەر عاليا شۇرەنوۆا جولاۋشىلار كولىگى جانە اۆتوموبيل جولدارى وبلىستىق باسقارماسىن سوتقا بەرىپ, ءوزىنىڭ كاسىبىمەن اينالىسۋ قۇقىن قورعاپ قالدى جانە 2,4 ميلليون تەڭگە شىعىنىن قايتارىپ الاتىن بولدى. بۇل تۋرالى egemen.kz ءتىلشىسى حابارلادى. عاليا شۇرەنوۆا شالعايدا جاتقان جتىقارا اۋدانى مەن قوستاناي قالاسىنا جولاۋشىلار تاسىمالىمەن ون جىلدان بەرى اينالىسىپ كەلەدى. بۇل ماقساتقا ول اۆتوبۋس جالدايدى جانە ءوز كولىگىن پايدالانادى. 2014 جىلى جولاۋشىلار تاسىمالى جانە اۆتوموبيل جولدارى وبلىستىق باسقارماسى كاسىپكەرمەن «قوستاناي-زابەلوۆكا» باعىتىندا جولاۋشىلار تاسىمالداۋ قىزمەتىن كورسەتۋگە كەلىسىم-شارتتى ۇزەدى. ونداعى سىلتاۋى جۇرگىزۋشىلەر باعىتتىڭ سوڭىنا دەيىن بارمايدى, جولاۋشىلار شاعىمى بولعاندىعىن كولدەنەڭ تارتقان. الايدا, كاسىپكەر مۇنداي دالەلمەن كەلىسپەي, ءىستىڭ شىن كورىنىسىن دالەلدەۋ جانە ءوز بيزنەسىن قورعاۋ ءۇشىن وبلىستاعى كاسىپكەرلەر پالاتاسىنان كەڭەس سۇراي وتىرىپ, مەملەكەتتىك ورگانننىڭ زاڭسىز ارەكەتىنە قارسى سوتقا جۇگىندى. كاسىپكەر عاليا شۇرەنوۆا: «العاشىندا جولاۋشىلار تاسىمالى جانە اۆتوموبيل جولدارى باسقارماسىنا بارىپ, جاعدايدى ءتۇسىندىردىم. جولاۋشىلاردىڭ شاعىم جاساعانى وتىرىك. باسقارماداعىلار مەنىمەن سويلەسپەدى دە. ولار بۇگىندە تەندەردى دە دۇرىس وتكىزبەيدى, ادامنىڭ شاعىمىن, پىكىرىن تىڭدامايدى. ولار ءبىزدى نارىقتان ىسىرىپ تاستاعىسى كەلدى. مەنىڭ بار امالىم پالاتا مەن سوتقا بارۋ عانا بولدى», – دەدى تىلشىگە تەلەفون ارقىلى. كاسىپكەر باسقارمانى سوتتىڭ ءۇش ساتىسىندا دا جەڭىپ شىقتى. عاليا شۇرەنوۆا كاسىپكەرلەر پالاتاسىنىڭ كەڭەسىمەن جۇمىسسىز قالعان ۋاقىتىنداعى كەتكەن شىعىندى ءوندىرىپ الۋ ءۇشىن مەملەكەتتىك ورگاندى ەكىنشى رەت سوتقا بەردى. سوت شىعىندى ەسەپتەپ, 2,4 ميلليون تەڭگەنى كاسىپكەر پايداسىنا قايتارىپ بەرۋگە شەشىم شىعاردى. سوت شەشىمى ءالى كۇشىنە ەنگەن جوق. ءنازيرا جارىمبەتوۆا. دەرەك, سۋرەت: egemen.kz.