جامبىل وبلىسىندا بالا ساباقتا ومىرتقاسىن سىندىرىپ الدى

تاراز. 28 قاڭتار. جامبىل وبلىسىندا ءبىر وقۋشى ساباق كەزىندە ومىرتقاسىن سىندىرىپ الدى. بۇل تۋرالى nur.kz سايتىنا سىلتەمە جاساعان egemen.kz ءتىلشىسى حابارلادى. بۇل وقيعا سارىسۋ اۋدانىنىڭ ورتالىعى جاڭاتاس قالاسىنداعى ابىلاي حان ورتا مەكتەبىندە بولعان. nur.kz سايتىنىڭ جازۋىنا قاراعاندا ءدال قازىر 13 جاستاعى وقۋشى دياس ومىرتقاسىن جاراقاتتاپ, سارىسۋ اۋداندىق ورتالىق اۋرۋحاناسىندا جاتىر. بالانىڭ اتا-اناسى بۇل وقيعاعا تاريح ءپانىنىڭ مۇعالىمىن كىنالاپ وتىر. «مەنىڭ بالام ساباق ۇستىندە جاقىن پارتادا وتىرعان ءبىر وقۋشى قىزدان قالام سۇراپ, ورنىنان تۇرىپ بارعان. مۇعالىم وقۋشىنىڭ ورنىنا وتىرۋىن تالاپ ەتىپ, ارتىنشا دياستى قاتتى يتەرىپ جىبەرەدى. وقۋشى وڭباي قۇلاعان», دەيدى بالانىڭ اناسى گۇلجانار. دارىگەرلەر جاس بالانىڭ ومىتقاسى سىنعان دەگەن دياگنوز قويىپ وتىر. دياس قازىر ورنىنان تۇرىپ, جۇرە المايدى. ءتىپتى ءومىر بويى ارباعا تاڭىلىپ, مۇگەدەك بولىپ قالۋ قاۋپى دە جوق ەمەس. «ءبىزدى تاراز قالاسىنا توموگرافياعا تۇسۋگە جىبەردى. ال, وسى ىسكە كىنالى مۇعالىم ەشتەڭە بولماعانداي جايباراقات جۇمىسىن جالعاستىرىپ ءجۇر. ول ءتىپتى اۋرۋحاناداعى بالامنىڭ جاعدايىن سۇراپ, بىردە-ءبىر مارتە كەلگەن جوق. مەكتەپ ديرەكتورى دا ءۇنسىز. اۋداندىق ىشكى ىستەر بولىمىنە شاعىمدانىپ, ارىز جازدىم.  بۇدان باسقادان قايران بولماي تۇر. دياستان كەيىن 6 جاسار بالام بار, جان-جاققا ىزدەنۋگە مۇمكىندىك جوق», دەيدى اناسى گۇلجانار. سارىسۋ اۋداندىق جەرگىلىكتى پوليتسيا قىزمەتىنىڭ جەتەكشىسى رەنات بايبەكوۆ بۇل بويىنشا قىلمىستىق ءىس قوزعالىپ, تەرگەۋ جۇمىستارى ءجۇرىپ جاتقانىن ايتادى. سوت-مەديتسينالىق ساراپتاماسى تاعايىندالعان. تەرگەۋ قۇپياسىنا بايلانىستى باسقا ەشقانداي مالىمەت بەرە المايدى. ورالحان ءداۋىت. دەرەك, سۋرەت: nur.kz